| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ནཔྤཊིཔྤསྶམྦྷེཏབྦཏེཙཏྟཱལཱིསཀཾ
Nappaṭippassambhetabbatecattālīsakaṃ
༦༢. ‘‘པཉྩཧི , བྷིཀྑཝེ, ཨངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ། ཨུཔསམྤཱདེཏི, ནིསྶཡཾ དེཏི, སཱམཎེརཾ ཨུཔཊྛཱཔེཏི, བྷིཀྑུནོཝཱདཀསམྨུཏིཾ སཱདིཡཏི, སམྨཏོཔི བྷིཀྑུནིཡོ ཨོཝདཏི – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ།
62. ‘‘Pañcahi , bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ.
1 ‘‘ཨཔརེཧིཔི , བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ། ཡཱཡ ཨཱཔཏྟིཡཱ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ཀཏཾ ཧོཏི ཏཾ ཨཱཔཏྟིཾ ཨཱཔཛྫཏི, ཨཉྙཾ ཝཱ ཏཱདིསིཀཾ, ཏཏོ ཝཱ པཱཔིཊྛཏརཾ; ཀམྨཾ གརཧཏི, ཀམྨིཀེ གརཧཏི…པེ॰… པཀཏཏྟསྶ བྷིཀྑུནོ ཨབྷིཝཱདནཾ, པཙྩུཊྛཱནཾ, ཨཉྫལིཀམྨཾ, སཱམཱིཙིཀམྨཾ, ཨཱསནཱབྷིཧཱརཾ སཱདིཡཏི…པེ॰… པཀཏཏྟསྶ བྷིཀྑུནོ སེཡྻཱབྷིཧཱརཾ, པཱདོདཀཾ པཱདཔཱིཋཾ, པཱདཀཐལིཀཾ, པཏྟཙཱིཝརཔྤཊིགྒཧཎཾ, ནཧཱནེ པིཊྛིཔརིཀམྨཾ སཱདིཡཏི…པེ॰… པཀཏཏྟཾ བྷིཀྑུཾ སཱིལཝིཔཏྟིཡཱ ཨནུདྡྷཾསེཏི, ཨཱཙཱརཝིཔཏྟིཡཱ ཨནུདྡྷཾསེཏི, དིཊྛིཝིཔཏྟིཡཱ ཨནུདྡྷཾསེཏི, ཨཱཛཱིཝཝིཔཏྟིཡཱ ཨནུདྡྷཾསེཏི, བྷིཀྑུཾ བྷིཀྑཱུཧི བྷེདེཏི…པེ॰… གིཧིདྡྷཛཾ དྷཱརེཏི, ཏིཏྠིཡདྡྷཛཾ དྷཱརེཏི, ཏིཏྠིཡེ སེཝཏི, བྷིཀྑཱུ ན སེཝཏི, བྷིཀྑུསིཀྑཱཡ ན སིཀྑཏི…པེ॰… པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝསཏི, ཨེཀཙྪནྣེ ཨནཱཝཱསེ ཝསཏི, ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝསཏི, པཀཏཏྟཾ བྷིཀྑུཾ དིསྭཱ ཨཱསནཱ ན ཝུཊྛཱཏི, པཀཏཏྟཾ བྷིཀྑུཾ ཨཱསཱདེཏི ཨནྟོ ཝཱ བཧི ཝཱ – ཨིམེཧི ཁོ, བྷིཀྑཝེ, པཉྩཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ , ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ།
2 ‘‘Aparehipi , bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Yāya āpattiyā saṅghena, āpattiyā appaṭikamme, ukkhepanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati…pe… pakatattassa bhikkhuno abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāraṃ sādiyati…pe… pakatattassa bhikkhuno seyyābhihāraṃ, pādodakaṃ pādapīṭhaṃ, pādakathalikaṃ, pattacīvarappaṭiggahaṇaṃ, nahāne piṭṭhiparikammaṃ sādiyati…pe… pakatattaṃ bhikkhuṃ sīlavipattiyā anuddhaṃseti, ācāravipattiyā anuddhaṃseti, diṭṭhivipattiyā anuddhaṃseti, ājīvavipattiyā anuddhaṃseti, bhikkhuṃ bhikkhūhi bhedeti…pe… gihiddhajaṃ dhāreti, titthiyaddhajaṃ dhāreti, titthiye sevati, bhikkhū na sevati, bhikkhusikkhāya na sikkhati…pe… pakatattena bhikkhunā saddhiṃ ekacchanne āvāse vasati, ekacchanne anāvāse vasati, ekacchanne āvāse vā anāvāse vā vasati, pakatattaṃ bhikkhuṃ disvā āsanā na vuṭṭhāti, pakatattaṃ bhikkhuṃ āsādeti anto vā bahi vā – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme , ukkhepanīyakammaṃ nappaṭippassambhetabbaṃ.
‘‘ཨཊྛཧི, བྷིཀྑཝེ, ཨངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ། པཀཏཏྟསྶ བྷིཀྑུནོ ཨུཔོསཐཾ ཋཔེཏི, པཝཱརཎཾ ཋཔེཏི, སཝཙནཱིཡཾ ཀརོཏི, ཨནུཝཱདཾ པཊྛཔེཏི, ཨོཀཱསཾ ཀཱརེཏི, ཙོདེཏི, སཱརེཏི, བྷིཀྑཱུཧི སམྤཡོཛེཏི – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ནཔྤཊིཔྤསྶམྦྷེཏབྦཾ།
‘‘Aṭṭhahi, bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti, bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ.
ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨེ
Āpattiyā appaṭikamme ukkhepanīyakamme
ནཔྤཊིཔྤསྶམྦྷེཏབྦཏེཙཏྟཱལཱིསཀཾ ནིཊྛིཏཾ།
Nappaṭippassambhetabbatecattālīsakaṃ niṭṭhitaṃ.
Footnotes:
