| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
நஸம்மாவத்தனாதி³கதா²
Nasammāvattanādikathā
68. ந ஸம்மா வத்தந்தீதி யதா²பஞ்ஞத்தங் உபஜ்ஜா²யவத்தங் ந பூரெந்தி. யோ ந ஸம்மா வத்தெய்யாதி யோ யதா²பஞ்ஞத்தங் வத்தங் ந பூரெய்ய; ஸோ து³க்கடங் ஆபஜ்ஜதீதி அத்தோ². பணாமேதப்³போ³தி அபஸாதே³தப்³போ³. ந அதி⁴மத்தங் பேமங் ஹோதீதி உபஜ்ஜா²யம்ஹி அதி⁴மத்தங் கே³ஹஸ்ஸிதபேமங் ந ஹோதி. நாதி⁴மத்தா பா⁴வனா ஹோதீதி அதி⁴மத்தா மெத்தாபா⁴வனா ந ஹோதி; வுத்தபடிபக்க²னயேன ஸுக்கபக்கோ² வேதி³தப்³போ³. அலங் பணாமேதுந்தி யுத்தோ பணாமேதுங்.
68.Na sammā vattantīti yathāpaññattaṃ upajjhāyavattaṃ na pūrenti. Yo na sammā vatteyyāti yo yathāpaññattaṃ vattaṃ na pūreyya; so dukkaṭaṃ āpajjatīti attho. Paṇāmetabboti apasādetabbo. Na adhimattaṃ pemaṃ hotīti upajjhāyamhi adhimattaṃ gehassitapemaṃ na hoti. Nādhimattābhāvanā hotīti adhimattā mettābhāvanā na hoti; vuttapaṭipakkhanayena sukkapakkho veditabbo. Alaṃ paṇāmetunti yutto paṇāmetuṃ.
அப்பணாமெந்தோ உபஜ்ஜா²யோ ஸாதிஸாரோ ஹோதீதி ஸதோ³ஸோ ஹோதி, ஆபத்திங் ஆபஜ்ஜதி; தஸ்மா ந ஸம்மா வத்தந்தோ பணாமேதப்³போ³வ. ந ஸம்மாவத்தனாய ச யாவ சீவரரஜனங் தாவ வத்தே அகரியமானே உபஜ்ஜா²யஸ்ஸ பரிஹானி ஹோதி. தஸ்மா தங் அகரொந்தஸ்ஸ நிஸ்ஸயமுத்தகஸ்ஸாபி அமுத்தகஸ்ஸாபி ஆபத்தியேவ. ஏகச்சஸ்ஸ பத்ததா³னதோ பட்டா²ய அமுத்தகனிஸ்ஸயஸ்ஸேவ ஆபத்தி.
Appaṇāmento upajjhāyo sātisāro hotīti sadoso hoti, āpattiṃ āpajjati; tasmā na sammā vattanto paṇāmetabbova. Na sammāvattanāya ca yāva cīvararajanaṃ tāva vatte akariyamāne upajjhāyassa parihāni hoti. Tasmā taṃ akarontassa nissayamuttakassāpi amuttakassāpi āpattiyeva. Ekaccassa pattadānato paṭṭhāya amuttakanissayasseva āpatti.
ஸத்³தி⁴விஹாரிகா ஸம்மா வத்தந்தி, உபஜ்ஜா²யோ ஸம்மா ந வத்ததி, உபஜ்ஜா²யஸ்ஸ ஆபத்தி. உபஜ்ஜா²யோ ஸம்மா வத்ததி, ஸத்³தி⁴விஹாரிகா ஸம்மா ந வத்தந்தி, தேஸங் ஆபத்தி. உபஜ்ஜா²யே வத்தங் ஸாதி³யந்தே ஸத்³தி⁴விஹாரிகா ப³ஹுகாபி ஹொந்தி, ஸப்³பே³ஸங் ஆபத்தி. ஸசே உபஜ்ஜா²யோ ‘‘மய்ஹங் உபட்டா²கோ அத்தி², தும்ஹே அத்தனோ ஸஜ்ஜா²யமனஸிகாராதீ³ஸு யோக³ங் கரோதா²’’தி வத³தி, ஸத்³தி⁴விஹாரிகானங் அனாபத்தி. ஸசே உபஜ்ஜா²யோ ஸாதி³யனங் வா அஸாதி³யனங் வா ந ஜானாதி, பா³லோ ஹோதி, ஸத்³தி⁴விஹாரிகா ப³ஹுகா. தேஸு ஏகோ வத்தஸம்பன்னோ பி⁴க்கு² ‘‘உபஜ்ஜா²யஸ்ஸ கிச்சங் அஹங் கரிஸ்ஸாமி, தும்ஹே அப்பொஸ்ஸுக்கா விஹரதா²’’தி ஏவஞ்சே அத்தனோ பா⁴ரங் கத்வா இதரே விஸ்ஸஜ்ஜேதி, தஸ்ஸ பா⁴ரகரணதோ பட்டா²ய தேஸங் அனாபத்தி.
Saddhivihārikā sammā vattanti, upajjhāyo sammā na vattati, upajjhāyassa āpatti. Upajjhāyo sammā vattati, saddhivihārikā sammā na vattanti, tesaṃ āpatti. Upajjhāye vattaṃ sādiyante saddhivihārikā bahukāpi honti, sabbesaṃ āpatti. Sace upajjhāyo ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikānaṃ anāpatti. Sace upajjhāyo sādiyanaṃ vā asādiyanaṃ vā na jānāti, bālo hoti, saddhivihārikā bahukā. Tesu eko vattasampanno bhikkhu ‘‘upajjhāyassa kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti.
நஸம்மாவத்தனாதி³கதா² நிட்டி²தா.
Nasammāvattanādikathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 17. பணாமிதகதா² • 17. Paṇāmitakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / நஸம்மாவத்தனாதி³கதா² • Nasammāvattanādikathā
