| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
நஸம்மாவத்தனாதி³கதா²
Nasammāvattanādikathā
68. உபஜ்ஜா²யவத்தந்தி உபஜ்ஜா²யம்ஹி வத்திதப்³ப³ங் வத்தங். ஸோதி ஸத்³தி⁴விஹாரிகோ. து³க்கடங் ஆபஜ்ஜதீதி அஸ்ஸ, ஸோ வா து³க்கடங் ஆபஜ்ஜதீதி யோஜனா. பணாமேதப்³போ³தி எத்த² பபுப்³ப³ நமுதா⁴து அத்த²பகரணாதி³வஸேன இத⁴ அபஸாத³னத்தோ²தி ஆஹ ‘‘அபஸாதே³தப்³போ³’’தி. அதி⁴மத்தந்தி அதி⁴கப்பமாணங். கே³ஹஸிதபேமந்தி மெத்தாஸினேஹங். வுத்தபடிபக்க²னயேனாதி கண்ஹபக்கே² வுத்தேன படிபக்கே²ன நயேன. அலங் பணாமேதுந்தி எத்த² அலங்ஸத்³த³ஸ்ஸ அரஹத்த²படிக்கி²த்தேஸு த்³வீஸு அத்தே²ஸு அரஹத்தோ²தி ஆஹ ‘‘யுத்தோ பணாமேது’’ந்தி.
68.Upajjhāyavattanti upajjhāyamhi vattitabbaṃ vattaṃ. Soti saddhivihāriko. Dukkaṭaṃ āpajjatīti assa, so vā dukkaṭaṃ āpajjatīti yojanā. Paṇāmetabboti ettha papubba namudhātu atthapakaraṇādivasena idha apasādanatthoti āha ‘‘apasādetabbo’’ti. Adhimattanti adhikappamāṇaṃ. Gehasitapemanti mettāsinehaṃ. Vuttapaṭipakkhanayenāti kaṇhapakkhe vuttena paṭipakkhena nayena. Alaṃ paṇāmetunti ettha alaṃsaddassa arahatthapaṭikkhittesu dvīsu atthesu arahatthoti āha ‘‘yutto paṇāmetu’’nti.
ஸாதிஸாரோ ஹோதீதி எத்த² பகதிபா⁴வங் அதிக்கமித்வா ஸரணங் பவத்தனங் அதிஸாரோ, தோ³ஸோ. ஸங்விஜ்ஜதி ஸோ ஏதஸ்ஸாதி ஸாதிஸாரோதி த³ஸ்ஸெந்தோ ஆஹ ‘‘ஸதோ³ஸோ ஹோதீ’’தி. தஸ்ஸத்த²ங் த³ஸ்ஸேதுங் வுத்தங் ‘‘ஆபத்திங் ஆபஜ்ஜதீ’’தி. ஆபத்திந்தி து³க்கடாபத்திங். தந்தி வத்தங்.
Sātisāro hotīti ettha pakatibhāvaṃ atikkamitvā saraṇaṃ pavattanaṃ atisāro, doso. Saṃvijjati so etassāti sātisāroti dassento āha ‘‘sadoso hotī’’ti. Tassatthaṃ dassetuṃ vuttaṃ ‘‘āpattiṃ āpajjatī’’ti. Āpattinti dukkaṭāpattiṃ. Tanti vattaṃ.
தேஸந்தி ஸத்³தி⁴விஹாரிகானங். வத்தந்தி ப³ஹுகானங் ஸத்³தி⁴விஹாரிகானங் வத்தங். ஸாதி³யனங் வா…பே॰… பா³லோ ஹோதீதி எத்த² பா³லஸ்ஸ காரணங் த³ஸ்ஸேதுங் வுத்தங் ‘‘ஸாதி³யனங் வா அஸாதி³யனங் வா ந ஜானாதீ’’தி. ஸாதி³யனஸ்ஸ வா அஸாதி³யனஸ்ஸ வா அஜானநத்தா பா³லோ ஹோதீதி வுத்தங் ஹோதி. அஜானநஸ்ஸ காரணங் த³ஸ்ஸேதுங் வுத்தங் ‘‘பா³லோ ஹோதீ’’தி. பா³லத்தா ஸாதி³யனங் வா அஸாதி³யனங் வா ந ஜானாதீதி வுத்தங் ஹோதி. தேஸூதி ப³ஹுகேஸு ஸத்³தி⁴விஹாரிகேஸு. தஸ்ஸாதி வத்தஸம்பன்னபி⁴க்கு²ஸ்ஸ. தேஸந்தி இதரேஸங் ஸத்³தி⁴விஹாரிகானங்.
Tesanti saddhivihārikānaṃ. Vattanti bahukānaṃ saddhivihārikānaṃ vattaṃ. Sādiyanaṃ vā…pe… bālo hotīti ettha bālassa kāraṇaṃ dassetuṃ vuttaṃ ‘‘sādiyanaṃ vā asādiyanaṃ vā na jānātī’’ti. Sādiyanassa vā asādiyanassa vā ajānanattā bālo hotīti vuttaṃ hoti. Ajānanassa kāraṇaṃ dassetuṃ vuttaṃ ‘‘bālo hotī’’ti. Bālattā sādiyanaṃ vā asādiyanaṃ vā na jānātīti vuttaṃ hoti. Tesūti bahukesu saddhivihārikesu. Tassāti vattasampannabhikkhussa. Tesanti itaresaṃ saddhivihārikānaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 17. பணாமிதகதா² • 17. Paṇāmitakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / நஸம்மாவத்தனாதி³கதா² • Nasammāvattanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நஸம்மாவத்தனாதி³கதா²வண்ணனா • Nasammāvattanādikathāvaṇṇanā
