| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
নসম্মাৰত্তনাদিকথা
Nasammāvattanādikathā
৬৮. ন সম্মা ৰত্তন্তীতি যথাপঞ্ঞত্তং উপজ্ঝাযৰত্তং ন পূরেন্তি। যো ন সম্মা ৰত্তেয্যাতি যো যথাপঞ্ঞত্তং ৰত্তং ন পূরেয্য; সো দুক্কটং আপজ্জতীতি অত্থো। পণামেতব্বোতি অপসাদেতব্বো। ন অধিমত্তং পেমং হোতীতি উপজ্ঝাযম্হি অধিমত্তং গেহস্সিতপেমং ন হোতি। নাধিমত্তা ভাৰনা হোতীতি অধিমত্তা মেত্তাভাৰনা ন হোতি; ৰুত্তপটিপক্খনযেন সুক্কপক্খো ৰেদিতব্বো। অলং পণামেতুন্তি যুত্তো পণামেতুং।
68.Na sammā vattantīti yathāpaññattaṃ upajjhāyavattaṃ na pūrenti. Yo na sammā vatteyyāti yo yathāpaññattaṃ vattaṃ na pūreyya; so dukkaṭaṃ āpajjatīti attho. Paṇāmetabboti apasādetabbo. Na adhimattaṃ pemaṃ hotīti upajjhāyamhi adhimattaṃ gehassitapemaṃ na hoti. Nādhimattābhāvanā hotīti adhimattā mettābhāvanā na hoti; vuttapaṭipakkhanayena sukkapakkho veditabbo. Alaṃ paṇāmetunti yutto paṇāmetuṃ.
অপ্পণামেন্তো উপজ্ঝাযো সাতিসারো হোতীতি সদোসো হোতি, আপত্তিং আপজ্জতি; তস্মা ন সম্মা ৰত্তন্তো পণামেতব্বোৰ। ন সম্মাৰত্তনায চ যাৰ চীৰররজনং তাৰ ৰত্তে অকরিযমানে উপজ্ঝাযস্স পরিহানি হোতি। তস্মা তং অকরোন্তস্স নিস্সযমুত্তকস্সাপি অমুত্তকস্সাপি আপত্তিযেৰ। একচ্চস্স পত্তদানতো পট্ঠায অমুত্তকনিস্সযস্সেৰ আপত্তি।
Appaṇāmento upajjhāyo sātisāro hotīti sadoso hoti, āpattiṃ āpajjati; tasmā na sammā vattanto paṇāmetabbova. Na sammāvattanāya ca yāva cīvararajanaṃ tāva vatte akariyamāne upajjhāyassa parihāni hoti. Tasmā taṃ akarontassa nissayamuttakassāpi amuttakassāpi āpattiyeva. Ekaccassa pattadānato paṭṭhāya amuttakanissayasseva āpatti.
সদ্ধিৰিহারিকা সম্মা ৰত্তন্তি, উপজ্ঝাযো সম্মা ন ৰত্ততি, উপজ্ঝাযস্স আপত্তি। উপজ্ঝাযো সম্মা ৰত্ততি, সদ্ধিৰিহারিকা সম্মা ন ৰত্তন্তি, তেসং আপত্তি। উপজ্ঝাযে ৰত্তং সাদিযন্তে সদ্ধিৰিহারিকা বহুকাপি হোন্তি, সব্বেসং আপত্তি। সচে উপজ্ঝাযো ‘‘ময্হং উপট্ঠাকো অত্থি, তুম্হে অত্তনো সজ্ঝাযমনসিকারাদীসু যোগং করোথা’’তি ৰদতি, সদ্ধিৰিহারিকানং অনাপত্তি। সচে উপজ্ঝাযো সাদিযনং ৰা অসাদিযনং ৰা ন জানাতি, বালো হোতি, সদ্ধিৰিহারিকা বহুকা। তেসু একো ৰত্তসম্পন্নো ভিক্খু ‘‘উপজ্ঝাযস্স কিচ্চং অহং করিস্সামি, তুম্হে অপ্পোস্সুক্কা ৰিহরথা’’তি এৰঞ্চে অত্তনো ভারং কত্ৰা ইতরে ৰিস্সজ্জেতি, তস্স ভারকরণতো পট্ঠায তেসং অনাপত্তি।
Saddhivihārikā sammā vattanti, upajjhāyo sammā na vattati, upajjhāyassa āpatti. Upajjhāyo sammā vattati, saddhivihārikā sammā na vattanti, tesaṃ āpatti. Upajjhāye vattaṃ sādiyante saddhivihārikā bahukāpi honti, sabbesaṃ āpatti. Sace upajjhāyo ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikānaṃ anāpatti. Sace upajjhāyo sādiyanaṃ vā asādiyanaṃ vā na jānāti, bālo hoti, saddhivihārikā bahukā. Tesu eko vattasampanno bhikkhu ‘‘upajjhāyassa kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti.
নসম্মাৰত্তনাদিকথা নিট্ঠিতা।
Nasammāvattanādikathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৭. পণামিতকথা • 17. Paṇāmitakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / নসম্মাৰত্তনাদিকথাৰণ্ণনা • Nasammāvattanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / নসম্মাৰত্তনাদিকথাৰণ্ণনা • Nasammāvattanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / নসম্মাৰত্তনাদিকথাৰণ্ণনা • Nasammāvattanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / নসম্মাৰত্তনাদিকথা • Nasammāvattanādikathā
