| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ನಸಮ್ಮಾವತ್ತನಾದಿಕಥಾ
Nasammāvattanādikathā
೬೮. ನ ಸಮ್ಮಾ ವತ್ತನ್ತೀತಿ ಯಥಾಪಞ್ಞತ್ತಂ ಉಪಜ್ಝಾಯವತ್ತಂ ನ ಪೂರೇನ್ತಿ। ಯೋ ನ ಸಮ್ಮಾ ವತ್ತೇಯ್ಯಾತಿ ಯೋ ಯಥಾಪಞ್ಞತ್ತಂ ವತ್ತಂ ನ ಪೂರೇಯ್ಯ; ಸೋ ದುಕ್ಕಟಂ ಆಪಜ್ಜತೀತಿ ಅತ್ಥೋ। ಪಣಾಮೇತಬ್ಬೋತಿ ಅಪಸಾದೇತಬ್ಬೋ। ನ ಅಧಿಮತ್ತಂ ಪೇಮಂ ಹೋತೀತಿ ಉಪಜ್ಝಾಯಮ್ಹಿ ಅಧಿಮತ್ತಂ ಗೇಹಸ್ಸಿತಪೇಮಂ ನ ಹೋತಿ। ನಾಧಿಮತ್ತಾ ಭಾವನಾ ಹೋತೀತಿ ಅಧಿಮತ್ತಾ ಮೇತ್ತಾಭಾವನಾ ನ ಹೋತಿ; ವುತ್ತಪಟಿಪಕ್ಖನಯೇನ ಸುಕ್ಕಪಕ್ಖೋ ವೇದಿತಬ್ಬೋ। ಅಲಂ ಪಣಾಮೇತುನ್ತಿ ಯುತ್ತೋ ಪಣಾಮೇತುಂ।
68.Na sammā vattantīti yathāpaññattaṃ upajjhāyavattaṃ na pūrenti. Yo na sammā vatteyyāti yo yathāpaññattaṃ vattaṃ na pūreyya; so dukkaṭaṃ āpajjatīti attho. Paṇāmetabboti apasādetabbo. Na adhimattaṃ pemaṃ hotīti upajjhāyamhi adhimattaṃ gehassitapemaṃ na hoti. Nādhimattābhāvanā hotīti adhimattā mettābhāvanā na hoti; vuttapaṭipakkhanayena sukkapakkho veditabbo. Alaṃ paṇāmetunti yutto paṇāmetuṃ.
ಅಪ್ಪಣಾಮೇನ್ತೋ ಉಪಜ್ಝಾಯೋ ಸಾತಿಸಾರೋ ಹೋತೀತಿ ಸದೋಸೋ ಹೋತಿ, ಆಪತ್ತಿಂ ಆಪಜ್ಜತಿ; ತಸ್ಮಾ ನ ಸಮ್ಮಾ ವತ್ತನ್ತೋ ಪಣಾಮೇತಬ್ಬೋವ। ನ ಸಮ್ಮಾವತ್ತನಾಯ ಚ ಯಾವ ಚೀವರರಜನಂ ತಾವ ವತ್ತೇ ಅಕರಿಯಮಾನೇ ಉಪಜ್ಝಾಯಸ್ಸ ಪರಿಹಾನಿ ಹೋತಿ। ತಸ್ಮಾ ತಂ ಅಕರೋನ್ತಸ್ಸ ನಿಸ್ಸಯಮುತ್ತಕಸ್ಸಾಪಿ ಅಮುತ್ತಕಸ್ಸಾಪಿ ಆಪತ್ತಿಯೇವ। ಏಕಚ್ಚಸ್ಸ ಪತ್ತದಾನತೋ ಪಟ್ಠಾಯ ಅಮುತ್ತಕನಿಸ್ಸಯಸ್ಸೇವ ಆಪತ್ತಿ।
Appaṇāmento upajjhāyo sātisāro hotīti sadoso hoti, āpattiṃ āpajjati; tasmā na sammā vattanto paṇāmetabbova. Na sammāvattanāya ca yāva cīvararajanaṃ tāva vatte akariyamāne upajjhāyassa parihāni hoti. Tasmā taṃ akarontassa nissayamuttakassāpi amuttakassāpi āpattiyeva. Ekaccassa pattadānato paṭṭhāya amuttakanissayasseva āpatti.
ಸದ್ಧಿವಿಹಾರಿಕಾ ಸಮ್ಮಾ ವತ್ತನ್ತಿ, ಉಪಜ್ಝಾಯೋ ಸಮ್ಮಾ ನ ವತ್ತತಿ, ಉಪಜ್ಝಾಯಸ್ಸ ಆಪತ್ತಿ। ಉಪಜ್ಝಾಯೋ ಸಮ್ಮಾ ವತ್ತತಿ, ಸದ್ಧಿವಿಹಾರಿಕಾ ಸಮ್ಮಾ ನ ವತ್ತನ್ತಿ, ತೇಸಂ ಆಪತ್ತಿ। ಉಪಜ್ಝಾಯೇ ವತ್ತಂ ಸಾದಿಯನ್ತೇ ಸದ್ಧಿವಿಹಾರಿಕಾ ಬಹುಕಾಪಿ ಹೋನ್ತಿ, ಸಬ್ಬೇಸಂ ಆಪತ್ತಿ। ಸಚೇ ಉಪಜ್ಝಾಯೋ ‘‘ಮಯ್ಹಂ ಉಪಟ್ಠಾಕೋ ಅತ್ಥಿ, ತುಮ್ಹೇ ಅತ್ತನೋ ಸಜ್ಝಾಯಮನಸಿಕಾರಾದೀಸು ಯೋಗಂ ಕರೋಥಾ’’ತಿ ವದತಿ, ಸದ್ಧಿವಿಹಾರಿಕಾನಂ ಅನಾಪತ್ತಿ। ಸಚೇ ಉಪಜ್ಝಾಯೋ ಸಾದಿಯನಂ ವಾ ಅಸಾದಿಯನಂ ವಾ ನ ಜಾನಾತಿ, ಬಾಲೋ ಹೋತಿ, ಸದ್ಧಿವಿಹಾರಿಕಾ ಬಹುಕಾ। ತೇಸು ಏಕೋ ವತ್ತಸಮ್ಪನ್ನೋ ಭಿಕ್ಖು ‘‘ಉಪಜ್ಝಾಯಸ್ಸ ಕಿಚ್ಚಂ ಅಹಂ ಕರಿಸ್ಸಾಮಿ, ತುಮ್ಹೇ ಅಪ್ಪೋಸ್ಸುಕ್ಕಾ ವಿಹರಥಾ’’ತಿ ಏವಞ್ಚೇ ಅತ್ತನೋ ಭಾರಂ ಕತ್ವಾ ಇತರೇ ವಿಸ್ಸಜ್ಜೇತಿ, ತಸ್ಸ ಭಾರಕರಣತೋ ಪಟ್ಠಾಯ ತೇಸಂ ಅನಾಪತ್ತಿ।
Saddhivihārikā sammā vattanti, upajjhāyo sammā na vattati, upajjhāyassa āpatti. Upajjhāyo sammā vattati, saddhivihārikā sammā na vattanti, tesaṃ āpatti. Upajjhāye vattaṃ sādiyante saddhivihārikā bahukāpi honti, sabbesaṃ āpatti. Sace upajjhāyo ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikānaṃ anāpatti. Sace upajjhāyo sādiyanaṃ vā asādiyanaṃ vā na jānāti, bālo hoti, saddhivihārikā bahukā. Tesu eko vattasampanno bhikkhu ‘‘upajjhāyassa kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti.
ನಸಮ್ಮಾವತ್ತನಾದಿಕಥಾ ನಿಟ್ಠಿತಾ।
Nasammāvattanādikathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೭. ಪಣಾಮಿತಕಥಾ • 17. Paṇāmitakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ನಸಮ್ಮಾವತ್ತನಾದಿಕಥಾವಣ್ಣನಾ • Nasammāvattanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ನಸಮ್ಮಾವತ್ತನಾದಿಕಥಾವಣ್ಣನಾ • Nasammāvattanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ನಸಮ್ಮಾವತ್ತನಾದಿಕಥಾವಣ್ಣನಾ • Nasammāvattanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ನಸಮ್ಮಾವತ್ತನಾದಿಕಥಾ • Nasammāvattanādikathā
