| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
නසම්‌මාවත්‌තනාදිකථා
Nasammāvattanādikathā
68. න සම්‌මා වත්‌තන්‌තීති යථාපඤ්‌ඤත්‌තං උපජ්‌ඣායවත්‌තං න පූරෙන්‌ති. යො න සම්‌මා වත්‌තෙය්‍යාති යො යථාපඤ්‌ඤත්‌තං වත්‌තං න පූරෙය්‍ය; සො දුක්‌කටං ආපජ්‌ජතීති අත්‌ථො. පණාමෙතබ්‌බොති අපසාදෙතබ්‌බො. න අධිමත්‌තං පෙමං හොතීති උපජ්‌ඣායම්‌හි අධිමත්‌තං ගෙහස්‌සිතපෙමං න හොති. නාධිමත්‌තා භාවනා හොතීති අධිමත්‌තා මෙත්‌තාභාවනා න හොති; වුත්‌තපටිපක්‌ඛනයෙන සුක්‌කපක්‌ඛො වෙදිතබ්‌බො. අලං පණාමෙතුන්‌ති යුත්‌තො පණාමෙතුං.
68.Na sammā vattantīti yathāpaññattaṃ upajjhāyavattaṃ na pūrenti. Yo na sammā vatteyyāti yo yathāpaññattaṃ vattaṃ na pūreyya; so dukkaṭaṃ āpajjatīti attho. Paṇāmetabboti apasādetabbo. Na adhimattaṃ pemaṃ hotīti upajjhāyamhi adhimattaṃ gehassitapemaṃ na hoti. Nādhimattābhāvanā hotīti adhimattā mettābhāvanā na hoti; vuttapaṭipakkhanayena sukkapakkho veditabbo. Alaṃ paṇāmetunti yutto paṇāmetuṃ.
අප්‌පණාමෙන්‌තො උපජ්‌ඣායො සාතිසාරො හොතීති සදොසො හොති, ආපත්‌තිං ආපජ්‌ජති; තස්‌මා න සම්‌මා වත්‌තන්‌තො පණාමෙතබ්‌බොව. න සම්‌මාවත්‌තනාය ච යාව චීවරරජනං තාව වත්‌තෙ අකරියමානෙ උපජ්‌ඣායස්‌ස පරිහානි හොති. තස්‌මා තං අකරොන්‌තස්‌ස නිස්‌සයමුත්‌තකස්‌සාපි අමුත්‌තකස්‌සාපි ආපත්‌තියෙව. එකච්‌චස්‌ස පත්‌තදානතො පට්‌ඨාය අමුත්‌තකනිස්‌සයස්‌සෙව ආපත්‌ති.
Appaṇāmento upajjhāyo sātisāro hotīti sadoso hoti, āpattiṃ āpajjati; tasmā na sammā vattanto paṇāmetabbova. Na sammāvattanāya ca yāva cīvararajanaṃ tāva vatte akariyamāne upajjhāyassa parihāni hoti. Tasmā taṃ akarontassa nissayamuttakassāpi amuttakassāpi āpattiyeva. Ekaccassa pattadānato paṭṭhāya amuttakanissayasseva āpatti.
සද්‌ධිවිහාරිකා සම්‌මා වත්‌තන්‌ති, උපජ්‌ඣායො සම්‌මා න වත්‌තති, උපජ්‌ඣායස්‌ස ආපත්‌ති. උපජ්‌ඣායො සම්‌මා වත්‌තති, සද්‌ධිවිහාරිකා සම්‌මා න වත්‌තන්‌ති, තෙසං ආපත්‌ති. උපජ්‌ඣායෙ වත්‌තං සාදියන්‌තෙ සද්‌ධිවිහාරිකා බහුකාපි හොන්‌ති, සබ්‌බෙසං ආපත්‌ති. සචෙ උපජ්‌ඣායො ‘‘මය්‌හං උපට්‌ඨාකො අත්‌ථි, තුම්‌හෙ අත්‌තනො සජ්‌ඣායමනසිකාරාදීසු යොගං කරොථා’’ති වදති, සද්‌ධිවිහාරිකානං අනාපත්‌ති. සචෙ උපජ්‌ඣායො සාදියනං වා අසාදියනං වා න ජානාති, බාලො හොති, සද්‌ධිවිහාරිකා බහුකා. තෙසු එකො වත්‌තසම්‌පන්‌නො භික්‌ඛු ‘‘උපජ්‌ඣායස්‌ස කිච්‌චං අහං කරිස්‌සාමි, තුම්‌හෙ අප්‌පොස්‌සුක්‌කා විහරථා’’ති එවඤ්‌චෙ අත්‌තනො භාරං කත්‌වා ඉතරෙ විස්‌සජ්‌ජෙති, තස්‌ස භාරකරණතො පට්‌ඨාය තෙසං අනාපත්‌ති.
Saddhivihārikā sammā vattanti, upajjhāyo sammā na vattati, upajjhāyassa āpatti. Upajjhāyo sammā vattati, saddhivihārikā sammā na vattanti, tesaṃ āpatti. Upajjhāye vattaṃ sādiyante saddhivihārikā bahukāpi honti, sabbesaṃ āpatti. Sace upajjhāyo ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikānaṃ anāpatti. Sace upajjhāyo sādiyanaṃ vā asādiyanaṃ vā na jānāti, bālo hoti, saddhivihārikā bahukā. Tesu eko vattasampanno bhikkhu ‘‘upajjhāyassa kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti.
නසම්‌මාවත්‌තනාදිකථා නිට්‌ඨිතා.
Nasammāvattanādikathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 17. පණාමිතකථා • 17. Paṇāmitakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / නසම්‌මාවත්‌තනාදිකථා • Nasammāvattanādikathā
