| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
නසම්‌මාවත්‌තනාදිකථා
Nasammāvattanādikathā
68. උපජ්‌ඣායවත්‌තන්‌ති උපජ්‌ඣායම්‌හි වත්‌තිතබ්‌බං වත්‌තං. සොති සද්‌ධිවිහාරිකො. දුක්‌කටං ආපජ්‌ජතීති අස්‌ස, සො වා දුක්‌කටං ආපජ්‌ජතීති යොජනා. පණාමෙතබ්‌බොති එත්‌ථ පපුබ්‌බ නමුධාතු අත්‌ථපකරණාදිවසෙන ඉධ අපසාදනත්‌ථොති ආහ ‘‘අපසාදෙතබ්‌බො’’ති. අධිමත්‌තන්‌ති අධිකප්‌පමාණං. ගෙහසිතපෙමන්‌ති මෙත්‌තාසිනෙහං. වුත්‌තපටිපක්‌ඛනයෙනාති කණ්‌හපක්‌ඛෙ වුත්‌තෙන පටිපක්‌ඛෙන නයෙන. අලං පණාමෙතුන්‌ති එත්‌ථ අලංසද්‌දස්‌ස අරහත්‌ථපටික්‌ඛිත්‌තෙසු ද්‌වීසු අත්‌ථෙසු අරහත්‌ථොති ආහ ‘‘යුත්‌තො පණාමෙතු’’න්‌ති.
68.Upajjhāyavattanti upajjhāyamhi vattitabbaṃ vattaṃ. Soti saddhivihāriko. Dukkaṭaṃ āpajjatīti assa, so vā dukkaṭaṃ āpajjatīti yojanā. Paṇāmetabboti ettha papubba namudhātu atthapakaraṇādivasena idha apasādanatthoti āha ‘‘apasādetabbo’’ti. Adhimattanti adhikappamāṇaṃ. Gehasitapemanti mettāsinehaṃ. Vuttapaṭipakkhanayenāti kaṇhapakkhe vuttena paṭipakkhena nayena. Alaṃ paṇāmetunti ettha alaṃsaddassa arahatthapaṭikkhittesu dvīsu atthesu arahatthoti āha ‘‘yutto paṇāmetu’’nti.
සාතිසාරො හොතීති එත්‌ථ පකතිභාවං අතික්‌කමිත්‌වා සරණං පවත්‌තනං අතිසාරො, දොසො. සංවිජ්‌ජති සො එතස්‌සාති සාතිසාරොති දස්‌සෙන්‌තො ආහ ‘‘සදොසො හොතී’’ති. තස්‌සත්‌ථං දස්‌සෙතුං වුත්‌තං ‘‘ආපත්‌තිං ආපජ්‌ජතී’’ති. ආපත්‌තින්‌ති දුක්‌කටාපත්‌තිං. තන්‌ති වත්‌තං.
Sātisāro hotīti ettha pakatibhāvaṃ atikkamitvā saraṇaṃ pavattanaṃ atisāro, doso. Saṃvijjati so etassāti sātisāroti dassento āha ‘‘sadoso hotī’’ti. Tassatthaṃ dassetuṃ vuttaṃ ‘‘āpattiṃ āpajjatī’’ti. Āpattinti dukkaṭāpattiṃ. Tanti vattaṃ.
තෙසන්‌ති සද්‌ධිවිහාරිකානං. වත්‌තන්‌ති බහුකානං සද්‌ධිවිහාරිකානං වත්‌තං. සාදියනං වා…පෙ.… බාලො හොතීති එත්‌ථ බාලස්‌ස කාරණං දස්‌සෙතුං වුත්‌තං ‘‘සාදියනං වා අසාදියනං වා න ජානාතී’’ති. සාදියනස්‌ස වා අසාදියනස්‌ස වා අජානනත්‌තා බාලො හොතීති වුත්‌තං හොති. අජානනස්‌ස කාරණං දස්‌සෙතුං වුත්‌තං ‘‘බාලො හොතී’’ති. බාලත්‌තා සාදියනං වා අසාදියනං වා න ජානාතීති වුත්‌තං හොති. තෙසූති බහුකෙසු සද්‌ධිවිහාරිකෙසු. තස්‌සාති වත්‌තසම්‌පන්‌නභික්‌ඛුස්‌ස. තෙසන්‌ති ඉතරෙසං සද්‌ධිවිහාරිකානං.
Tesanti saddhivihārikānaṃ. Vattanti bahukānaṃ saddhivihārikānaṃ vattaṃ. Sādiyanaṃ vā…pe… bālo hotīti ettha bālassa kāraṇaṃ dassetuṃ vuttaṃ ‘‘sādiyanaṃ vā asādiyanaṃ vā na jānātī’’ti. Sādiyanassa vā asādiyanassa vā ajānanattā bālo hotīti vuttaṃ hoti. Ajānanassa kāraṇaṃ dassetuṃ vuttaṃ ‘‘bālo hotī’’ti. Bālattā sādiyanaṃ vā asādiyanaṃ vā na jānātīti vuttaṃ hoti. Tesūti bahukesu saddhivihārikesu. Tassāti vattasampannabhikkhussa. Tesanti itaresaṃ saddhivihārikānaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 17. පණාමිතකථා • 17. Paṇāmitakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / නසම්‌මාවත්‌තනාදිකථා • Nasammāvattanādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නසම්‌මාවත්‌තනාදිකථාවණ්‌ණනා • Nasammāvattanādikathāvaṇṇanā
