| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. நஸந்திஸுத்தவண்ணனா
4. Nasantisuttavaṇṇanā
34. சதுத்தே² கமனீயானீதி ரூபாதீ³னி இட்டா²ரம்மணானி. அபுனாக³மனங் அனாக³ந்தா புரிஸோ மச்சுதெ⁴ய்யாதி தேபூ⁴மகவட்டஸங்கா²தா மச்சுதெ⁴ய்யா அபுனாக³மனஸங்கா²தங் நிப்³பா³னங் அனாக³ந்தா. நிப்³பா³னஞ்ஹி ஸத்தா ந புனாக³ச்ச²ந்தி, தஸ்மா தங் அபுனாக³மனந்தி வுச்சதி. தங் காமேஸு ப³த்³தோ⁴ ச பமத்தோ ச அனாக³ந்தா நாம ஹோதி, ஸோ தங் பாபுணிதுங் ந ஸக்கோதி, தஸ்மா ஏவமாஹ. ச²ந்த³ஜந்தி தண்ஹாச²ந்த³தோ ஜாதங். அக⁴ந்தி பஞ்சக்க²ந்த⁴து³க்க²ங். து³தியபத³ங் தஸ்ஸேவ வேவசனங். ச²ந்த³வினயா அக⁴வினயோதி தண்ஹாவினயேன பஞ்சக்க²ந்த⁴வினயோ . அக⁴வினயா து³க்க²வினயோதி பஞ்சக்க²ந்த⁴வினயேன வட்டது³க்க²ங் வினீதமேவ ஹோதி. சித்ரானீதி ஆரம்மணசித்தானி. ஸங்கப்பராகோ³தி ஸங்கப்பிதராகோ³. ஏவமெத்த² வத்து²காமங் படிக்கி²பித்வா கிலேஸகாமோ காமோதி வுத்தோ. அயங் பனத்தோ² பஸூரஸுத்தேன (ஸு॰ நி॰ 830 ஆத³யோ) விபா⁴வேதப்³போ³. பஸூரபரிப்³பா³ஜகோ ஹி தே²ரேன ‘‘ஸங்கப்பராகோ³ புரிஸஸ்ஸ காமோ’’தி வுத்தே –
34. Catutthe kamanīyānīti rūpādīni iṭṭhārammaṇāni. Apunāgamanaṃ anāgantā puriso maccudheyyāti tebhūmakavaṭṭasaṅkhātā maccudheyyā apunāgamanasaṅkhātaṃ nibbānaṃ anāgantā. Nibbānañhi sattā na punāgacchanti, tasmā taṃ apunāgamananti vuccati. Taṃ kāmesu baddho ca pamatto ca anāgantā nāma hoti, so taṃ pāpuṇituṃ na sakkoti, tasmā evamāha. Chandajanti taṇhāchandato jātaṃ. Aghanti pañcakkhandhadukkhaṃ. Dutiyapadaṃ tasseva vevacanaṃ. Chandavinayā aghavinayoti taṇhāvinayena pañcakkhandhavinayo . Aghavinayā dukkhavinayoti pañcakkhandhavinayena vaṭṭadukkhaṃ vinītameva hoti. Citrānīti ārammaṇacittāni. Saṅkapparāgoti saṅkappitarāgo. Evamettha vatthukāmaṃ paṭikkhipitvā kilesakāmo kāmoti vutto. Ayaṃ panattho pasūrasuttena (su. ni. 830 ādayo) vibhāvetabbo. Pasūraparibbājako hi therena ‘‘saṅkapparāgo purisassa kāmo’’ti vutte –
‘‘ந தே காமா யானி சித்ரானி லோகே,
‘‘Na te kāmā yāni citrāni loke,
ஸங்கப்பராக³ஞ்ச வதே³ஸி காமங்;
Saṅkapparāgañca vadesi kāmaṃ;
ஸங்கப்பயங் அகுஸலே விதக்கே,
Saṅkappayaṃ akusale vitakke,
பி⁴க்கூ²பி தே ஹேஹிந்தி காமபோ⁴கீ³’’தி. –
Bhikkhūpi te hehinti kāmabhogī’’ti. –
ஆஹ. அத² நங் தே²ரோ அவோச –
Āha. Atha naṃ thero avoca –
‘‘தே சே காமா யானி சித்ரானி லோகே,
‘‘Te ce kāmā yāni citrāni loke,
ஸங்கப்பராக³ங் ந வதே³ஸி காமங்;
Saṅkapparāgaṃ na vadesi kāmaṃ;
பஸ்ஸந்தோ ரூபானி மனோரமானி,
Passanto rūpāni manoramāni,
ஸத்தா²பி தே ஹேஹிதி காமபோ⁴கீ³.
Satthāpi te hehiti kāmabhogī.
ஸுணந்தோ ஸத்³தா³னி, கா⁴யந்தோ க³ந்தா⁴னி;
Suṇanto saddāni, ghāyanto gandhāni;
ஸாயந்தோ ரஸானி, பு²ஸந்தோ ப²ஸ்ஸானி மனோரமானி;
Sāyanto rasāni, phusanto phassāni manoramāni;
ஸத்தா²பி தே ஹேஹிதி காமபோ⁴கீ³’’தி.
Satthāpi te hehiti kāmabhogī’’ti.
அதெ²த்த² தீ⁴ராதி அத² ஏதேஸு ஆரம்மணேஸு பண்டி³தா ச²ந்த³ராக³ங் வினயந்தி. ஸங்யோஜனங் ஸப்³ப³ந்தி த³ஸவித⁴ம்பி ஸங்யோஜனங். அகிஞ்சனந்தி ராக³கிஞ்சனாதி³விரஹிதங். நானுபதந்தி து³க்கா²தி வட்டது³க்கா² பன தஸ்ஸ உபரி ந பதந்தி. இச்சாயஸ்மா மோக⁴ராஜாதி, ‘‘பஹாஸி ஸங்க²’’ந்தி கா³த²ங் ஸுத்வா தஸ்ஸங் பரிஸதி அனுஸந்தி⁴குஸலோ மோக⁴ராஜா நாம தே²ரோ ‘‘இமிஸ்ஸா கா³தா²ய அத்தோ² ந யதா²னுஸந்தி⁴ங் க³தோ’’தி சிந்தெத்வா யதா²னுஸந்தி⁴ங் க⁴டெந்தோ ஏவமாஹ. தத்த² இத⁴ வா ஹுரங் வாதி இத⁴லோகே வா பரலோகே வா. நருத்தமங் அத்த²சரங் நரானந்தி கிஞ்சாபி ஸப்³பே³ கீ²ணாஸவா நருத்தமா சேவ அத்த²சரா ச நரானங், தே²ரோ பன த³ஸப³லங் ஸந்தா⁴யேவமாஹ. யே தங் நமஸ்ஸந்தி பஸங்ஸியா தேதி யதி³ ததா²விமுத்தங் தே³வமனுஸ்ஸா நமஸ்ஸந்தி, அத² யே தங் ப⁴க³வந்தங் காயேன வா வாசாய வா அனுபடிபத்தியா வா நமஸ்ஸந்தி, தே கிங் பஸங்ஸியா, உதா³ஹு அபஸங்ஸியாதி. பி⁴க்கூ²தி மோக⁴ராஜத்தே²ரங் ஆலபதி. அஞ்ஞாய த⁴ம்மந்தி சதுஸச்சத⁴ம்மங் ஜானித்வா. ஸங்கா³திகா³ தேபி ப⁴வந்தீதி யே தங் காயேன வா வாசாய வா அனுபடிபத்தியா வா நமஸ்ஸந்தி. தே சதுஸச்சத⁴ம்மங் அஞ்ஞாய விசிகிச்ச²ங் பஹாய ஸங்கா³திகா³பி ஹொந்தி, பஸங்ஸியாபி ஹொந்தீதி. சதுத்த²ங்.
Athettha dhīrāti atha etesu ārammaṇesu paṇḍitā chandarāgaṃ vinayanti. Saṃyojanaṃ sabbanti dasavidhampi saṃyojanaṃ. Akiñcananti rāgakiñcanādivirahitaṃ. Nānupatanti dukkhāti vaṭṭadukkhā pana tassa upari na patanti. Iccāyasmāmogharājāti, ‘‘pahāsi saṅkha’’nti gāthaṃ sutvā tassaṃ parisati anusandhikusalo mogharājā nāma thero ‘‘imissā gāthāya attho na yathānusandhiṃ gato’’ti cintetvā yathānusandhiṃ ghaṭento evamāha. Tattha idha vā huraṃ vāti idhaloke vā paraloke vā. Naruttamaṃ atthacaraṃ narānanti kiñcāpi sabbe khīṇāsavā naruttamā ceva atthacarā ca narānaṃ, thero pana dasabalaṃ sandhāyevamāha. Ye taṃ namassanti pasaṃsiyā teti yadi tathāvimuttaṃ devamanussā namassanti, atha ye taṃ bhagavantaṃ kāyena vā vācāya vā anupaṭipattiyā vā namassanti, te kiṃ pasaṃsiyā, udāhu apasaṃsiyāti. Bhikkhūti mogharājattheraṃ ālapati. Aññāya dhammanti catusaccadhammaṃ jānitvā. Saṅgātigā tepi bhavantīti ye taṃ kāyena vā vācāya vā anupaṭipattiyā vā namassanti. Te catusaccadhammaṃ aññāya vicikicchaṃ pahāya saṅgātigāpi honti, pasaṃsiyāpi hontīti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. நஸந்திஸுத்தங் • 4. Nasantisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. நஸந்திஸுத்தவண்ணனா • 4. Nasantisuttavaṇṇanā
