| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৪. নসন্তিসুত্তৰণ্ণনা
4. Nasantisuttavaṇṇanā
৩৪. চতুত্থে কমনীযানীতি রূপাদীনি ইট্ঠারম্মণানি। অপুনাগমনং অনাগন্তা পুরিসো মচ্চুধেয্যাতি তেভূমকৰট্টসঙ্খাতা মচ্চুধেয্যা অপুনাগমনসঙ্খাতং নিব্বানং অনাগন্তা। নিব্বানঞ্হি সত্তা ন পুনাগচ্ছন্তি, তস্মা তং অপুনাগমনন্তি ৰুচ্চতি। তং কামেসু বদ্ধো চ পমত্তো চ অনাগন্তা নাম হোতি, সো তং পাপুণিতুং ন সক্কোতি, তস্মা এৰমাহ। ছন্দজন্তি তণ্হাছন্দতো জাতং। অঘন্তি পঞ্চক্খন্ধদুক্খং। দুতিযপদং তস্সেৰ ৰেৰচনং। ছন্দৰিনযা অঘৰিনযোতি তণ্হাৰিনযেন পঞ্চক্খন্ধৰিনযো । অঘৰিনযা দুক্খৰিনযোতি পঞ্চক্খন্ধৰিনযেন ৰট্টদুক্খং ৰিনীতমেৰ হোতি। চিত্রানীতি আরম্মণচিত্তানি। সঙ্কপ্পরাগোতি সঙ্কপ্পিতরাগো। এৰমেত্থ ৰত্থুকামং পটিক্খিপিত্ৰা কিলেসকামো কামোতি ৰুত্তো। অযং পনত্থো পসূরসুত্তেন (সু॰ নি॰ ৮৩০ আদযো) ৰিভাৰেতব্বো। পসূরপরিব্বাজকো হি থেরেন ‘‘সঙ্কপ্পরাগো পুরিসস্স কামো’’তি ৰুত্তে –
34. Catutthe kamanīyānīti rūpādīni iṭṭhārammaṇāni. Apunāgamanaṃ anāgantā puriso maccudheyyāti tebhūmakavaṭṭasaṅkhātā maccudheyyā apunāgamanasaṅkhātaṃ nibbānaṃ anāgantā. Nibbānañhi sattā na punāgacchanti, tasmā taṃ apunāgamananti vuccati. Taṃ kāmesu baddho ca pamatto ca anāgantā nāma hoti, so taṃ pāpuṇituṃ na sakkoti, tasmā evamāha. Chandajanti taṇhāchandato jātaṃ. Aghanti pañcakkhandhadukkhaṃ. Dutiyapadaṃ tasseva vevacanaṃ. Chandavinayā aghavinayoti taṇhāvinayena pañcakkhandhavinayo . Aghavinayā dukkhavinayoti pañcakkhandhavinayena vaṭṭadukkhaṃ vinītameva hoti. Citrānīti ārammaṇacittāni. Saṅkapparāgoti saṅkappitarāgo. Evamettha vatthukāmaṃ paṭikkhipitvā kilesakāmo kāmoti vutto. Ayaṃ panattho pasūrasuttena (su. ni. 830 ādayo) vibhāvetabbo. Pasūraparibbājako hi therena ‘‘saṅkapparāgo purisassa kāmo’’ti vutte –
‘‘ন তে কামা যানি চিত্রানি লোকে,
‘‘Na te kāmā yāni citrāni loke,
সঙ্কপ্পরাগঞ্চ ৰদেসি কামং।
Saṅkapparāgañca vadesi kāmaṃ;
সঙ্কপ্পযং অকুসলে ৰিতক্কে,
Saṅkappayaṃ akusale vitakke,
ভিক্খূপি তে হেহিন্তি কামভোগী’’তি॥ –
Bhikkhūpi te hehinti kāmabhogī’’ti. –
আহ। অথ নং থেরো অৰোচ –
Āha. Atha naṃ thero avoca –
‘‘তে চে কামা যানি চিত্রানি লোকে,
‘‘Te ce kāmā yāni citrāni loke,
সঙ্কপ্পরাগং ন ৰদেসি কামং।
Saṅkapparāgaṃ na vadesi kāmaṃ;
পস্সন্তো রূপানি মনোরমানি,
Passanto rūpāni manoramāni,
সত্থাপি তে হেহিতি কামভোগী॥
Satthāpi te hehiti kāmabhogī.
সুণন্তো সদ্দানি, ঘাযন্তো গন্ধানি।
Suṇanto saddāni, ghāyanto gandhāni;
সাযন্তো রসানি, ফুসন্তো ফস্সানি মনোরমানি।
Sāyanto rasāni, phusanto phassāni manoramāni;
সত্থাপি তে হেহিতি কামভোগী’’তি॥
Satthāpi te hehiti kāmabhogī’’ti.
অথেত্থ ধীরাতি অথ এতেসু আরম্মণেসু পণ্ডিতা ছন্দরাগং ৰিনযন্তি। সংযোজনং সব্বন্তি দসৰিধম্পি সংযোজনং। অকিঞ্চনন্তি রাগকিঞ্চনাদিৰিরহিতং। নানুপতন্তি দুক্খাতি ৰট্টদুক্খা পন তস্স উপরি ন পতন্তি। ইচ্চাযস্মা মোঘরাজাতি, ‘‘পহাসি সঙ্খ’’ন্তি গাথং সুত্ৰা তস্সং পরিসতি অনুসন্ধিকুসলো মোঘরাজা নাম থেরো ‘‘ইমিস্সা গাথায অত্থো ন যথানুসন্ধিং গতো’’তি চিন্তেত্ৰা যথানুসন্ধিং ঘটেন্তো এৰমাহ। তত্থ ইধ ৰা হুরং ৰাতি ইধলোকে ৰা পরলোকে ৰা। নরুত্তমং অত্থচরং নরানন্তি কিঞ্চাপি সব্বে খীণাসৰা নরুত্তমা চেৰ অত্থচরা চ নরানং, থেরো পন দসবলং সন্ধাযেৰমাহ। যে তং নমস্সন্তি পসংসিযা তেতি যদি তথাৰিমুত্তং দেৰমনুস্সা নমস্সন্তি, অথ যে তং ভগৰন্তং কাযেন ৰা ৰাচায ৰা অনুপটিপত্তিযা ৰা নমস্সন্তি, তে কিং পসংসিযা, উদাহু অপসংসিযাতি। ভিক্খূতি মোঘরাজত্থেরং আলপতি। অঞ্ঞায ধম্মন্তি চতুসচ্চধম্মং জানিত্ৰা। সঙ্গাতিগা তেপি ভৰন্তীতি যে তং কাযেন ৰা ৰাচায ৰা অনুপটিপত্তিযা ৰা নমস্সন্তি। তে চতুসচ্চধম্মং অঞ্ঞায ৰিচিকিচ্ছং পহায সঙ্গাতিগাপি হোন্তি, পসংসিযাপি হোন্তীতি। চতুত্থং।
Athettha dhīrāti atha etesu ārammaṇesu paṇḍitā chandarāgaṃ vinayanti. Saṃyojanaṃ sabbanti dasavidhampi saṃyojanaṃ. Akiñcananti rāgakiñcanādivirahitaṃ. Nānupatanti dukkhāti vaṭṭadukkhā pana tassa upari na patanti. Iccāyasmāmogharājāti, ‘‘pahāsi saṅkha’’nti gāthaṃ sutvā tassaṃ parisati anusandhikusalo mogharājā nāma thero ‘‘imissā gāthāya attho na yathānusandhiṃ gato’’ti cintetvā yathānusandhiṃ ghaṭento evamāha. Tattha idha vā huraṃ vāti idhaloke vā paraloke vā. Naruttamaṃ atthacaraṃ narānanti kiñcāpi sabbe khīṇāsavā naruttamā ceva atthacarā ca narānaṃ, thero pana dasabalaṃ sandhāyevamāha. Ye taṃ namassanti pasaṃsiyā teti yadi tathāvimuttaṃ devamanussā namassanti, atha ye taṃ bhagavantaṃ kāyena vā vācāya vā anupaṭipattiyā vā namassanti, te kiṃ pasaṃsiyā, udāhu apasaṃsiyāti. Bhikkhūti mogharājattheraṃ ālapati. Aññāya dhammanti catusaccadhammaṃ jānitvā. Saṅgātigā tepi bhavantīti ye taṃ kāyena vā vācāya vā anupaṭipattiyā vā namassanti. Te catusaccadhammaṃ aññāya vicikicchaṃ pahāya saṅgātigāpi honti, pasaṃsiyāpi hontīti. Catutthaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. নসন্তিসুত্তং • 4. Nasantisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. নসন্তিসুত্তৰণ্ণনা • 4. Nasantisuttavaṇṇanā
