| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. নসন্তিসুত্তৰণ্ণনা
4. Nasantisuttavaṇṇanā
৩৪. কমনীযানীতি কন্তানি। ততো এৰ এতানি ইট্ঠারম্মণানি সুখারম্মণানি রূপাদীনি, তে পন ৰত্থুকামা, তদারম্মণকিলেসকামা ৰা। ‘‘ন সন্তি কামা মনুজেসূ’’তি দেসনাসীসমেতং, নিচ্ছযেন কামা অনিচ্চাযেৰ। মচ্চু ধীযতি এত্থাতি মচ্চুধেয্যং। ন পুন আগচ্ছতি এত্থ তং অপুনাগমনং। অপুনাগমনসঙ্খাতং নিব্বানং অনুপগচ্ছনতো। নিব্বানং হীতিআদি ৰুত্তস্সেৰত্থস্স ৰিৰরণং। বদ্ধোতি পটিবদ্ধচিত্তো। পমত্তোতি ৰোস্সগ্গপমাদং আপন্নো।
34.Kamanīyānīti kantāni. Tato eva etāni iṭṭhārammaṇāni sukhārammaṇāni rūpādīni, te pana vatthukāmā, tadārammaṇakilesakāmā vā. ‘‘Na santi kāmā manujesū’’ti desanāsīsametaṃ, nicchayena kāmā aniccāyeva. Maccu dhīyati etthāti maccudheyyaṃ. Na puna āgacchati ettha taṃ apunāgamanaṃ. Apunāgamanasaṅkhātaṃ nibbānaṃ anupagacchanato. Nibbānaṃ hītiādi vuttassevatthassa vivaraṇaṃ. Baddhoti paṭibaddhacitto. Pamattoti vossaggapamādaṃ āpanno.
তণ্হাছন্দতো জাতং তস্স ৰিসেসপচ্চযত্তা। ইচ্ছিতং হনতীতি অঘং, দুক্খং। ইধ পন অনৰসেসপরিযাদানৰসেন পঞ্চুপাদানক্খন্ধা দুক্খন্তি। ছন্দৰিনযা অঘৰিনযোতি হেতুনিরোধেন হি ফলনিরোধো, এৰং সউপাদিসেসনিব্বানং ৰত্ৰা অঘৰিনযা দুক্খৰিনযোতি অনুপাদিসেসনিব্বানং ৰদতি।
Taṇhāchandatojātaṃ tassa visesapaccayattā. Icchitaṃ hanatīti aghaṃ, dukkhaṃ. Idha pana anavasesapariyādānavasena pañcupādānakkhandhā dukkhanti. Chandavinayā aghavinayoti hetunirodhena hi phalanirodho, evaṃ saupādisesanibbānaṃ vatvā aghavinayā dukkhavinayoti anupādisesanibbānaṃ vadati.
চিত্রানীতি কিলেসকামাপি ৰেদনাদিট্ঠিসম্পযোগভেদেন হোন্তি, আকারভেদেন চ অত্থি সৰিঘাতাৰিঘাতাতি ততো ৰিসেসেতুং ‘‘আরম্মণচিত্তানী’’তি ৰুত্তং। সঙ্কপ্পিতরাগোতি সুভাদিৰসেন সঙ্কপ্পিতৰত্থুম্হি রাগো। কিলেসকামো কামোতি ৰুত্তো তস্সেৰিধ ৰিসেসতো কামভাৰসিদ্ধিতো। পসূরসুত্তেন ৰিভাৰেতব্বো ‘‘ন তে কামা’’তিআদিনা তস্স ৰত্থুম্হি আগতত্তা। ইদানি তমত্থং সঙ্খেপেনেৰ ৰিভাৰেন্তো ‘‘পসূরপরিব্বাজকো হী’’তিআদিমাহ। ন তে কামা যানি চিত্রানি লোকেতি তে চে কামা ন হোন্তি, যানি লোকে চিত্রানি রূপাদিআরম্মণানি। ৰেদেসীতি কেৰলং সঙ্কপ্পরাগঞ্চ কামং কত্ৰা ৰদেসি চে। হেহিন্তীতি ভৰেয্যুন্তি অত্থো। সুণন্তো সদ্দানি মনোরমানি, সত্থাপি তে হেহিতি কামভোগীতি পচ্চেকং গাথা, ইধ পন সংখিপিত্ৰা দস্সিতা। ধীরা নাম ধিতিসম্পন্নাতি আহ ‘‘পণ্ডিতা’’তি।
Citrānīti kilesakāmāpi vedanādiṭṭhisampayogabhedena honti, ākārabhedena ca atthi savighātāvighātāti tato visesetuṃ ‘‘ārammaṇacittānī’’ti vuttaṃ. Saṅkappitarāgoti subhādivasena saṅkappitavatthumhi rāgo. Kilesakāmo kāmoti vutto tassevidha visesato kāmabhāvasiddhito. Pasūrasuttena vibhāvetabbo ‘‘na te kāmā’’tiādinā tassa vatthumhi āgatattā. Idāni tamatthaṃ saṅkhepeneva vibhāvento ‘‘pasūraparibbājako hī’’tiādimāha. Na te kāmā yāni citrāni loketi te ce kāmā na honti, yāni loke citrāni rūpādiārammaṇāni. Vedesīti kevalaṃ saṅkapparāgañca kāmaṃ katvā vadesi ce. Hehintīti bhaveyyunti attho. Suṇanto saddāni manoramāni, satthāpi te hehiti kāmabhogīti paccekaṃ gāthā, idha pana saṃkhipitvā dassitā. Dhīrā nāma dhitisampannāti āha ‘‘paṇḍitā’’ti.
তস্সাতি যো পহীনকোধমানো সব্বসো সংযোজনাতিগো নামরূপস্মিং অসজ্জন্তো রাগাদিকিঞ্চনরহিতো, তস্স। মোঘরাজা নাম থেরো বাৰরীব্রাহ্মণস্স পরিচারকানং সোল়সন্নং অঞ্ঞতরো। যথানুসন্ধিং অপ্পত্তো সাৰসেস-অত্থো, কিঞ্চি ৰত্তব্বং অত্থীতি অধিপ্পাযো । সব্বসো ৰিমুত্তত্তাৰ দেৰমনুস্সা নমস্সন্তি, যে তং পটিপজ্জন্তি। তেসং কিং হোতি? কিঞ্চিপি ন সিযাতি অযমেত্থ অত্থৰিসেসো? দসবলং সন্ধাযেৰমাহ উক্কট্ঠনিদ্দেসেন। অনুপটিপত্তিযাতি পটিপত্তিং অনুগন্ত্ৰা পটিপজ্জনেন। নমস্সন্তি তং পূজেন্তি।
Tassāti yo pahīnakodhamāno sabbaso saṃyojanātigo nāmarūpasmiṃ asajjanto rāgādikiñcanarahito, tassa. Mogharājā nāma thero bāvarībrāhmaṇassa paricārakānaṃ soḷasannaṃ aññataro. Yathānusandhiṃ appatto sāvasesa-attho, kiñci vattabbaṃ atthīti adhippāyo . Sabbaso vimuttattāva devamanussā namassanti, ye taṃ paṭipajjanti. Tesaṃ kiṃ hoti? Kiñcipi na siyāti ayamettha atthaviseso? Dasabalaṃ sandhāyevamāha ukkaṭṭhaniddesena. Anupaṭipattiyāti paṭipattiṃ anugantvā paṭipajjanena. Namassanti taṃ pūjenti.
চতুসচ্চধম্মং জানিত্ৰাতি তেন পটিৰিদ্ধং চতুসচ্চধম্মং পটিৰিজ্ঝিত্ৰা। তথা চ বুদ্ধসুবুদ্ধতায নিব্বেমতিকা হোন্তীতি আহ ‘‘ৰিচিকিচ্ছং পহাযা’’তি। ততো পরং পন অনুক্কমেন অগ্গমগ্গাধিগমেন সঙ্গাতিগাপি হোন্তি। অসেক্খধম্মপারিপূরিযা পসংসিযা ৰিঞ্ঞূনং পসংসাপি হোন্তীতি।
Catusaccadhammaṃ jānitvāti tena paṭividdhaṃ catusaccadhammaṃ paṭivijjhitvā. Tathā ca buddhasubuddhatāya nibbematikā hontīti āha ‘‘vicikicchaṃ pahāyā’’ti. Tato paraṃ pana anukkamena aggamaggādhigamena saṅgātigāpi honti. Asekkhadhammapāripūriyā pasaṃsiyā viññūnaṃ pasaṃsāpi hontīti.
নসন্তিসুত্তৰণ্ণনা নিট্ঠিতা।
Nasantisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. নসন্তিসুত্তং • 4. Nasantisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. নসন্তিসুত্তৰণ্ণনা • 4. Nasantisuttavaṇṇanā
