| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. நாஸெந்திஸுத்தங்
6. Nāsentisuttaṃ
309. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லங், போ⁴க³ப³லங், ஞாதிப³லங், புத்தப³லங், ஸீலப³லங். ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ஸீலப³லேன, நாஸெந்தேவ நங், குலே ந வாஸெந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ந ச ஸீலப³லேன, நாஸெந்தேவ நங், குலே ந வாஸெந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, ந ச ஸீலப³லேன, நாஸெந்தேவ நங், குலே ந வாஸெந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச , புத்தப³லேன ச, ந ச ஸீலப³லேன, நாஸெந்தேவ நங், குலே ந வாஸெந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ரூபப³லேன, வாஸெந்தேவ நங், குலே ந நாஸெந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச போ⁴க³ப³லேன, வாஸெந்தேவ நங், குலே ந நாஸெந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ஞாதிப³லேன, வாஸெந்தேவ நங், குலே ந நாஸெந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச புத்தப³லேன, வாஸெந்தேவ நங், குலே ந நாஸெந்தி. இமானி கோ², பி⁴க்க²வே, பஞ்ச மாதுகா³மஸ்ஸ ப³லானீ’’தி. ச²ட்ட²ங்.
309. ‘‘Pañcimāni, bhikkhave, mātugāmassa balāni. Katamāni pañca? Rūpabalaṃ, bhogabalaṃ, ñātibalaṃ, puttabalaṃ, sīlabalaṃ. Rūpabalena ca, bhikkhave, mātugāmo samannāgato hoti, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, ñātibalena ca , puttabalena ca, na ca sīlabalena, nāsenteva naṃ, kule na vāsenti. Sīlabalena ca, bhikkhave, mātugāmo samannāgato hoti, na ca rūpabalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca bhogabalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca ñātibalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca puttabalena, vāsenteva naṃ, kule na nāsenti. Imāni kho, bhikkhave, pañca mātugāmassa balānī’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-10. பஸய்ஹஸுத்தாதி³வண்ணனா • 2-10. Pasayhasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-10. பஸய்ஹஸுத்தாதி³வண்ணனா • 2-10. Pasayhasuttādivaṇṇanā
