| Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya |
(౨౦) ౫. అపరపుగ్గలవగ్గో
(20) 5. Aparapuggalavaggo
నసేవితబ్బాదిసుత్తాని
Nasevitabbādisuttāni
౧౯౯. ‘‘దసహి , భిక్ఖవే, ధమ్మేహి సమన్నాగతో పుగ్గలో న సేవితబ్బో. కతమేహి దసహి? పాణాతిపాతీ హోతి, అదిన్నాదాయీ హోతి, కామేసుమిచ్ఛాచారీ హోతి, ముసావాదీ హోతి, పిసుణవాచో హోతి, ఫరుసవాచో హోతి, సమ్ఫప్పలాపీ హోతి, అభిజ్ఝాలు హోతి, బ్యాపన్నచిత్తో హోతి, మిచ్ఛాదిట్ఠికో హోతి – ఇమేహి ఖో, భిక్ఖవే, దసహి ధమ్మేహి సమన్నాగతో పుగ్గలో న సేవితబ్బో.
199. ‘‘Dasahi , bhikkhave, dhammehi samannāgato puggalo na sevitabbo. Katamehi dasahi? Pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti – imehi kho, bhikkhave, dasahi dhammehi samannāgato puggalo na sevitabbo.
‘‘దసహి, భిక్ఖవే, ధమ్మేహి సమన్నాగతో పుగ్గలో సేవితబ్బో. కతమేహి దసహి? పాణాతిపాతా పటివిరతో హోతి, అదిన్నాదానా పటివిరతో హోతి, కామేసుమిచ్ఛాచారా పటివిరతో హోతి, ముసావాదా పటివిరతో హోతి, పిసుణాయ వాచాయ పటివిరతో హోతి, ఫరుసాయ వాచాయ పటివిరతో హోతి, సమ్ఫప్పలాపా పటివిరతో హోతి, అనభిజ్ఝాలు హోతి, అబ్యాపన్నచిత్తో హోతి, సమ్మాదిట్ఠికో హోతి – ఇమేహి ఖో, భిక్ఖవే, దసహి ధమ్మేహి సమన్నాగతో పుగ్గలో సేవితబ్బో’’.
‘‘Dasahi, bhikkhave, dhammehi samannāgato puggalo sevitabbo. Katamehi dasahi? Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti – imehi kho, bhikkhave, dasahi dhammehi samannāgato puggalo sevitabbo’’.
౨౦౦-౨౦౯. ‘‘దసహి, భిక్ఖవే, ధమ్మేహి సమన్నాగతో పుగ్గలో న భజితబ్బో…పే॰… భజితబ్బో… న పయిరుపాసితబ్బో… పయిరుపాసితబ్బో… న పుజ్జో హోతి… పుజ్జో హోతి… న పాసంసో హోతి… పాసంసో హోతి… అగారవో హోతి… గారవో హోతి… అప్పతిస్సో హోతి… సప్పతిస్సో హోతి… న ఆరాధకో హోతి… ఆరాధకో హోతి… న విసుజ్ఝతి… విసుజ్ఝతి… మానం నాధిభోతి 1 … మానం అధిభోతి… పఞ్ఞాయ న వడ్ఢతి… పఞ్ఞాయ వడ్ఢతి…పే॰….
200-209. ‘‘Dasahi, bhikkhave, dhammehi samannāgato puggalo na bhajitabbo…pe… bhajitabbo… na payirupāsitabbo… payirupāsitabbo… na pujjo hoti… pujjo hoti… na pāsaṃso hoti… pāsaṃso hoti… agāravo hoti… gāravo hoti… appatisso hoti… sappatisso hoti… na ārādhako hoti… ārādhako hoti… na visujjhati… visujjhati… mānaṃ nādhibhoti 2 … mānaṃ adhibhoti… paññāya na vaḍḍhati… paññāya vaḍḍhati…pe….
౨౧౦. ‘‘దసహి , భిక్ఖవే, ధమ్మేహి సమన్నాగతో పుగ్గలో బహుం అపుఞ్ఞం పసవతి… బహుం పుఞ్ఞం పసవతి. కతమేహి దసహి? పాణాతిపాతా పటివిరతో హోతి, అదిన్నాదానా పటివిరతో హోతి , కామేసుమిచ్ఛాచారా పటివిరతో హోతి, ముసావాదా పటివిరతో హోతి, పిసుణాయ వాచాయ పటివిరతో హోతి, ఫరుసాయ వాచాయ పటివిరతో హోతి, సమ్ఫప్పలాపా పటివిరతో హోతి, అనభిజ్ఝాలు హోతి , అబ్యాపన్నచిత్తో హోతి, సమ్మాదిట్ఠికో హోతి – ఇమేహి ఖో, భిక్ఖవే, దసహి ధమ్మేహి సమన్నాగతో పుగ్గలో బహుం పుఞ్ఞం పసవతీ’’తి.
210. ‘‘Dasahi , bhikkhave, dhammehi samannāgato puggalo bahuṃ apuññaṃ pasavati… bahuṃ puññaṃ pasavati. Katamehi dasahi? Pāṇātipātā paṭivirato hoti, adinnādānā paṭivirato hoti , kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti , abyāpannacitto hoti, sammādiṭṭhiko hoti – imehi kho, bhikkhave, dasahi dhammehi samannāgato puggalo bahuṃ puññaṃ pasavatī’’ti.
అపరపుగ్గలవగ్గో పఞ్చమో.
Aparapuggalavaggo pañcamo.
చతుత్థపణ్ణాసకం సమత్తం.
Catutthapaṇṇāsakaṃ samattaṃ.
Footnotes:
Related texts:
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౧-౪౪. బ్రాహ్మణపచ్చోరోహణీసుత్తాదివణ్ణనా • 1-44. Brāhmaṇapaccorohaṇīsuttādivaṇṇanā
