| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(20) 5. අපරපුග්‌ගලවග්‌ගො
(20) 5. Aparapuggalavaggo
නසෙවිතබ්‌බාදිසුත්‌තානි
Nasevitabbādisuttāni
199. ‘‘දසහි , භික්‌ඛවෙ, ධම්‌මෙහි සමන්‌නාගතො පුග්‌ගලො න සෙවිතබ්‌බො. කතමෙහි දසහි? පාණාතිපාතී හොති, අදින්‌නාදායී හොති, කාමෙසුමිච්‌ඡාචාරී හොති, මුසාවාදී හොති, පිසුණවාචො හොති, ඵරුසවාචො හොති, සම්‌ඵප්‌පලාපී හොති, අභිජ්‌ඣාලු හොති, බ්‍යාපන්‌නචිත්‌තො හොති, මිච්‌ඡාදිට්‌ඨිකො හොති – ඉමෙහි ඛො, භික්‌ඛවෙ, දසහි ධම්‌මෙහි සමන්‌නාගතො පුග්‌ගලො න සෙවිතබ්‌බො.
199. ‘‘Dasahi , bhikkhave, dhammehi samannāgato puggalo na sevitabbo. Katamehi dasahi? Pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti – imehi kho, bhikkhave, dasahi dhammehi samannāgato puggalo na sevitabbo.
‘‘දසහි, භික්‌ඛවෙ, ධම්‌මෙහි සමන්‌නාගතො පුග්‌ගලො සෙවිතබ්‌බො. කතමෙහි දසහි? පාණාතිපාතා පටිවිරතො හොති, අදින්‌නාදානා පටිවිරතො හොති, කාමෙසුමිච්‌ඡාචාරා පටිවිරතො හොති, මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො හොති, සම්‌ඵප්‌පලාපා පටිවිරතො හොති, අනභිජ්‌ඣාලු හොති, අබ්‍යාපන්‌නචිත්‌තො හොති, සම්‌මාදිට්‌ඨිකො හොති – ඉමෙහි ඛො, භික්‌ඛවෙ, දසහි ධම්‌මෙහි සමන්‌නාගතො පුග්‌ගලො සෙවිතබ්‌බො’’.
‘‘Dasahi, bhikkhave, dhammehi samannāgato puggalo sevitabbo. Katamehi dasahi? Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti – imehi kho, bhikkhave, dasahi dhammehi samannāgato puggalo sevitabbo’’.
200-209. ‘‘දසහි, භික්‌ඛවෙ, ධම්‌මෙහි සමන්‌නාගතො පුග්‌ගලො න භජිතබ්‌බො…පෙ.… භජිතබ්‌බො… න පයිරුපාසිතබ්‌බො… පයිරුපාසිතබ්‌බො… න පුජ්‌ජො හොති… පුජ්‌ජො හොති… න පාසංසො හොති… පාසංසො හොති… අගාරවො හොති… ගාරවො හොති… අප්‌පතිස්‌සො හොති… සප්‌පතිස්‌සො හොති… න ආරාධකො හොති… ආරාධකො හොති… න විසුජ්‌ඣති… විසුජ්‌ඣති… මානං නාධිභොති 1 … මානං අධිභොති… පඤ්‌ඤාය න වඩ්‌ඪති… පඤ්‌ඤාය වඩ්‌ඪති…පෙ.….
200-209. ‘‘Dasahi, bhikkhave, dhammehi samannāgato puggalo na bhajitabbo…pe… bhajitabbo… na payirupāsitabbo… payirupāsitabbo… na pujjo hoti… pujjo hoti… na pāsaṃso hoti… pāsaṃso hoti… agāravo hoti… gāravo hoti… appatisso hoti… sappatisso hoti… na ārādhako hoti… ārādhako hoti… na visujjhati… visujjhati… mānaṃ nādhibhoti 2 … mānaṃ adhibhoti… paññāya na vaḍḍhati… paññāya vaḍḍhati…pe….
210. ‘‘දසහි , භික්‌ඛවෙ, ධම්‌මෙහි සමන්‌නාගතො පුග්‌ගලො බහුං අපුඤ්‌ඤං පසවති… බහුං පුඤ්‌ඤං පසවති. කතමෙහි දසහි? පාණාතිපාතා පටිවිරතො හොති, අදින්‌නාදානා පටිවිරතො හොති , කාමෙසුමිච්‌ඡාචාරා පටිවිරතො හොති, මුසාවාදා පටිවිරතො හොති, පිසුණාය වාචාය පටිවිරතො හොති, ඵරුසාය වාචාය පටිවිරතො හොති, සම්‌ඵප්‌පලාපා පටිවිරතො හොති, අනභිජ්‌ඣාලු හොති , අබ්‍යාපන්‌නචිත්‌තො හොති, සම්‌මාදිට්‌ඨිකො හොති – ඉමෙහි ඛො, භික්‌ඛවෙ, දසහි ධම්‌මෙහි සමන්‌නාගතො පුග්‌ගලො බහුං පුඤ්‌ඤං පසවතී’’ති.
210. ‘‘Dasahi , bhikkhave, dhammehi samannāgato puggalo bahuṃ apuññaṃ pasavati… bahuṃ puññaṃ pasavati. Katamehi dasahi? Pāṇātipātā paṭivirato hoti, adinnādānā paṭivirato hoti , kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti , abyāpannacitto hoti, sammādiṭṭhiko hoti – imehi kho, bhikkhave, dasahi dhammehi samannāgato puggalo bahuṃ puññaṃ pasavatī’’ti.
අපරපුග්‌ගලවග්‌ගො පඤ්‌චමො.
Aparapuggalavaggo pañcamo.
චතුත්‌ථපණ්‌ණාසකං සමත්‌තං.
Catutthapaṇṇāsakaṃ samattaṃ.
Footnotes:
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-44. බ්‍රාහ්‌මණපච්‌චොරොහණීසුත්‌තාදිවණ්‌ණනා • 1-44. Brāhmaṇapaccorohaṇīsuttādivaṇṇanā
