Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi

    123. ஞாதகாதி³க்³க³ஹணகதா²

    123. Ñātakādiggahaṇakathā

    214. தேன கோ² பன ஸமயேன அஞ்ஞதரங் பி⁴க்கு²ங் தத³ஹு பவாரணாய ஞாதகா க³ண்ஹிங்ஸு. ப⁴க³வதோ ஏதமத்த²ங் ஆரோசேஸுங். இத⁴ பன, பி⁴க்க²வே, பி⁴க்கு²ங் தத³ஹு பவாரணாய ஞாதகா க³ண்ஹந்தி. தே ஞாதகா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ இமங் பி⁴க்கு²ங் முஹுத்தங் முஞ்சத², யாவாயங் பி⁴க்கு² பவாரேதீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², தே ஞாதகா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ முஹுத்தங் ஏகமந்தங் ஹோத², யாவாயங் பி⁴க்கு² பவாரணங் தே³தீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², தே ஞாதகா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ இமங் பி⁴க்கு²ங் முஹுத்தங் நிஸ்ஸீமங் நேத², யாவ ஸங்கோ⁴ பவாரேதீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ந த்வேவ வக்³கே³ன ஸங்கே⁴ன பவாரேதப்³ப³ங். பவாரெய்ய சே, ஆபத்தி து³க்கடஸ்ஸ.

    214. Tena kho pana samayena aññataraṃ bhikkhuṃ tadahu pavāraṇāya ñātakā gaṇhiṃsu. Bhagavato etamatthaṃ ārocesuṃ. Idha pana, bhikkhave, bhikkhuṃ tadahu pavāraṇāya ñātakā gaṇhanti. Te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu pavāretī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pavāraṇaṃ detī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho pavāretī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena pavāretabbaṃ. Pavāreyya ce, āpatti dukkaṭassa.

    இத⁴ பன, பி⁴க்க²வே, பி⁴க்கு²ங் தத³ஹு பவாரணாய ராஜானோ க³ண்ஹந்தி…பே॰… சோரா க³ண்ஹந்தி … து⁴த்தா க³ண்ஹந்தி… பி⁴க்கு²பச்சத்தி²கா க³ண்ஹந்தி. தே பி⁴க்கு²பச்சத்தி²கா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ இமங் பி⁴க்கு²ங் முஹுத்தங் முஞ்சத², யாவாயங் பி⁴க்கு² பவாரேதீ’’தி . ஏவஞ்சேதங் லபே⁴த², இச்சேதங் குஸலங். நோ சே லபே⁴த², தே பி⁴க்கு²பச்சத்தி²கா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ முஹுத்தங் ஏகமந்தங் ஹோத², யாவாயங் பி⁴க்கு² பவாரணங் தே³தீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², தே பி⁴க்கு²பச்சத்தி²கா பி⁴க்கூ²ஹி ஏவமஸ்ஸு வசனீயா – ‘‘இங்க⁴, தும்ஹே ஆயஸ்மந்தோ இமங் பி⁴க்கு²ங் முஹுத்தங் நிஸ்ஸீமங் நேத², யாவ ஸங்கோ⁴ பவாரேதீ’’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ந த்வேவ வக்³கே³ன ஸங்கே⁴ன பவாரேதப்³ப³ங். பவாரெய்ய சே, ஆபத்தி து³க்கடஸ்ஸாதி.

    Idha pana, bhikkhave, bhikkhuṃ tadahu pavāraṇāya rājāno gaṇhanti…pe… corā gaṇhanti … dhuttā gaṇhanti… bhikkhupaccatthikā gaṇhanti. Te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu pavāretī’’ti . Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pavāraṇaṃ detī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho pavāretī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena pavāretabbaṃ. Pavāreyya ce, āpatti dukkaṭassāti.

    ஞாதகாதி³க்³க³ஹணகதா² நிட்டி²தா.

    Ñātakādiggahaṇakathā niṭṭhitā.





    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact