| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৮৯. ঞাতকাদিগ্গহণকথা
89. Ñātakādiggahaṇakathā
১৬৬. তেন খো পন সমযেন অঞ্ঞতরং ভিক্খুং তদহুপোসথে ঞাতকা গণ্হিংসুং। ভগৰতো এতমত্থং আরোচেসুং।
166. Tena kho pana samayena aññataraṃ bhikkhuṃ tadahuposathe ñātakā gaṇhiṃsuṃ. Bhagavato etamatthaṃ ārocesuṃ.
ইধ পন, ভিক্খৰে, ভিক্খুং তদহুপোসথে ঞাতকা গণ্হন্তি। তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৰাযং ভিক্খু উপোসথং করোতী’’তি। এৰঞ্চেতং লভেথ, ইচ্চেতং কুসলং। নো চে লভেথ, তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৰাযং ভিক্খু পারিসুদ্ধিং দেতী’’তি। এৰঞ্চেতং লভেথ, ইচ্চেতং কুসলং। নো চে লভেথ, তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৰ সঙ্ঘো উপোসথং করোতী’’তি। এৰঞ্চেতং লভেথ, ইচ্চেতং কুসলং। নো চে লভেথ, ন ত্ৰেৰ ৰগ্গেন সঙ্ঘেন উপোসথো কাতব্বো। করেয্য চে, আপত্তি দুক্কটস্স।
Idha pana, bhikkhave, bhikkhuṃ tadahuposathe ñātakā gaṇhanti. Te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pārisuddhiṃ detī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena uposatho kātabbo. Kareyya ce, āpatti dukkaṭassa.
ইধ পন, ভিক্খৰে, ভিক্খুং তদহুপোসথে রাজানো গণ্হন্তি,…পে॰… চোরা গণ্হন্তি – ধুত্তা গণ্হন্তি – ভিক্খুপচ্চত্থিকা গণ্হন্তি, তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৰাযং ভিক্খু উপোসথং করোতী’’তি। এৰঞ্চেতং লভেথ, ইচ্চেতং কুসলং। নো চে লভেথ, তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৰাযং ভিক্খু পারিসুদ্ধিং দেতী’’তি। এৰঞ্চেতং লভেথ, ইচ্চেতং কুসলং। নো চে লভেথ, তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৰ সঙ্ঘো উপোসথং করোতী’’তি। এৰঞ্চেতং লভেথ, ইচ্চেতং কুসলং। নো চে লভেথ, ন ত্ৰেৰ ৰগ্গেন সঙ্ঘেন উপোসথো কাতব্বো। করেয্য চে, আপত্তি দুক্কটস্সাতি।
Idha pana, bhikkhave, bhikkhuṃ tadahuposathe rājāno gaṇhanti,…pe… corā gaṇhanti – dhuttā gaṇhanti – bhikkhupaccatthikā gaṇhanti, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pārisuddhiṃ detī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena uposatho kātabbo. Kareyya ce, āpatti dukkaṭassāti.
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছন্দদানাদিকথাৰণ্ণনা • Chandadānādikathāvaṇṇanā
