| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೨೩. ಞಾತಕಾದಿಗ್ಗಹಣಕಥಾ
123. Ñātakādiggahaṇakathā
೨೧೪. ತೇನ ಖೋ ಪನ ಸಮಯೇನ ಅಞ್ಞತರಂ ಭಿಕ್ಖುಂ ತದಹು ಪವಾರಣಾಯ ಞಾತಕಾ ಗಣ್ಹಿಂಸು। ಭಗವತೋ ಏತಮತ್ಥಂ ಆರೋಚೇಸುಂ। ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹು ಪವಾರಣಾಯ ಞಾತಕಾ ಗಣ್ಹನ್ತಿ। ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಪವಾರೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪವಾರಣಂ ದೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಪವಾರೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಪವಾರೇತಬ್ಬಂ। ಪವಾರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ।
214. Tena kho pana samayena aññataraṃ bhikkhuṃ tadahu pavāraṇāya ñātakā gaṇhiṃsu. Bhagavato etamatthaṃ ārocesuṃ. Idha pana, bhikkhave, bhikkhuṃ tadahu pavāraṇāya ñātakā gaṇhanti. Te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu pavāretī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pavāraṇaṃ detī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho pavāretī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena pavāretabbaṃ. Pavāreyya ce, āpatti dukkaṭassa.
ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹು ಪವಾರಣಾಯ ರಾಜಾನೋ ಗಣ್ಹನ್ತಿ…ಪೇ॰… ಚೋರಾ ಗಣ್ಹನ್ತಿ … ಧುತ್ತಾ ಗಣ್ಹನ್ತಿ… ಭಿಕ್ಖುಪಚ್ಚತ್ಥಿಕಾ ಗಣ್ಹನ್ತಿ। ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಪವಾರೇತೀ’’ತಿ । ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪವಾರಣಂ ದೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಪವಾರೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಪವಾರೇತಬ್ಬಂ। ಪವಾರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸಾತಿ।
Idha pana, bhikkhave, bhikkhuṃ tadahu pavāraṇāya rājāno gaṇhanti…pe… corā gaṇhanti … dhuttā gaṇhanti… bhikkhupaccatthikā gaṇhanti. Te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu pavāretī’’ti . Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pavāraṇaṃ detī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho pavāretī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena pavāretabbaṃ. Pavāreyya ce, āpatti dukkaṭassāti.
ಞಾತಕಾದಿಗ್ಗಹಣಕಥಾ ನಿಟ್ಠಿತಾ।
Ñātakādiggahaṇakathā niṭṭhitā.
