| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. රථකාරවග්‌ගො
2. Rathakāravaggo
1. ඤාතසුත්‌තං
1. Ñātasuttaṃ
11. ‘‘තීහි , භික්‌ඛවෙ, ධම්‌මෙහි සමන්‌නාගතො ඤාතො භික්‌ඛු බහුජනඅහිතාය පටිපන්‌නො හොති බහුජනදුක්‌ඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. කතමෙහි තීහි? අනනුලොමිකෙ කායකම්‌මෙ සමාදපෙති, අනනුලොමිකෙ වචීකම්‌මෙ සමාදපෙති, අනනුලොමිකෙසු ධම්‌මෙසු සමාදපෙති. ඉමෙහි ඛො, භික්‌ඛවෙ, තීහි ධම්‌මෙහි සමන්‌නාගතො ඤාතො භික්‌ඛු බහුජනඅහිතාය පටිපන්‌නො හොති බහුජනදුක්‌ඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං.
11. ‘‘Tīhi , bhikkhave, dhammehi samannāgato ñāto bhikkhu bahujanaahitāya paṭipanno hoti bahujanadukkhāya, bahuno janassa anatthāya ahitāya dukkhāya devamanussānaṃ. Katamehi tīhi? Ananulomike kāyakamme samādapeti, ananulomike vacīkamme samādapeti, ananulomikesu dhammesu samādapeti. Imehi kho, bhikkhave, tīhi dhammehi samannāgato ñāto bhikkhu bahujanaahitāya paṭipanno hoti bahujanadukkhāya, bahuno janassa anatthāya ahitāya dukkhāya devamanussānaṃ.
‘‘තීහි, භික්‌ඛවෙ, ධම්‌මෙහි සමන්‌නාගතො ඤාතො භික්‌ඛු බහුජනහිතාය පටිපන්‌නො හොති බහුජනසුඛාය, බහුනො ජනස්‌ස අත්‌ථාය හිතාය සුඛාය දෙවමනුස්‌සානං. කතමෙහි තීහි? අනුලොමිකෙ කායකම්‌මෙ සමාදපෙති, අනුලොමිකෙ වචීකම්‌මෙ සමාදපෙති, අනුලොමිකෙසු ධම්‌මෙසු සමාදපෙති. ඉමෙහි ඛො, භික්‌ඛවෙ, තීහි ධම්‌මෙහි සමන්‌නාගතො ඤාතො භික්‌ඛු බහුජනහිතාය පටිපන්‌නො හොති බහුජනසුඛාය, බහුනො ජනස්‌ස අත්‌ථාය හිතාය සුඛාය දෙවමනුස්‌සාන’’න්‌ති. පඨමං.
‘‘Tīhi, bhikkhave, dhammehi samannāgato ñāto bhikkhu bahujanahitāya paṭipanno hoti bahujanasukhāya, bahuno janassa atthāya hitāya sukhāya devamanussānaṃ. Katamehi tīhi? Anulomike kāyakamme samādapeti, anulomike vacīkamme samādapeti, anulomikesu dhammesu samādapeti. Imehi kho, bhikkhave, tīhi dhammehi samannāgato ñāto bhikkhu bahujanahitāya paṭipanno hoti bahujanasukhāya, bahuno janassa atthāya hitāya sukhāya devamanussāna’’nti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. ඤාතසුත්‌තවණ්‌ණනා • 1. Ñātasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. ඤාතසුත්‌තවණ්‌ණනා • 1. Ñātasuttavaṇṇanā
