| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஞாதிகஸுத்தவண்ணனா
5. Ñātikasuttavaṇṇanā
45. பஞ்சமே ஞாதிகேதி த்³வின்னங் ஞாதகானங் கா³மே. கி³ஞ்ஜகாவஸதே²தி இட்ட²காஹி கதே மஹாபாஸாதே³. த⁴ம்மபரியாயந்தி த⁴ம்மகாரணங். உபஸ்ஸுதீதி உபஸ்ஸுதிட்டா²னங், யங் டா²னங் உபக³தேன ஸக்கா ஹோதி ப⁴க³வதோ ஸத்³த³ங் ஸோதுங், தத்த² டி²தோதி அத்தோ². ஸோ கிர க³ந்த⁴குடிபரிவேணஸம்மஜ்ஜனத்த²ங் ஆக³தோ அத்தனோ கம்மங் பஹாய ப⁴க³வதோ த⁴ம்மகோ⁴ஸங் ஸுணந்தோ அட்டா²ஸி. அத்³த³ஸாதி ததா³ கிர ப⁴க³வதோ ஆதி³தோவ பச்சயாகாரங் மனஸிகரொந்தஸ்ஸ ‘‘இத³ங் இமினா பச்சயேன ஹோதி, இத³ங் இமினா’’தி ஆவஜ்ஜதோ யாவ ப⁴வக்³கா³ ஏகங்க³ணங் அஹோஸி, ஸத்தா² மனஸிகாரங் பஹாய வசஸா ஸஜ்ஜா²யங் கரொந்தோ யதா²னுஸந்தி⁴னா தே³ஸனங் நிட்ட²பெத்வா, ‘‘அபி நு கோ² இமங் த⁴ம்மபரியாயங் கோசி அஸ்ஸோஸீ’’தி ஆவஜ்ஜெந்தோ தங் பி⁴க்கு²மத்³த³ஸ. தேன வுத்தங் ‘‘அத்³த³ஸா கோ² ப⁴க³வா’’தி.
45. Pañcame ñātiketi dvinnaṃ ñātakānaṃ gāme. Giñjakāvasatheti iṭṭhakāhi kate mahāpāsāde. Dhammapariyāyanti dhammakāraṇaṃ. Upassutīti upassutiṭṭhānaṃ, yaṃ ṭhānaṃ upagatena sakkā hoti bhagavato saddaṃ sotuṃ, tattha ṭhitoti attho. So kira gandhakuṭipariveṇasammajjanatthaṃ āgato attano kammaṃ pahāya bhagavato dhammaghosaṃ suṇanto aṭṭhāsi. Addasāti tadā kira bhagavato āditova paccayākāraṃ manasikarontassa ‘‘idaṃ iminā paccayena hoti, idaṃ iminā’’ti āvajjato yāva bhavaggā ekaṅgaṇaṃ ahosi, satthā manasikāraṃ pahāya vacasā sajjhāyaṃ karonto yathānusandhinā desanaṃ niṭṭhapetvā, ‘‘api nu kho imaṃ dhammapariyāyaṃ koci assosī’’ti āvajjento taṃ bhikkhumaddasa. Tena vuttaṃ ‘‘addasā kho bhagavā’’ti.
அஸ்ஸோஸி நோதி அஸ்ஸோஸி நு. அத² வா அஸ்ஸோஸி நோதி அம்ஹாகங் பா⁴ஸந்தானங் அஸ்ஸோஸீதி. உக்³க³ண்ஹாஹீதிஆதீ³ஸு ஸுத்வா துண்ஹீபூ⁴தோவ பகு³ணங் கரொந்தோ உக்³க³ண்ஹாதி நாம. பதா³னுபத³ங் க⁴டெத்வா வாசாய பரிசிதங் கரொந்தோ பரியாபுணாதி நாம. உப⁴யதா²பி பகு³ணங் ஆதா⁴ரப்பத்தங் கரொந்தோ தா⁴ரேதி நாம. அத்த²ஸங்ஹிதோதி காரணனிஸ்ஸிதோ. ஆதி³ப்³ரஹ்மசரியகோதி மக்³க³ப்³ரஹ்மசரியஸ்ஸ ஆதி³ பதிட்டா²னபூ⁴தோ. இதி தீஸுபி இமேஸு ஸுத்தேஸு வட்டவிவட்டமேவ கதி²தங். பஞ்சமங்.
Assosinoti assosi nu. Atha vā assosi noti amhākaṃ bhāsantānaṃ assosīti. Uggaṇhāhītiādīsu sutvā tuṇhībhūtova paguṇaṃ karonto uggaṇhāti nāma. Padānupadaṃ ghaṭetvā vācāya paricitaṃ karonto pariyāpuṇāti nāma. Ubhayathāpi paguṇaṃ ādhārappattaṃ karonto dhāreti nāma. Atthasaṃhitoti kāraṇanissito. Ādibrahmacariyakoti maggabrahmacariyassa ādi patiṭṭhānabhūto. Iti tīsupi imesu suttesu vaṭṭavivaṭṭameva kathitaṃ. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஞாதிகஸுத்தங் • 5. Ñātikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஞாதிகஸுத்தவண்ணனா • 5. Ñātikasuttavaṇṇanā
