| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೫. ಞಾತಿಕಸುತ್ತವಣ್ಣನಾ
5. Ñātikasuttavaṇṇanā
೪೫. ಪಞ್ಚಮೇ ಞಾತಿಕೇತಿ ದ್ವಿನ್ನಂ ಞಾತಕಾನಂ ಗಾಮೇ। ಗಿಞ್ಜಕಾವಸಥೇತಿ ಇಟ್ಠಕಾಹಿ ಕತೇ ಮಹಾಪಾಸಾದೇ। ಧಮ್ಮಪರಿಯಾಯನ್ತಿ ಧಮ್ಮಕಾರಣಂ। ಉಪಸ್ಸುತೀತಿ ಉಪಸ್ಸುತಿಟ್ಠಾನಂ, ಯಂ ಠಾನಂ ಉಪಗತೇನ ಸಕ್ಕಾ ಹೋತಿ ಭಗವತೋ ಸದ್ದಂ ಸೋತುಂ, ತತ್ಥ ಠಿತೋತಿ ಅತ್ಥೋ। ಸೋ ಕಿರ ಗನ್ಧಕುಟಿಪರಿವೇಣಸಮ್ಮಜ್ಜನತ್ಥಂ ಆಗತೋ ಅತ್ತನೋ ಕಮ್ಮಂ ಪಹಾಯ ಭಗವತೋ ಧಮ್ಮಘೋಸಂ ಸುಣನ್ತೋ ಅಟ್ಠಾಸಿ। ಅದ್ದಸಾತಿ ತದಾ ಕಿರ ಭಗವತೋ ಆದಿತೋವ ಪಚ್ಚಯಾಕಾರಂ ಮನಸಿಕರೋನ್ತಸ್ಸ ‘‘ಇದಂ ಇಮಿನಾ ಪಚ್ಚಯೇನ ಹೋತಿ, ಇದಂ ಇಮಿನಾ’’ತಿ ಆವಜ್ಜತೋ ಯಾವ ಭವಗ್ಗಾ ಏಕಙ್ಗಣಂ ಅಹೋಸಿ, ಸತ್ಥಾ ಮನಸಿಕಾರಂ ಪಹಾಯ ವಚಸಾ ಸಜ್ಝಾಯಂ ಕರೋನ್ತೋ ಯಥಾನುಸನ್ಧಿನಾ ದೇಸನಂ ನಿಟ್ಠಪೇತ್ವಾ, ‘‘ಅಪಿ ನು ಖೋ ಇಮಂ ಧಮ್ಮಪರಿಯಾಯಂ ಕೋಚಿ ಅಸ್ಸೋಸೀ’’ತಿ ಆವಜ್ಜೇನ್ತೋ ತಂ ಭಿಕ್ಖುಮದ್ದಸ। ತೇನ ವುತ್ತಂ ‘‘ಅದ್ದಸಾ ಖೋ ಭಗವಾ’’ತಿ।
45. Pañcame ñātiketi dvinnaṃ ñātakānaṃ gāme. Giñjakāvasatheti iṭṭhakāhi kate mahāpāsāde. Dhammapariyāyanti dhammakāraṇaṃ. Upassutīti upassutiṭṭhānaṃ, yaṃ ṭhānaṃ upagatena sakkā hoti bhagavato saddaṃ sotuṃ, tattha ṭhitoti attho. So kira gandhakuṭipariveṇasammajjanatthaṃ āgato attano kammaṃ pahāya bhagavato dhammaghosaṃ suṇanto aṭṭhāsi. Addasāti tadā kira bhagavato āditova paccayākāraṃ manasikarontassa ‘‘idaṃ iminā paccayena hoti, idaṃ iminā’’ti āvajjato yāva bhavaggā ekaṅgaṇaṃ ahosi, satthā manasikāraṃ pahāya vacasā sajjhāyaṃ karonto yathānusandhinā desanaṃ niṭṭhapetvā, ‘‘api nu kho imaṃ dhammapariyāyaṃ koci assosī’’ti āvajjento taṃ bhikkhumaddasa. Tena vuttaṃ ‘‘addasā kho bhagavā’’ti.
ಅಸ್ಸೋಸಿ ನೋತಿ ಅಸ್ಸೋಸಿ ನು। ಅಥ ವಾ ಅಸ್ಸೋಸಿ ನೋತಿ ಅಮ್ಹಾಕಂ ಭಾಸನ್ತಾನಂ ಅಸ್ಸೋಸೀತಿ। ಉಗ್ಗಣ್ಹಾಹೀತಿಆದೀಸು ಸುತ್ವಾ ತುಣ್ಹೀಭೂತೋವ ಪಗುಣಂ ಕರೋನ್ತೋ ಉಗ್ಗಣ್ಹಾತಿ ನಾಮ। ಪದಾನುಪದಂ ಘಟೇತ್ವಾ ವಾಚಾಯ ಪರಿಚಿತಂ ಕರೋನ್ತೋ ಪರಿಯಾಪುಣಾತಿ ನಾಮ। ಉಭಯಥಾಪಿ ಪಗುಣಂ ಆಧಾರಪ್ಪತ್ತಂ ಕರೋನ್ತೋ ಧಾರೇತಿ ನಾಮ। ಅತ್ಥಸಂಹಿತೋತಿ ಕಾರಣನಿಸ್ಸಿತೋ। ಆದಿಬ್ರಹ್ಮಚರಿಯಕೋತಿ ಮಗ್ಗಬ್ರಹ್ಮಚರಿಯಸ್ಸ ಆದಿ ಪತಿಟ್ಠಾನಭೂತೋ। ಇತಿ ತೀಸುಪಿ ಇಮೇಸು ಸುತ್ತೇಸು ವಟ್ಟವಿವಟ್ಟಮೇವ ಕಥಿತಂ। ಪಞ್ಚಮಂ।
Assosinoti assosi nu. Atha vā assosi noti amhākaṃ bhāsantānaṃ assosīti. Uggaṇhāhītiādīsu sutvā tuṇhībhūtova paguṇaṃ karonto uggaṇhāti nāma. Padānupadaṃ ghaṭetvā vācāya paricitaṃ karonto pariyāpuṇāti nāma. Ubhayathāpi paguṇaṃ ādhārappattaṃ karonto dhāreti nāma. Atthasaṃhitoti kāraṇanissito. Ādibrahmacariyakoti maggabrahmacariyassa ādi patiṭṭhānabhūto. Iti tīsupi imesu suttesu vaṭṭavivaṭṭameva kathitaṃ. Pañcamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಞಾತಿಕಸುತ್ತಂ • 5. Ñātikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫. ಞಾತಿಕಸುತ್ತವಣ್ಣನಾ • 5. Ñātikasuttavaṇṇanā
