| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5. ඤාතිකසුත්‌තවණ්‌ණනා
5. Ñātikasuttavaṇṇanā
45. පඤ්‌චමෙ ඤාතිකෙති ද්‌වින්‌නං ඤාතකානං ගාමෙ. ගිඤ්‌ජකාවසථෙති ඉට්‌ඨකාහි කතෙ මහාපාසාදෙ. ධම්‌මපරියායන්‌ති ධම්‌මකාරණං. උපස්‌සුතීති උපස්‌සුතිට්‌ඨානං, යං ඨානං උපගතෙන සක්‌කා හොති භගවතො සද්‌දං සොතුං, තත්‌ථ ඨිතොති අත්‌ථො. සො කිර ගන්‌ධකුටිපරිවෙණසම්‌මජ්‌ජනත්‌ථං ආගතො අත්‌තනො කම්‌මං පහාය භගවතො ධම්‌මඝොසං සුණන්‌තො අට්‌ඨාසි. අද්‌දසාති තදා කිර භගවතො ආදිතොව පච්‌චයාකාරං මනසිකරොන්‌තස්‌ස ‘‘ඉදං ඉමිනා පච්‌චයෙන හොති, ඉදං ඉමිනා’’ති ආවජ්‌ජතො යාව භවග්‌ගා එකඞ්‌ගණං අහොසි, සත්‌ථා මනසිකාරං පහාය වචසා සජ්‌ඣායං කරොන්‌තො යථානුසන්‌ධිනා දෙසනං නිට්‌ඨපෙත්‌වා, ‘‘අපි නු ඛො ඉමං ධම්‌මපරියායං කොචි අස්‌සොසී’’ති ආවජ්‌ජෙන්‌තො තං භික්‌ඛුමද්‌දස. තෙන වුත්‌තං ‘‘අද්‌දසා ඛො භගවා’’ති.
45. Pañcame ñātiketi dvinnaṃ ñātakānaṃ gāme. Giñjakāvasatheti iṭṭhakāhi kate mahāpāsāde. Dhammapariyāyanti dhammakāraṇaṃ. Upassutīti upassutiṭṭhānaṃ, yaṃ ṭhānaṃ upagatena sakkā hoti bhagavato saddaṃ sotuṃ, tattha ṭhitoti attho. So kira gandhakuṭipariveṇasammajjanatthaṃ āgato attano kammaṃ pahāya bhagavato dhammaghosaṃ suṇanto aṭṭhāsi. Addasāti tadā kira bhagavato āditova paccayākāraṃ manasikarontassa ‘‘idaṃ iminā paccayena hoti, idaṃ iminā’’ti āvajjato yāva bhavaggā ekaṅgaṇaṃ ahosi, satthā manasikāraṃ pahāya vacasā sajjhāyaṃ karonto yathānusandhinā desanaṃ niṭṭhapetvā, ‘‘api nu kho imaṃ dhammapariyāyaṃ koci assosī’’ti āvajjento taṃ bhikkhumaddasa. Tena vuttaṃ ‘‘addasā kho bhagavā’’ti.
අස්‌සොසි නොති අස්‌සොසි නු. අථ වා අස්‌සොසි නොති අම්‌හාකං භාසන්‌තානං අස්‌සොසීති. උග්‌ගණ්‌හාහීතිආදීසු සුත්‌වා තුණ්‌හීභූතොව පගුණං කරොන්‌තො උග්‌ගණ්‌හාති නාම. පදානුපදං ඝටෙත්‌වා වාචාය පරිචිතං කරොන්‌තො පරියාපුණාති නාම. උභයථාපි පගුණං ආධාරප්‌පත්‌තං කරොන්‌තො ධාරෙති නාම. අත්‌ථසංහිතොති කාරණනිස්‌සිතො. ආදිබ්‍රහ්‌මචරියකොති මග්‌ගබ්‍රහ්‌මචරියස්‌ස ආදි පතිට්‌ඨානභූතො. ඉති තීසුපි ඉමෙසු සුත්‌තෙසු වට්‌ටවිවට්‌ටමෙව කථිතං. පඤ්‌චමං.
Assosinoti assosi nu. Atha vā assosi noti amhākaṃ bhāsantānaṃ assosīti. Uggaṇhāhītiādīsu sutvā tuṇhībhūtova paguṇaṃ karonto uggaṇhāti nāma. Padānupadaṃ ghaṭetvā vācāya paricitaṃ karonto pariyāpuṇāti nāma. Ubhayathāpi paguṇaṃ ādhārappattaṃ karonto dhāreti nāma. Atthasaṃhitoti kāraṇanissito. Ādibrahmacariyakoti maggabrahmacariyassa ādi patiṭṭhānabhūto. Iti tīsupi imesu suttesu vaṭṭavivaṭṭameva kathitaṃ. Pañcamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. ඤාතිකසුත්‌තං • 5. Ñātikasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. ඤාතිකසුත්‌තවණ්‌ණනා • 5. Ñātikasuttavaṇṇanā
