| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੫. ਞਾਤਿਕਸੁਤ੍ਤવਣ੍ਣਨਾ
5. Ñātikasuttavaṇṇanā
੪੫. ਪਞ੍ਚਮੇ ਞਾਤਿਕੇਤਿ ਦ੍વਿਨ੍ਨਂ ਞਾਤਕਾਨਂ ਗਾਮੇ। ਗਿਞ੍ਜਕਾવਸਥੇਤਿ ਇਟ੍ਠਕਾਹਿ ਕਤੇ ਮਹਾਪਾਸਾਦੇ। ਧਮ੍ਮਪਰਿਯਾਯਨ੍ਤਿ ਧਮ੍ਮਕਾਰਣਂ। ਉਪਸ੍ਸੁਤੀਤਿ ਉਪਸ੍ਸੁਤਿਟ੍ਠਾਨਂ, ਯਂ ਠਾਨਂ ਉਪਗਤੇਨ ਸਕ੍ਕਾ ਹੋਤਿ ਭਗવਤੋ ਸਦ੍ਦਂ ਸੋਤੁਂ, ਤਤ੍ਥ ਠਿਤੋਤਿ ਅਤ੍ਥੋ। ਸੋ ਕਿਰ ਗਨ੍ਧਕੁਟਿਪਰਿવੇਣਸਮ੍ਮਜ੍ਜਨਤ੍ਥਂ ਆਗਤੋ ਅਤ੍ਤਨੋ ਕਮ੍ਮਂ ਪਹਾਯ ਭਗવਤੋ ਧਮ੍ਮਘੋਸਂ ਸੁਣਨ੍ਤੋ ਅਟ੍ਠਾਸਿ। ਅਦ੍ਦਸਾਤਿ ਤਦਾ ਕਿਰ ਭਗવਤੋ ਆਦਿਤੋવ ਪਚ੍ਚਯਾਕਾਰਂ ਮਨਸਿਕਰੋਨ੍ਤਸ੍ਸ ‘‘ਇਦਂ ਇਮਿਨਾ ਪਚ੍ਚਯੇਨ ਹੋਤਿ, ਇਦਂ ਇਮਿਨਾ’’ਤਿ ਆવਜ੍ਜਤੋ ਯਾવ ਭવਗ੍ਗਾ ਏਕਙ੍ਗਣਂ ਅਹੋਸਿ, ਸਤ੍ਥਾ ਮਨਸਿਕਾਰਂ ਪਹਾਯ વਚਸਾ ਸਜ੍ਝਾਯਂ ਕਰੋਨ੍ਤੋ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਪੇਤ੍વਾ, ‘‘ਅਪਿ ਨੁ ਖੋ ਇਮਂ ਧਮ੍ਮਪਰਿਯਾਯਂ ਕੋਚਿ ਅਸ੍ਸੋਸੀ’’ਤਿ ਆવਜ੍ਜੇਨ੍ਤੋ ਤਂ ਭਿਕ੍ਖੁਮਦ੍ਦਸ। ਤੇਨ વੁਤ੍ਤਂ ‘‘ਅਦ੍ਦਸਾ ਖੋ ਭਗવਾ’’ਤਿ।
45. Pañcame ñātiketi dvinnaṃ ñātakānaṃ gāme. Giñjakāvasatheti iṭṭhakāhi kate mahāpāsāde. Dhammapariyāyanti dhammakāraṇaṃ. Upassutīti upassutiṭṭhānaṃ, yaṃ ṭhānaṃ upagatena sakkā hoti bhagavato saddaṃ sotuṃ, tattha ṭhitoti attho. So kira gandhakuṭipariveṇasammajjanatthaṃ āgato attano kammaṃ pahāya bhagavato dhammaghosaṃ suṇanto aṭṭhāsi. Addasāti tadā kira bhagavato āditova paccayākāraṃ manasikarontassa ‘‘idaṃ iminā paccayena hoti, idaṃ iminā’’ti āvajjato yāva bhavaggā ekaṅgaṇaṃ ahosi, satthā manasikāraṃ pahāya vacasā sajjhāyaṃ karonto yathānusandhinā desanaṃ niṭṭhapetvā, ‘‘api nu kho imaṃ dhammapariyāyaṃ koci assosī’’ti āvajjento taṃ bhikkhumaddasa. Tena vuttaṃ ‘‘addasā kho bhagavā’’ti.
ਅਸ੍ਸੋਸਿ ਨੋਤਿ ਅਸ੍ਸੋਸਿ ਨੁ। ਅਥ વਾ ਅਸ੍ਸੋਸਿ ਨੋਤਿ ਅਮ੍ਹਾਕਂ ਭਾਸਨ੍ਤਾਨਂ ਅਸ੍ਸੋਸੀਤਿ। ਉਗ੍ਗਣ੍ਹਾਹੀਤਿਆਦੀਸੁ ਸੁਤ੍વਾ ਤੁਣ੍ਹੀਭੂਤੋવ ਪਗੁਣਂ ਕਰੋਨ੍ਤੋ ਉਗ੍ਗਣ੍ਹਾਤਿ ਨਾਮ। ਪਦਾਨੁਪਦਂ ਘਟੇਤ੍વਾ વਾਚਾਯ ਪਰਿਚਿਤਂ ਕਰੋਨ੍ਤੋ ਪਰਿਯਾਪੁਣਾਤਿ ਨਾਮ। ਉਭਯਥਾਪਿ ਪਗੁਣਂ ਆਧਾਰਪ੍ਪਤ੍ਤਂ ਕਰੋਨ੍ਤੋ ਧਾਰੇਤਿ ਨਾਮ। ਅਤ੍ਥਸਂਹਿਤੋਤਿ ਕਾਰਣਨਿਸ੍ਸਿਤੋ। ਆਦਿਬ੍ਰਹ੍ਮਚਰਿਯਕੋਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿ ਪਤਿਟ੍ਠਾਨਭੂਤੋ। ਇਤਿ ਤੀਸੁਪਿ ਇਮੇਸੁ ਸੁਤ੍ਤੇਸੁ વਟ੍ਟવਿવਟ੍ਟਮੇવ ਕਥਿਤਂ। ਪਞ੍ਚਮਂ।
Assosinoti assosi nu. Atha vā assosi noti amhākaṃ bhāsantānaṃ assosīti. Uggaṇhāhītiādīsu sutvā tuṇhībhūtova paguṇaṃ karonto uggaṇhāti nāma. Padānupadaṃ ghaṭetvā vācāya paricitaṃ karonto pariyāpuṇāti nāma. Ubhayathāpi paguṇaṃ ādhārappattaṃ karonto dhāreti nāma. Atthasaṃhitoti kāraṇanissito. Ādibrahmacariyakoti maggabrahmacariyassa ādi patiṭṭhānabhūto. Iti tīsupi imesu suttesu vaṭṭavivaṭṭameva kathitaṃ. Pañcamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਞਾਤਿਕਸੁਤ੍ਤਂ • 5. Ñātikasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੫. ਞਾਤਿਕਸੁਤ੍ਤવਣ੍ਣਨਾ • 5. Ñātikasuttavaṇṇanā
