| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৭. সত্তরসমৰগ্গো
17. Sattarasamavaggo
(১৬৭) ২. নত্থি অরহতো অকালমচ্চূতিকথা
(167) 2. Natthi arahato akālamaccūtikathā
৭৮০. নত্থি অরহতো অকালমচ্চূতি? আমন্তা। নত্থি অরহন্তঘাতকোতি? ন হেৰং ৰত্তব্বে…পে॰… অত্থি অরহন্তঘাতকোতি? আমন্তা। অত্থি অরহতো অকালমচ্চূতি? ন হেৰং ৰত্তব্বে…পে॰… নত্থি অরহতো অকালমচ্চূতি? আমন্তা। যো অরহন্তং জীৰিতা ৰোরোপেতি, সতি জীৰিতে জীৰিতাৰসেসে জীৰিতা ৰোরোপেতি, অসতি জীৰিতে জীৰিতাৰসেসে জীৰিতা ৰোরোপেতীতি? সতি জীৰিতে জীৰিতাৰসেসে জীৰিতা ৰোরোপেতীতি। হঞ্চি সতি জীৰিতে জীৰিতাৰসেসে জীৰিতা ৰোরোপেতি, নো চ ৰত রে ৰত্তব্বে – ‘‘নত্থি অরহতো অকালমচ্চূ’’তি। অসতি জীৰিতে জীৰিতাৰসেসে জীৰিতা ৰোরোপেতীতি, নত্থি অরহন্তঘাতকোতি? ন হেৰং ৰত্তব্বে…পে॰…।
780. Natthi arahato akālamaccūti? Āmantā. Natthi arahantaghātakoti? Na hevaṃ vattabbe…pe… atthi arahantaghātakoti? Āmantā. Atthi arahato akālamaccūti? Na hevaṃ vattabbe…pe… natthi arahato akālamaccūti? Āmantā. Yo arahantaṃ jīvitā voropeti, sati jīvite jīvitāvasese jīvitā voropeti, asati jīvite jīvitāvasese jīvitā voropetīti? Sati jīvite jīvitāvasese jīvitā voropetīti. Hañci sati jīvite jīvitāvasese jīvitā voropeti, no ca vata re vattabbe – ‘‘natthi arahato akālamaccū’’ti. Asati jīvite jīvitāvasese jīvitā voropetīti, natthi arahantaghātakoti? Na hevaṃ vattabbe…pe….
৭৮১. নত্থি অরহতো অকালমচ্চূতি? আমন্তা। অরহতো কাযে ৰিসং ন কমেয্য, সত্থং ন কমেয্য, অগ্গি ন কমেয্যাতি? ন হেৰং ৰত্তব্বে…পে॰… ননু অরহতো কাযে ৰিসং কমেয্য , সত্থং কমেয্য, অগ্গি কমেয্যাতি? আমন্তা। হঞ্চি অরহতো কাযে ৰিসং কমেয্য, সত্থং কমেয্য, অগ্গি কমেয্য, নো চ ৰত রে ৰত্তব্বে – ‘‘নত্থি অরহতো অকালমচ্চূ’’তি।
781. Natthi arahato akālamaccūti? Āmantā. Arahato kāye visaṃ na kameyya, satthaṃ na kameyya, aggi na kameyyāti? Na hevaṃ vattabbe…pe… nanu arahato kāye visaṃ kameyya , satthaṃ kameyya, aggi kameyyāti? Āmantā. Hañci arahato kāye visaṃ kameyya, satthaṃ kameyya, aggi kameyya, no ca vata re vattabbe – ‘‘natthi arahato akālamaccū’’ti.
অরহতো কাযে ৰিসং ন কমেয্য, সত্থং ন কমেয্য, অগ্গি ন কমেয্যাতি? আমন্তা। নত্থি অরহন্তঘাতকোতি? ন হেৰং ৰত্তব্বে…পে॰…।
Arahato kāye visaṃ na kameyya, satthaṃ na kameyya, aggi na kameyyāti? Āmantā. Natthi arahantaghātakoti? Na hevaṃ vattabbe…pe….
৭৮২. অত্থি অরহতো অকালমচ্চূতি? আমন্তা। ননু ৰুত্তং ভগৰতা – ‘‘নাহং, ভিক্খৰে, সঞ্চেতনিকানং কম্মানং কতানং উপচিতানং অপ্পটিসংৰেদিত্ৰা ব্যন্তীভাৰং ৰদামি; তঞ্চ খো দিট্ঠেৰ ধম্মে উপপজ্জং ৰা অপরে ৰা পরিযাযে’’তি। অত্থেৰ সুত্তন্তোতি? আমন্তা । তেন হি নত্থি অরহতো অকালমচ্চূতি।
782. Atthi arahato akālamaccūti? Āmantā. Nanu vuttaṃ bhagavatā – ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi; tañca kho diṭṭheva dhamme upapajjaṃ vā apare vā pariyāye’’ti. Attheva suttantoti? Āmantā . Tena hi natthi arahato akālamaccūti.
নত্থি অরহতো অকালমচ্চূতিকথা নিট্ঠিতা।
Natthi arahato akālamaccūtikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. নত্থি অরহতো অকালমচ্চূতিকথাৰণ্ণনা • 2. Natthi arahato akālamaccūtikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. নত্থিঅরহতোঅকালমচ্চূতিকথাৰণ্ণনা • 2. Natthiarahatoakālamaccūtikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. নত্থিঅরহতোঅকালমচ্চূতিকথাৰণ্ণনা • 2. Natthiarahatoakālamaccūtikathāvaṇṇanā
