| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१७. सत्तरसमवग्गो
17. Sattarasamavaggo
(१६७) २. नत्थि अरहतो अकालमच्चूतिकथा
(167) 2. Natthi arahato akālamaccūtikathā
७८०. नत्थि अरहतो अकालमच्चूति? आमन्ता। नत्थि अरहन्तघातकोति? न हेवं वत्तब्बे…पे॰… अत्थि अरहन्तघातकोति? आमन्ता। अत्थि अरहतो अकालमच्चूति? न हेवं वत्तब्बे…पे॰… नत्थि अरहतो अकालमच्चूति? आमन्ता। यो अरहन्तं जीविता वोरोपेति, सति जीविते जीवितावसेसे जीविता वोरोपेति, असति जीविते जीवितावसेसे जीविता वोरोपेतीति? सति जीविते जीवितावसेसे जीविता वोरोपेतीति। हञ्चि सति जीविते जीवितावसेसे जीविता वोरोपेति, नो च वत रे वत्तब्बे – ‘‘नत्थि अरहतो अकालमच्चू’’ति। असति जीविते जीवितावसेसे जीविता वोरोपेतीति, नत्थि अरहन्तघातकोति? न हेवं वत्तब्बे…पे॰…।
780. Natthi arahato akālamaccūti? Āmantā. Natthi arahantaghātakoti? Na hevaṃ vattabbe…pe… atthi arahantaghātakoti? Āmantā. Atthi arahato akālamaccūti? Na hevaṃ vattabbe…pe… natthi arahato akālamaccūti? Āmantā. Yo arahantaṃ jīvitā voropeti, sati jīvite jīvitāvasese jīvitā voropeti, asati jīvite jīvitāvasese jīvitā voropetīti? Sati jīvite jīvitāvasese jīvitā voropetīti. Hañci sati jīvite jīvitāvasese jīvitā voropeti, no ca vata re vattabbe – ‘‘natthi arahato akālamaccū’’ti. Asati jīvite jīvitāvasese jīvitā voropetīti, natthi arahantaghātakoti? Na hevaṃ vattabbe…pe….
७८१. नत्थि अरहतो अकालमच्चूति? आमन्ता। अरहतो काये विसं न कमेय्य, सत्थं न कमेय्य, अग्गि न कमेय्याति? न हेवं वत्तब्बे…पे॰… ननु अरहतो काये विसं कमेय्य , सत्थं कमेय्य, अग्गि कमेय्याति? आमन्ता। हञ्चि अरहतो काये विसं कमेय्य, सत्थं कमेय्य, अग्गि कमेय्य, नो च वत रे वत्तब्बे – ‘‘नत्थि अरहतो अकालमच्चू’’ति।
781. Natthi arahato akālamaccūti? Āmantā. Arahato kāye visaṃ na kameyya, satthaṃ na kameyya, aggi na kameyyāti? Na hevaṃ vattabbe…pe… nanu arahato kāye visaṃ kameyya , satthaṃ kameyya, aggi kameyyāti? Āmantā. Hañci arahato kāye visaṃ kameyya, satthaṃ kameyya, aggi kameyya, no ca vata re vattabbe – ‘‘natthi arahato akālamaccū’’ti.
अरहतो काये विसं न कमेय्य, सत्थं न कमेय्य, अग्गि न कमेय्याति? आमन्ता। नत्थि अरहन्तघातकोति? न हेवं वत्तब्बे…पे॰…।
Arahato kāye visaṃ na kameyya, satthaṃ na kameyya, aggi na kameyyāti? Āmantā. Natthi arahantaghātakoti? Na hevaṃ vattabbe…pe….
७८२. अत्थि अरहतो अकालमच्चूति? आमन्ता। ननु वुत्तं भगवता – ‘‘नाहं, भिक्खवे, सञ्चेतनिकानं कम्मानं कतानं उपचितानं अप्पटिसंवेदित्वा ब्यन्तीभावं वदामि; तञ्च खो दिट्ठेव धम्मे उपपज्जं वा अपरे वा परियाये’’ति। अत्थेव सुत्तन्तोति? आमन्ता । तेन हि नत्थि अरहतो अकालमच्चूति।
782. Atthi arahato akālamaccūti? Āmantā. Nanu vuttaṃ bhagavatā – ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi; tañca kho diṭṭheva dhamme upapajjaṃ vā apare vā pariyāye’’ti. Attheva suttantoti? Āmantā . Tena hi natthi arahato akālamaccūti.
नत्थि अरहतो अकालमच्चूतिकथा निट्ठिता।
Natthi arahato akālamaccūtikathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / २. नत्थि अरहतो अकालमच्चूतिकथावण्णना • 2. Natthi arahato akālamaccūtikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / २. नत्थिअरहतोअकालमच्चूतिकथावण्णना • 2. Natthiarahatoakālamaccūtikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / २. नत्थिअरहतोअकालमच्चूतिकथावण्णना • 2. Natthiarahatoakālamaccūtikathāvaṇṇanā
