| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
17. සත්‌තරසමවග්‌ගො
17. Sattarasamavaggo
(167) 2. නත්‌ථි අරහතො අකාලමච්‌චූතිකථා
(167) 2. Natthi arahato akālamaccūtikathā
780. නත්‌ථි අරහතො අකාලමච්‌චූති? ආමන්‌තා. නත්‌ථි අරහන්‌තඝාතකොති? න හෙවං වත්‌තබ්‌බෙ…පෙ.… අත්‌ථි අරහන්‌තඝාතකොති? ආමන්‌තා. අත්‌ථි අරහතො අකාලමච්‌චූති? න හෙවං වත්‌තබ්‌බෙ…පෙ.… නත්‌ථි අරහතො අකාලමච්‌චූති? ආමන්‌තා. යො අරහන්‌තං ජීවිතා වොරොපෙති, සති ජීවිතෙ ජීවිතාවසෙසෙ ජීවිතා වොරොපෙති, අසති ජීවිතෙ ජීවිතාවසෙසෙ ජීවිතා වොරොපෙතීති? සති ජීවිතෙ ජීවිතාවසෙසෙ ජීවිතා වොරොපෙතීති. හඤ්‌චි සති ජීවිතෙ ජීවිතාවසෙසෙ ජීවිතා වොරොපෙති, නො ච වත රෙ වත්‌තබ්‌බෙ – ‘‘නත්‌ථි අරහතො අකාලමච්‌චූ’’ති. අසති ජීවිතෙ ජීවිතාවසෙසෙ ජීවිතා වොරොපෙතීති, නත්‌ථි අරහන්‌තඝාතකොති? න හෙවං වත්‌තබ්‌බෙ…පෙ.….
780. Natthi arahato akālamaccūti? Āmantā. Natthi arahantaghātakoti? Na hevaṃ vattabbe…pe… atthi arahantaghātakoti? Āmantā. Atthi arahato akālamaccūti? Na hevaṃ vattabbe…pe… natthi arahato akālamaccūti? Āmantā. Yo arahantaṃ jīvitā voropeti, sati jīvite jīvitāvasese jīvitā voropeti, asati jīvite jīvitāvasese jīvitā voropetīti? Sati jīvite jīvitāvasese jīvitā voropetīti. Hañci sati jīvite jīvitāvasese jīvitā voropeti, no ca vata re vattabbe – ‘‘natthi arahato akālamaccū’’ti. Asati jīvite jīvitāvasese jīvitā voropetīti, natthi arahantaghātakoti? Na hevaṃ vattabbe…pe….
781. නත්‌ථි අරහතො අකාලමච්‌චූති? ආමන්‌තා. අරහතො කායෙ විසං න කමෙය්‍ය, සත්‌ථං න කමෙය්‍ය, අග්‌ගි න කමෙය්‍යාති? න හෙවං වත්‌තබ්‌බෙ…පෙ.… නනු අරහතො කායෙ විසං කමෙය්‍ය , සත්‌ථං කමෙය්‍ය, අග්‌ගි කමෙය්‍යාති? ආමන්‌තා. හඤ්‌චි අරහතො කායෙ විසං කමෙය්‍ය, සත්‌ථං කමෙය්‍ය, අග්‌ගි කමෙය්‍ය, නො ච වත රෙ වත්‌තබ්‌බෙ – ‘‘නත්‌ථි අරහතො අකාලමච්‌චූ’’ති.
781. Natthi arahato akālamaccūti? Āmantā. Arahato kāye visaṃ na kameyya, satthaṃ na kameyya, aggi na kameyyāti? Na hevaṃ vattabbe…pe… nanu arahato kāye visaṃ kameyya , satthaṃ kameyya, aggi kameyyāti? Āmantā. Hañci arahato kāye visaṃ kameyya, satthaṃ kameyya, aggi kameyya, no ca vata re vattabbe – ‘‘natthi arahato akālamaccū’’ti.
අරහතො කායෙ විසං න කමෙය්‍ය, සත්‌ථං න කමෙය්‍ය, අග්‌ගි න කමෙය්‍යාති? ආමන්‌තා. නත්‌ථි අරහන්‌තඝාතකොති? න හෙවං වත්‌තබ්‌බෙ…පෙ.….
Arahato kāye visaṃ na kameyya, satthaṃ na kameyya, aggi na kameyyāti? Āmantā. Natthi arahantaghātakoti? Na hevaṃ vattabbe…pe….
782. අත්‌ථි අරහතො අකාලමච්‌චූති? ආමන්‌තා. නනු වුත්‌තං භගවතා – ‘‘නාහං, භික්‌ඛවෙ, සඤ්‌චෙතනිකානං කම්‌මානං කතානං උපචිතානං අප්‌පටිසංවෙදිත්‌වා බ්‍යන්‌තීභාවං වදාමි; තඤ්‌ච ඛො දිට්‌ඨෙව ධම්‌මෙ උපපජ්‌ජං වා අපරෙ වා පරියායෙ’’ති. අත්‌ථෙව සුත්‌තන්‌තොති? ආමන්‌තා . තෙන හි නත්‌ථි අරහතො අකාලමච්‌චූති.
782. Atthi arahato akālamaccūti? Āmantā. Nanu vuttaṃ bhagavatā – ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi; tañca kho diṭṭheva dhamme upapajjaṃ vā apare vā pariyāye’’ti. Attheva suttantoti? Āmantā . Tena hi natthi arahato akālamaccūti.
නත්‌ථි අරහතො අකාලමච්‌චූතිකථා නිට්‌ඨිතා.
Natthi arahato akālamaccūtikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 2. නත්‌ථි අරහතො අකාලමච්‌චූතිකථාවණ්‌ණනා • 2. Natthi arahato akālamaccūtikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 2. නත්‌ථිඅරහතොඅකාලමච්‌චූතිකථාවණ්‌ණනා • 2. Natthiarahatoakālamaccūtikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 2. නත්‌ථිඅරහතොඅකාලමච්‌චූතිකථාවණ්‌ණනා • 2. Natthiarahatoakālamaccūtikathāvaṇṇanā
