| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. நத்தி² அரஹதோ அகாலமச்சூதிகதா²வண்ணனா
2. Natthi arahato akālamaccūtikathāvaṇṇanā
780. இதா³னி நத்தி² அரஹதோ அகாலமச்சூதிகதா² நாம ஹோதி. தத்த² ‘‘நாஹங், பி⁴க்க²வே, ஸஞ்சேதனிகானங் கம்மானங் கதானங் உபசிதானங் அபடிஸங்வேதி³த்வா ப்³யந்தீபா⁴வங் வதா³மீ’’தி (அ॰ நி॰ 10.217) ஸுத்தஸ்ஸ அத்த²ங் அயோனிஸோ க³ஹெத்வா ‘‘அரஹதா நாம ஸப்³ப³கம்மவிபாகங் படிஸங்வேத³யித்வாவ பரினிப்³பா³யிதப்³ப³ங், தஸ்மா நத்தி², அரஹதோ அகாலமச்சூ’’தி யேஸங் லத்³தி⁴, ஸெய்யதா²பி ராஜகி³ரிகானஞ்சேவ ஸித்³த⁴த்தி²கானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘ஸசே தஸ்ஸ நத்தி² அகாலமச்சு, அரஹந்தகா⁴தகேன நாம ந ப⁴விதப்³ப³’’ந்தி சோதே³துங் நத்தி² அரஹந்தகா⁴தகோதி ஆஹ. இதரோ ஆனந்தரியகம்மஸ்ஸ சேவ தாதி³ஸானஞ்ச புக்³க³லானங் ஸப்³பா⁴வதோ படிக்கி²பதி.
780. Idāni natthi arahato akālamaccūtikathā nāma hoti. Tattha ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ apaṭisaṃveditvā byantībhāvaṃ vadāmī’’ti (a. ni. 10.217) suttassa atthaṃ ayoniso gahetvā ‘‘arahatā nāma sabbakammavipākaṃ paṭisaṃvedayitvāva parinibbāyitabbaṃ, tasmā natthi, arahato akālamaccū’’ti yesaṃ laddhi, seyyathāpi rājagirikānañceva siddhatthikānañca; te sandhāya pucchā sakavādissa, paṭiññā itarassa. Atha naṃ ‘‘sace tassa natthi akālamaccu, arahantaghātakena nāma na bhavitabba’’nti codetuṃ natthi arahantaghātakoti āha. Itaro ānantariyakammassa ceva tādisānañca puggalānaṃ sabbhāvato paṭikkhipati.
781. விஸங் ந கமெய்யாதி பஞ்ஹே ‘‘யாவ புப்³பே³ கதகம்மங் பரிக்க²யங் ந க³ச்ச²தி, தாவ ந கமதீ’’தி லத்³தி⁴யா படிக்கி²பதி. ஸேஸமெத்த² யதா²பாளிமேவ நிய்யாதி.
781. Visaṃ na kameyyāti pañhe ‘‘yāva pubbe katakammaṃ parikkhayaṃ na gacchati, tāva na kamatī’’ti laddhiyā paṭikkhipati. Sesamettha yathāpāḷimeva niyyāti.
782. நாஹங், பி⁴க்க²வேதி ஸுத்தங் இத³ங் ஸந்தா⁴ய வுத்தங் – ஸஞ்சேதனிகானங் கம்மானங் கதானங் விபாகங் அபடிஸங்வேதி³த்வா அவிந்தி³த்வா அனநுப⁴வித்வா ப்³யந்தீபா⁴வங் தேஸங் கம்மானங் பரிவடுமபரிச்சி²ன்னபா⁴வங் ந வதா³மி, தஞ்ச கோ² தி³ட்ட²த⁴ம்மவேத³னீயானங் தி³ட்டே²வ த⁴ம்மே, ந ததோ பரங், உபபஜ்ஜவேத³னீயானங் அனந்தரங் உபபத்திங் உபபஜ்ஜித்வாவ ந ததோ பரங், அபராபரியவேத³னீயானங் யதா³ விபாகோகாஸங் லப⁴ந்தி, ததா²ரூபே அபராபரே வா பரியாயே. ஏவங் ஸப்³ப³தா²பி ஸங்ஸாரபவத்தே ஸதி லத்³த⁴விபாகவாரே கம்மே ந விஜ்ஜதேஸோ ஜக³திப்பதே³ஸோ, யத்த²ட்டி²தோ முச்செய்ய பாபகம்மாதி. ஏவங் ஸந்தே யதே³தங் ‘‘அலத்³த⁴விபாகவாரம்பி கம்மங் அவஸ்ஸங் அரஹதோ படிஸங்வேதி³தப்³ப³’’ந்தி கப்பனாவஸேன ‘‘நத்தி² அரஹதோ அகாலமச்சூ’’தி லத்³தி⁴பதிட்டா²பனங் கதங், தங் து³க்கடமேவாதி.
782. Nāhaṃ,bhikkhaveti suttaṃ idaṃ sandhāya vuttaṃ – sañcetanikānaṃ kammānaṃ katānaṃ vipākaṃ apaṭisaṃveditvā avinditvā ananubhavitvā byantībhāvaṃ tesaṃ kammānaṃ parivaṭumaparicchinnabhāvaṃ na vadāmi, tañca kho diṭṭhadhammavedanīyānaṃ diṭṭheva dhamme, na tato paraṃ, upapajjavedanīyānaṃ anantaraṃ upapattiṃ upapajjitvāva na tato paraṃ, aparāpariyavedanīyānaṃ yadā vipākokāsaṃ labhanti, tathārūpe aparāpare vā pariyāye. Evaṃ sabbathāpi saṃsārapavatte sati laddhavipākavāre kamme na vijjateso jagatippadeso, yatthaṭṭhito mucceyya pāpakammāti. Evaṃ sante yadetaṃ ‘‘aladdhavipākavārampi kammaṃ avassaṃ arahato paṭisaṃveditabba’’nti kappanāvasena ‘‘natthi arahato akālamaccū’’ti laddhipatiṭṭhāpanaṃ kataṃ, taṃ dukkaṭamevāti.
நத்தி² அரஹதோ அகாலமச்சூதிகதா²வண்ணனா.
Natthi arahato akālamaccūtikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (167) 2. நத்தி² அரஹதோ அகாலமச்சூதிகதா² • (167) 2. Natthi arahato akālamaccūtikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. நத்தி²அரஹதோஅகாலமச்சூதிகதா²வண்ணனா • 2. Natthiarahatoakālamaccūtikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. நத்தி²அரஹதோஅகாலமச்சூதிகதா²வண்ணனா • 2. Natthiarahatoakālamaccūtikathāvaṇṇanā
