| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
২. নত্থি অরহতো অকালমচ্চূতিকথাৰণ্ণনা
2. Natthi arahato akālamaccūtikathāvaṇṇanā
৭৮০. ইদানি নত্থি অরহতো অকালমচ্চূতিকথা নাম হোতি। তত্থ ‘‘নাহং, ভিক্খৰে, সঞ্চেতনিকানং কম্মানং কতানং উপচিতানং অপটিসংৰেদিত্ৰা ব্যন্তীভাৰং ৰদামী’’তি (অ॰ নি॰ ১০.২১৭) সুত্তস্স অত্থং অযোনিসো গহেত্ৰা ‘‘অরহতা নাম সব্বকম্মৰিপাকং পটিসংৰেদযিত্ৰাৰ পরিনিব্বাযিতব্বং, তস্মা নত্থি, অরহতো অকালমচ্চূ’’তি যেসং লদ্ধি, সেয্যথাপি রাজগিরিকানঞ্চেৰ সিদ্ধত্থিকানঞ্চ; তে সন্ধায পুচ্ছা সকৰাদিস্স, পটিঞ্ঞা ইতরস্স। অথ নং ‘‘সচে তস্স নত্থি অকালমচ্চু, অরহন্তঘাতকেন নাম ন ভৰিতব্ব’’ন্তি চোদেতুং নত্থি অরহন্তঘাতকোতি আহ। ইতরো আনন্তরিযকম্মস্স চেৰ তাদিসানঞ্চ পুগ্গলানং সব্ভাৰতো পটিক্খিপতি।
780. Idāni natthi arahato akālamaccūtikathā nāma hoti. Tattha ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ apaṭisaṃveditvā byantībhāvaṃ vadāmī’’ti (a. ni. 10.217) suttassa atthaṃ ayoniso gahetvā ‘‘arahatā nāma sabbakammavipākaṃ paṭisaṃvedayitvāva parinibbāyitabbaṃ, tasmā natthi, arahato akālamaccū’’ti yesaṃ laddhi, seyyathāpi rājagirikānañceva siddhatthikānañca; te sandhāya pucchā sakavādissa, paṭiññā itarassa. Atha naṃ ‘‘sace tassa natthi akālamaccu, arahantaghātakena nāma na bhavitabba’’nti codetuṃ natthi arahantaghātakoti āha. Itaro ānantariyakammassa ceva tādisānañca puggalānaṃ sabbhāvato paṭikkhipati.
৭৮১. ৰিসং ন কমেয্যাতি পঞ্হে ‘‘যাৰ পুব্বে কতকম্মং পরিক্খযং ন গচ্ছতি, তাৰ ন কমতী’’তি লদ্ধিযা পটিক্খিপতি। সেসমেত্থ যথাপাল়িমেৰ নিয্যাতি।
781. Visaṃ na kameyyāti pañhe ‘‘yāva pubbe katakammaṃ parikkhayaṃ na gacchati, tāva na kamatī’’ti laddhiyā paṭikkhipati. Sesamettha yathāpāḷimeva niyyāti.
৭৮২. নাহং, ভিক্খৰেতি সুত্তং ইদং সন্ধায ৰুত্তং – সঞ্চেতনিকানং কম্মানং কতানং ৰিপাকং অপটিসংৰেদিত্ৰা অৰিন্দিত্ৰা অননুভৰিত্ৰা ব্যন্তীভাৰং তেসং কম্মানং পরিৰটুমপরিচ্ছিন্নভাৰং ন ৰদামি, তঞ্চ খো দিট্ঠধম্মৰেদনীযানং দিট্ঠেৰ ধম্মে, ন ততো পরং, উপপজ্জৰেদনীযানং অনন্তরং উপপত্তিং উপপজ্জিত্ৰাৰ ন ততো পরং, অপরাপরিযৰেদনীযানং যদা ৰিপাকোকাসং লভন্তি, তথারূপে অপরাপরে ৰা পরিযাযে। এৰং সব্বথাপি সংসারপৰত্তে সতি লদ্ধৰিপাকৰারে কম্মে ন ৰিজ্জতেসো জগতিপ্পদেসো, যত্থট্ঠিতো মুচ্চেয্য পাপকম্মাতি। এৰং সন্তে যদেতং ‘‘অলদ্ধৰিপাকৰারম্পি কম্মং অৰস্সং অরহতো পটিসংৰেদিতব্ব’’ন্তি কপ্পনাৰসেন ‘‘নত্থি অরহতো অকালমচ্চূ’’তি লদ্ধিপতিট্ঠাপনং কতং, তং দুক্কটমেৰাতি।
782. Nāhaṃ,bhikkhaveti suttaṃ idaṃ sandhāya vuttaṃ – sañcetanikānaṃ kammānaṃ katānaṃ vipākaṃ apaṭisaṃveditvā avinditvā ananubhavitvā byantībhāvaṃ tesaṃ kammānaṃ parivaṭumaparicchinnabhāvaṃ na vadāmi, tañca kho diṭṭhadhammavedanīyānaṃ diṭṭheva dhamme, na tato paraṃ, upapajjavedanīyānaṃ anantaraṃ upapattiṃ upapajjitvāva na tato paraṃ, aparāpariyavedanīyānaṃ yadā vipākokāsaṃ labhanti, tathārūpe aparāpare vā pariyāye. Evaṃ sabbathāpi saṃsārapavatte sati laddhavipākavāre kamme na vijjateso jagatippadeso, yatthaṭṭhito mucceyya pāpakammāti. Evaṃ sante yadetaṃ ‘‘aladdhavipākavārampi kammaṃ avassaṃ arahato paṭisaṃveditabba’’nti kappanāvasena ‘‘natthi arahato akālamaccū’’ti laddhipatiṭṭhāpanaṃ kataṃ, taṃ dukkaṭamevāti.
নত্থি অরহতো অকালমচ্চূতিকথাৰণ্ণনা।
Natthi arahato akālamaccūtikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৬৭) ২. নত্থি অরহতো অকালমচ্চূতিকথা • (167) 2. Natthi arahato akālamaccūtikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. নত্থিঅরহতোঅকালমচ্চূতিকথাৰণ্ণনা • 2. Natthiarahatoakālamaccūtikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. নত্থিঅরহতোঅকালমচ্চূতিকথাৰণ্ণনা • 2. Natthiarahatoakālamaccūtikathāvaṇṇanā
