| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. නත්‌ථිදින්‌නසුත්‌තං
5. Natthidinnasuttaṃ
210. සාවත්‌ථිනිදානං . ‘‘කිස්‌මිං නු ඛො, භික්‌ඛවෙ, සති කිං උපාදාය, කිං අභිනිවිස්‌ස එවං දිට්‌ඨි උප්‌පජ්‌ජති – ‘නත්‌ථි දින්‌නං, නත්‌ථි යිට්‌ඨං, නත්‌ථි හුතං, නත්‌ථි සුකතදුක්‌කටානං 1 කම්‌මානං ඵලං විපාකො; නත්‌ථි අයං ලොකො, නත්‌ථි පරො ලොකො, නත්‌ථි මාතා, නත්‌ථි පිතා, නත්‌ථි සත්‌තා ඔපපාතිකා; නත්‌ථි ලොකෙ සමණබ්‍රාහ්‌මණා සම්‌මග්‌ගතා 2 සම්‌මාපටිපන්‌නා යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌ති. චාතුමහාභූතිකො 3 අයං පුරිසො යදා කාලඞ්‌කරොති පථවී පථවීකායං අනුපෙති අනුපගච්‌ඡති, ආපො ආපොකායං අනුපෙති අනුපගච්‌ඡති, තෙජො තෙජොකායං අනුපෙති අනුපගච්‌ඡති, වායො වායොකායං අනුපෙති අනුපගච්‌ඡති. ආකාසං ඉන්‌ද්‍රියානි සඞ්‌කමන්‌ති. ආසන්‌දිපඤ්‌චමා පුරිසා මතං ආදාය ගච්‌ඡන්‌ති. යාව ආළාහනා පදානි පඤ්‌ඤායන්‌ති. කාපොතකානි අට්‌ඨීනි භවන්‌ති. භස්‌සන්‌තා ආහුතියො. දත්‌තුපඤ්‌ඤත්‌තං යදිදං දානං 4. තෙසං තුච්‌ඡං මුසා විලාපො යෙ කෙචි අත්‌ථිකවාදං වදන්‌ති. බාලෙ ච පණ්‌ඩිතෙ ච කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’’’ති? භගවංමූලකා නො, භන්‌තෙ, ධම්‌මා…පෙ.… ‘‘රූපෙ ඛො, භික්‌ඛවෙ, සති, රූපං උපාදාය, රූපං අභිනිවිස්‌ස එවං දිට්‌ඨි උප්‌පජ්‌ජති – ‘නත්‌ථි දින්‌නං, නත්‌ථි යිට්‌ඨං…පෙ.… කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’ති. වෙදනාය සති…පෙ.… සඤ්‌ඤාය සති… සඞ්‌ඛාරෙසු සති… විඤ්‌ඤාණෙ සති , විඤ්‌ඤාණං උපාදාය, විඤ්‌ඤාණං අභිනිවිස්‌ස එවං දිට්‌ඨි උප්‌පජ්‌ජති – ‘නත්‌ථි දින්‌නං, නත්‌ථි යිට්‌ඨං…පෙ.… කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’’’ති.
210. Sāvatthinidānaṃ . ‘‘Kismiṃ nu kho, bhikkhave, sati kiṃ upādāya, kiṃ abhinivissa evaṃ diṭṭhi uppajjati – ‘natthi dinnaṃ, natthi yiṭṭhaṃ, natthi hutaṃ, natthi sukatadukkaṭānaṃ 5 kammānaṃ phalaṃ vipāko; natthi ayaṃ loko, natthi paro loko, natthi mātā, natthi pitā, natthi sattā opapātikā; natthi loke samaṇabrāhmaṇā sammaggatā 6 sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedenti. Cātumahābhūtiko 7 ayaṃ puriso yadā kālaṅkaroti pathavī pathavīkāyaṃ anupeti anupagacchati, āpo āpokāyaṃ anupeti anupagacchati, tejo tejokāyaṃ anupeti anupagacchati, vāyo vāyokāyaṃ anupeti anupagacchati. Ākāsaṃ indriyāni saṅkamanti. Āsandipañcamā purisā mataṃ ādāya gacchanti. Yāva āḷāhanā padāni paññāyanti. Kāpotakāni aṭṭhīni bhavanti. Bhassantā āhutiyo. Dattupaññattaṃ yadidaṃ dānaṃ 8. Tesaṃ tucchaṃ musā vilāpo ye keci atthikavādaṃ vadanti. Bāle ca paṇḍite ca kāyassa bhedā ucchijjanti vinassanti na honti paraṃ maraṇā’’’ti? Bhagavaṃmūlakā no, bhante, dhammā…pe… ‘‘rūpe kho, bhikkhave, sati, rūpaṃ upādāya, rūpaṃ abhinivissa evaṃ diṭṭhi uppajjati – ‘natthi dinnaṃ, natthi yiṭṭhaṃ…pe… kāyassa bhedā ucchijjanti vinassanti na honti paraṃ maraṇā’ti. Vedanāya sati…pe… saññāya sati… saṅkhāresu sati… viññāṇe sati , viññāṇaṃ upādāya, viññāṇaṃ abhinivissa evaṃ diṭṭhi uppajjati – ‘natthi dinnaṃ, natthi yiṭṭhaṃ…pe… kāyassa bhedā ucchijjanti vinassanti na honti paraṃ maraṇā’’’ti.
‘‘තං කිං මඤ්‌ඤථ, භික්‌ඛවෙ, රූපං නිච්‌චං වා අනිච්‌චං වා’’ති? ‘‘අනිච්‌චං, භන්‌තෙ…පෙ.… අපි නු තං අනුපාදාය එවං දිට්‌ඨි උප්‌පජ්‌ජෙය්‍ය – ‘නත්‌ථි දින්‌නං, නත්‌ථි යිට්‌ඨං…පෙ.… කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’’’ති? ‘‘නො හෙතං, භන්‌තෙ’’. ‘‘වෙදනා… සඤ්‌ඤා… සඞ්‌ඛාරා… විඤ්‌ඤාණං නිච්‌චං වා අනිච්‌චං වා’’ති? ‘‘අනිච්‌චං, භන්‌තෙ…පෙ.… අපි නු තං අනුපාදාය එවං දිට්‌ඨි උප්‌පජ්‌ජෙය්‍ය – ‘නත්‌ථි දින්‌නං, නත්‌ථි යිට්‌ඨං…පෙ.… කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’’’ති? ‘‘නො හෙතං, භන්‌තෙ’’. ‘‘යම්‌පිදං දිට්‌ඨං සුතං මුතං විඤ්‌ඤාතං පත්‌තං පරියෙසිතං අනුවිචරිතං මනසා තම්‌පි නිච්‌චං වා අනිච්‌චං වා’’ති? ‘‘අනිච්‌චං, භන්‌තෙ…පෙ.… අපි නු තං අනුපාදාය එවං දිට්‌ඨි උප්‌පජ්‌ජෙය්‍ය – ‘නත්‌ථි දින්‌නං, නත්‌ථි යිට්‌ඨං…පෙ.… යෙ කෙචි අත්‌ථිකවාදං වදන්‌ති; බාලෙ ච පණ්‌ඩිතෙ ච කායස්‌ස භෙදා උච්‌ඡිජ්‌ජන්‌ති විනස්‌සන්‌ති න හොන්‌ති පරං මරණා’’’ති? ‘‘නො හෙතං, භන්‌තෙ’’.
‘‘Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ, bhante…pe… api nu taṃ anupādāya evaṃ diṭṭhi uppajjeyya – ‘natthi dinnaṃ, natthi yiṭṭhaṃ…pe… kāyassa bhedā ucchijjanti vinassanti na honti paraṃ maraṇā’’’ti? ‘‘No hetaṃ, bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ, bhante…pe… api nu taṃ anupādāya evaṃ diṭṭhi uppajjeyya – ‘natthi dinnaṃ, natthi yiṭṭhaṃ…pe… kāyassa bhedā ucchijjanti vinassanti na honti paraṃ maraṇā’’’ti? ‘‘No hetaṃ, bhante’’. ‘‘Yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tampi niccaṃ vā aniccaṃ vā’’ti? ‘‘Aniccaṃ, bhante…pe… api nu taṃ anupādāya evaṃ diṭṭhi uppajjeyya – ‘natthi dinnaṃ, natthi yiṭṭhaṃ…pe… ye keci atthikavādaṃ vadanti; bāle ca paṇḍite ca kāyassa bhedā ucchijjanti vinassanti na honti paraṃ maraṇā’’’ti? ‘‘No hetaṃ, bhante’’.
‘‘යතො ඛො, භික්‌ඛවෙ, අරියසාවකස්‌ස ඉමෙසු ච ඨානෙසු කඞ්‌ඛා පහීනා හොති, දුක්‌ඛෙපිස්‌ස කඞ්‌ඛා පහීනා හොති…පෙ.… දුක්‌ඛනිරොධගාමිනියා පටිපදායපිස්‌ස කඞ්‌ඛා පහීනා හොති – අයං වුච්‌චති, භික්‌ඛවෙ , අරියසාවකො සොතාපන්‌නො අවිනිපාතධම්‌මො නියතො සම්‌බොධිපරායනො’’ති. පඤ්‌චමං.
‘‘Yato kho, bhikkhave, ariyasāvakassa imesu ca ṭhānesu kaṅkhā pahīnā hoti, dukkhepissa kaṅkhā pahīnā hoti…pe… dukkhanirodhagāminiyā paṭipadāyapissa kaṅkhā pahīnā hoti – ayaṃ vuccati, bhikkhave , ariyasāvako sotāpanno avinipātadhammo niyato sambodhiparāyano’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. නත්‌ථිදින්‌නසුත්‌තවණ්‌ණනා • 5. Natthidinnasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. නත්‌ථිදින්‌නසුත්‌තවණ්‌ණනා • 5. Natthidinnasuttavaṇṇanā
