| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೨೨. ನತ್ಥಿಪಚ್ಚಯನಿದ್ದೇಸವಣ್ಣನಾ
22. Natthipaccayaniddesavaṇṇanā
೨೨. ನತ್ಥಿಪಚ್ಚಯನಿದ್ದೇಸೇ ಸಮನನ್ತರನಿರುದ್ಧಾತಿ ಅಞ್ಞೇನ ಚಿತ್ತುಪ್ಪಾದೇನ ಅನನ್ತರಿಕಾ ಹುತ್ವಾ ಸಮನನ್ತರನಿರುದ್ಧಾ। ಪಟುಪ್ಪನ್ನಾನನ್ತಿ ಪಚ್ಚುಪ್ಪನ್ನಾನಂ। ಇಮಿನಾ ನತ್ಥಿಪಚ್ಚಯಸ್ಸ ಓಕಾಸದಾನಟ್ಠೇನ ನತ್ಥಿಪಚ್ಚಯಭಾವಂ ಸಾಧೇತಿ। ಪುರಿಮೇಸು ಹಿ ನಿರೋಧವಸೇನ ಪಚ್ಛಿಮಾನಂ ಪವತ್ತನೋಕಾಸಂ ಅದೇನ್ತೇಸು ತೇಸಂ ಪಟುಪ್ಪನ್ನಭಾವೋ ನ ಸಿಯಾತಿ ಅಯಮೇತ್ಥ ಪಾಳಿವಣ್ಣನಾ। ಸೇಸಂ ಸಬ್ಬಂ ಅನನ್ತರಪಚ್ಚಯೇ ವುತ್ತನಯೇನೇವ ವೇದಿತಬ್ಬಂ। ಪಚ್ಚಯಲಕ್ಖಣಮೇವ ಹೇತ್ಥ ನಾನಂ, ಪಚ್ಚಯಾನಂ ಪನ ಪಚ್ಚಯುಪ್ಪನ್ನಾನಞ್ಚ ನಾನಾಕರಣಂ ನತ್ಥಿ। ಕೇವಲಂ ಪನ ತತ್ಥ ‘‘ಚಕ್ಖುವಿಞ್ಞಾಣಧಾತು ತಂಸಮ್ಪಯುತ್ತಕಾ ಚ ಧಮ್ಮಾ ಮನೋಧಾತುಯಾ’’ತಿಆದಿನಾ ನಯೇನ ಪಚ್ಚಯಾ ಚ ಪಚ್ಚಯುಪ್ಪನ್ನಾ ಚ ಸರೂಪತೋ ದಸ್ಸಿತಾ। ಇಧ ಪನ ‘‘ಸಮನನ್ತರನಿರುದ್ಧಾ ಚಿತ್ತಚೇತಸಿಕಾ ಧಮ್ಮಾ ಪಟುಪ್ಪನ್ನಾನಂ ಚಿತ್ತಚೇತಸಿಕಾನಂ ಧಮ್ಮಾನ’’ನ್ತಿ ಸಬ್ಬೇಪಿ ತೇ ನಿರೋಧುಪ್ಪಾದವಸೇನ ಸಾಮಞ್ಞತೋ ದಸ್ಸಿತಾತಿ।
22. Natthipaccayaniddese samanantaraniruddhāti aññena cittuppādena anantarikā hutvā samanantaraniruddhā. Paṭuppannānanti paccuppannānaṃ. Iminā natthipaccayassa okāsadānaṭṭhena natthipaccayabhāvaṃ sādheti. Purimesu hi nirodhavasena pacchimānaṃ pavattanokāsaṃ adentesu tesaṃ paṭuppannabhāvo na siyāti ayamettha pāḷivaṇṇanā. Sesaṃ sabbaṃ anantarapaccaye vuttanayeneva veditabbaṃ. Paccayalakkhaṇameva hettha nānaṃ, paccayānaṃ pana paccayuppannānañca nānākaraṇaṃ natthi. Kevalaṃ pana tattha ‘‘cakkhuviññāṇadhātu taṃsampayuttakā ca dhammā manodhātuyā’’tiādinā nayena paccayā ca paccayuppannā ca sarūpato dassitā. Idha pana ‘‘samanantaraniruddhā cittacetasikā dhammā paṭuppannānaṃ cittacetasikānaṃ dhammāna’’nti sabbepi te nirodhuppādavasena sāmaññato dassitāti.
ನತ್ಥಿಪಚ್ಚಯನಿದ್ದೇಸವಣ್ಣನಾ।
Natthipaccayaniddesavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪಟ್ಠಾನಪಾಳಿ • Paṭṭhānapāḷi / (೨) ಪಚ್ಚಯನಿದ್ದೇಸೋ • (2) Paccayaniddeso
