| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. நத்தி²புத்தஸமஸுத்தவண்ணனா
3. Natthiputtasamasuttavaṇṇanā
13. ததியே நத்தி² புத்தஸமங் பேமந்தி விரூபேபி ஹி அத்தனோ புத்தகே ஸுவண்ணபி³ம்ப³கங் விய மஞ்ஞந்தி, மாலாகு³ளே விய ஸீஸாதீ³ஸு கத்வா பரிஹரமானா தேஹி ஓஹதி³தாபி ஓமுத்திகாபி க³ந்த⁴விலேபனபதிதா விய ஸோமனஸ்ஸங் ஆபஜ்ஜந்தி. தேனாஹ – ‘‘நத்தி² புத்தஸமங் பேம’’ந்தி . புத்தபேமஸமங் பேமங் நாம நத்தீ²தி வுத்தங் ஹோதி. கோ³ஸமிதங் த⁴னந்தி கோ³ஹி ஸமங் கோ³த⁴னஸமங் கோ³த⁴னஸதி³ஸங் அஞ்ஞங் த⁴னங் நாம நத்தி² ப⁴க³வாதி ஆஹ. ஸூரியஸமா ஆபா⁴தி ஸூரியாபா⁴ய ஸமா அஞ்ஞா ஆபா⁴ நாம நத்தீ²தி த³ஸ்ஸேதி. ஸமுத்³த³பரமாதி யே கேசி அஞ்ஞே ஸரா நாம, ஸப்³பே³ தே ஸமுத்³த³பரமா, ஸமுத்³தோ³ தேஸங் உத்தமோ, ஸமுத்³த³ஸதி³ஸங் அஞ்ஞங் உத³கனிதா⁴னங் நாம நத்தி², ப⁴க³வாதி.
13. Tatiye natthi puttasamaṃ pemanti virūpepi hi attano puttake suvaṇṇabimbakaṃ viya maññanti, mālāguḷe viya sīsādīsu katvā pariharamānā tehi ohaditāpi omuttikāpi gandhavilepanapatitā viya somanassaṃ āpajjanti. Tenāha – ‘‘natthi puttasamaṃ pema’’nti . Puttapemasamaṃ pemaṃ nāma natthīti vuttaṃ hoti. Gosamitaṃ dhananti gohi samaṃ godhanasamaṃ godhanasadisaṃ aññaṃ dhanaṃ nāma natthi bhagavāti āha. Sūriyasamā ābhāti sūriyābhāya samā aññā ābhā nāma natthīti dasseti. Samuddaparamāti ye keci aññe sarā nāma, sabbe te samuddaparamā, samuddo tesaṃ uttamo, samuddasadisaṃ aññaṃ udakanidhānaṃ nāma natthi, bhagavāti.
யஸ்மா பன அத்தபேமேன ஸமங் பேமங் நாம நத்தி². மாதாபிதாத³யோ ஹி ச²ட்³டெ³த்வாபி புத்ததீ⁴தாத³யோ ச அபோஸெத்வாபி ஸத்தா அத்தானமேவ போஸெந்தி. த⁴ஞ்ஞேன ச ஸமங் த⁴னங் நாம நத்தி². (யதா³ ஹி ஸத்தா து³ப்³பி⁴க்கா² ஹொந்தி), ததா²ரூபே ஹி காலே ஹிரஞ்ஞஸுவண்ணாதீ³னி கோ³மஹிங்ஸாதீ³னிபி த⁴ஞ்ஞக்³க³ஹணத்த²ங் த⁴ஞ்ஞஸாமிகானமேவ ஸந்திகங் க³ஹெத்வா க³ச்ச²ந்தி. பஞ்ஞாய ச ஸமா ஆபா⁴ நாம நத்தி². ஸூரியாத³யோ ஹி ஏகதே³ஸங்யேவ ஓபா⁴ஸந்தி, பச்சுப்பன்னமேவ ச தமங் வினோதெ³ந்தி. பஞ்ஞா பன த³ஸஸஹஸ்ஸிம்பி லோகதா⁴துங் ஏகப்பஜ்ஜோதங் காதுங் ஸக்கோதி, அதீதங்ஸாதி³படிச்சா²த³கஞ்ச தமங் வித⁴மதி. மேக⁴வுட்டி²யா ச ஸமோ ஸரோ நாம நத்தி². நதீ³வாபி ஹோது தலாகாதீ³னி வா, வுட்டி²ஸமோ ஸரோ நாம நத்தி². மேக⁴வுட்டி²யா ஹி பச்சி²ன்னாய மஹாஸமுத்³தோ³ அங்கு³லிபப்³ப³தேமனமத்தம்பி உத³கங் ந ஹோதி, வுட்டி²யா பன பவத்தமானாய யாவ ஆப⁴ஸ்ஸரப⁴வனாபி ஏகோத³கங் ஹோதி. தஸ்மா ப⁴க³வா தே³வதாய படிகா³த²ங் வத³ந்தோ நத்தி² அத்தஸமங் பேமந்திஆதி³மாஹாதி.
Yasmā pana attapemena samaṃ pemaṃ nāma natthi. Mātāpitādayo hi chaḍḍetvāpi puttadhītādayo ca aposetvāpi sattā attānameva posenti. Dhaññena ca samaṃ dhanaṃ nāma natthi. (Yadā hi sattā dubbhikkhā honti), tathārūpe hi kāle hiraññasuvaṇṇādīni gomahiṃsādīnipi dhaññaggahaṇatthaṃ dhaññasāmikānameva santikaṃ gahetvā gacchanti. Paññāya ca samā ābhā nāma natthi. Sūriyādayo hi ekadesaṃyeva obhāsanti, paccuppannameva ca tamaṃ vinodenti. Paññā pana dasasahassimpi lokadhātuṃ ekappajjotaṃ kātuṃ sakkoti, atītaṃsādipaṭicchādakañca tamaṃ vidhamati. Meghavuṭṭhiyā ca samo saro nāma natthi. Nadīvāpi hotu talākādīni vā, vuṭṭhisamo saro nāma natthi. Meghavuṭṭhiyā hi pacchinnāya mahāsamuddo aṅgulipabbatemanamattampi udakaṃ na hoti, vuṭṭhiyā pana pavattamānāya yāva ābhassarabhavanāpi ekodakaṃ hoti. Tasmā bhagavā devatāya paṭigāthaṃ vadanto natthi attasamaṃ pemantiādimāhāti.
நத்தி²புத்தஸமஸுத்தவண்ணனா நிட்டி²தா.
Natthiputtasamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. நத்தி²புத்தஸமஸுத்தங் • 3. Natthiputtasamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. நத்தி²புத்தஸமஸுத்தவண்ணனா • 3. Natthiputtasamasuttavaṇṇanā
