| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. নত্থিপুত্তসমসুত্তৰণ্ণনা
3. Natthiputtasamasuttavaṇṇanā
১৩. পুত্তপেমং পুত্তগ্গহণেন গহিতং উত্তরপদলোপেনাতি আহ ‘‘পুত্তপেমসম’’ন্তি। গোসমিতন্তি গোহি সমং কতং। তেনাহ ‘‘গোহি সম’’ন্তি। সূরিযস্স সমাতি সূরিযসমা। অৰযৰসম্বন্ধে চেতং সামিৰচনং। অৰযৰো চেত্থ আভা এৰাতি ৰিঞ্ঞাযতি ‘‘অনন্তরং আভা’’তি ৰুচ্চমানত্তাতি আহ ‘‘সূরিযাভায সমা’’তিআদি। মহোঘভাৰেন সরন্তি সৰন্তীতি সরা, মহন্তা জলাসযা। সব্বে তে সমুদ্দপরমা ওরিমজনেহি অদিট্ঠপরতীরত্তা তস্স।
13. Puttapemaṃ puttaggahaṇena gahitaṃ uttarapadalopenāti āha ‘‘puttapemasama’’nti. Gosamitanti gohi samaṃ kataṃ. Tenāha ‘‘gohi sama’’nti. Sūriyassa samāti sūriyasamā. Avayavasambandhe cetaṃ sāmivacanaṃ. Avayavo cettha ābhā evāti viññāyati ‘‘anantaraṃ ābhā’’ti vuccamānattāti āha ‘‘sūriyābhāya samā’’tiādi. Mahoghabhāvena saranti savantīti sarā, mahantā jalāsayā. Sabbe te samuddaparamā orimajanehi adiṭṭhaparatīrattā tassa.
নত্থি অত্তসমং পেমন্তি গাথায পঠমগাথাযং ৰুত্তনযেন অত্থো ৰেদিতব্বো। অত্তপেমেন সমং পেমং নাম নত্থীতি অযমত্থো। অনুদককন্তারে ঘম্মসন্তাপং অসহন্তিযা অঙ্কে ঠপিতপুত্তকং কন্দন্তং ভূমিযং নিপজ্জাপেত্ৰা তস্স উপরি ঠত্ৰা মতইত্থিৰত্থুনা দীপেতব্বং। তেনাহ – ‘‘মাতাপিতাদযো হি ছড্ডেত্ৰাপি পুত্তধীতাদযো’’তি। তথা চাহ –
Natthi attasamaṃ pemanti gāthāya paṭhamagāthāyaṃ vuttanayena attho veditabbo. Attapemena samaṃ pemaṃ nāma natthīti ayamattho. Anudakakantāre ghammasantāpaṃ asahantiyā aṅke ṭhapitaputtakaṃ kandantaṃ bhūmiyaṃ nipajjāpetvā tassa upari ṭhatvā mataitthivatthunā dīpetabbaṃ. Tenāha – ‘‘mātāpitādayo hi chaḍḍetvāpi puttadhītādayo’’ti. Tathā cāha –
‘‘সব্বা দিসা অনুপরিগম্ম চেতসা,
‘‘Sabbā disā anuparigamma cetasā,
নেৰজ্ঝগা পিযতরমত্তনা ক্ৰচি।
Nevajjhagā piyataramattanā kvaci;
এৰং পিযো পুথু অত্তা পরেসং,
Evaṃ piyo puthu attā paresaṃ,
তস্মা ন হিংসে পরমত্তকামো’’তি॥ (সং॰ নি॰ ১.১১৯; উদা॰ ৪১; নেত্তি॰ ১১৩)।
Tasmā na hiṃse paramattakāmo’’ti. (saṃ. ni. 1.119; udā. 41; netti. 113);
ধঞ্ঞেন সমং ধনং নাম নত্থি, যস্মা তপ্পটিবদ্ধা আহারূপজীৰীনং সত্তানং জীৰিতৰুত্তি। তথারূপে কালেতি দুব্ভিক্খকালে। একদেসংযেৰ ওভাসন্তীতি একস্মিং খণে চতূসু মহাদীপেসু ওভাসং ফরিতুং অসমত্থত্তা সূরিযস্সপি, পগেৰ ইতরেসং। বোধিসত্তস্স উদযব্বযস্স ঞাণানুভাৰেন সকলজাতিখেত্তং একালোকং অহোসীতি আহ ‘‘পঞ্ঞা…পে॰… সক্কোতী’’তি। তমং ৰিধমতীতি পুব্বেনিৰাসঞাণাদযো পঞ্ঞা যত্থ পৰত্তন্তি, তমনৰসেসং ব্যাপেত্ৰা একপ্পহারেন পৰত্তনতো। ‘‘ৰুট্ঠিযা পন পৰত্তমানায যাৰ আভস্সরভৰনা’’তি পচুরৰসেন ৰুত্তং।
Dhaññena samaṃ dhanaṃ nāma natthi, yasmā tappaṭibaddhā āhārūpajīvīnaṃ sattānaṃ jīvitavutti. Tathārūpe kāleti dubbhikkhakāle. Ekadesaṃyeva obhāsantīti ekasmiṃ khaṇe catūsu mahādīpesu obhāsaṃ pharituṃ asamatthattā sūriyassapi, pageva itaresaṃ. Bodhisattassa udayabbayassa ñāṇānubhāvena sakalajātikhettaṃ ekālokaṃ ahosīti āha ‘‘paññā…pe… sakkotī’’ti. Tamaṃ vidhamatīti pubbenivāsañāṇādayo paññā yattha pavattanti, tamanavasesaṃ byāpetvā ekappahārena pavattanato. ‘‘Vuṭṭhiyā pana pavattamānāya yāva ābhassarabhavanā’’ti pacuravasena vuttaṃ.
নত্থিপুত্তসমসুত্তৰণ্ণনা নিট্ঠিতা।
Natthiputtasamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. নত্থিপুত্তসমসুত্তং • 3. Natthiputtasamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. নত্থিপুত্তসমসুত্তৰণ্ণনা • 3. Natthiputtasamasuttavaṇṇanā
