| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. নতুম্হাকংৰগ্গো
4. Natumhākaṃvaggo
১. নতুম্হাকংসুত্তং
1. Natumhākaṃsuttaṃ
৩৩. সাৰত্থিনিদানং । ‘‘যং, ভিক্খৰে, ন তুম্হাকং, তং পজহথ। তং ৰো পহীনং হিতায সুখায ভৰিস্সতি। কিঞ্চ, ভিক্খৰে, ন তুম্হাকং? রূপং, ভিক্খৰে, ন তুম্হাকং, তং পজহথ। তং ৰো পহীনং হিতায সুখায ভৰিস্সতি। ৰেদনা ন তুম্হাকং, তং পজহথ। সা ৰো পহীনা হিতায সুখায ভৰিস্সতি। সঞ্ঞা ন তুম্হাকং… সঙ্খারা ন তুম্হাকং, তে পজহথ। তে ৰো পহীনা হিতায সুখায ভৰিস্সন্তি। ৰিঞ্ঞাণং ন তুম্হাকং, তং পজহথ। তং ৰো পহীনং হিতায সুখায ভৰিস্সতি’’।
33. Sāvatthinidānaṃ . ‘‘Yaṃ, bhikkhave, na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Kiñca, bhikkhave, na tumhākaṃ? Rūpaṃ, bhikkhave, na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Vedanā na tumhākaṃ, taṃ pajahatha. Sā vo pahīnā hitāya sukhāya bhavissati. Saññā na tumhākaṃ… saṅkhārā na tumhākaṃ, te pajahatha. Te vo pahīnā hitāya sukhāya bhavissanti. Viññāṇaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissati’’.
‘‘সেয্যথাপি, ভিক্খৰে, যং ইমস্মিং জেতৰনে তিণকট্ঠসাখাপলাসং তং জনো হরেয্য ৰা ডহেয্য ৰা যথাপচ্চযং ৰা করেয্য। অপি নু তুম্হাকং এৰমস্স – ‘অম্হে জনো হরতি ৰা ডহতি ৰা যথাপচ্চযং ৰা করোতী’’’তি? ‘‘নো হেতং, ভন্তে’’। ‘‘তং কিস্স হেতু’’? ‘‘ন হি নো এতং, ভন্তে, অত্তা ৰা অত্তনিযং ৰা’’তি। ‘‘এৰমেৰ খো, ভিক্খৰে, রূপং ন তুম্হাকং, তং পজহথ। তং ৰো পহীনং হিতায সুখায ভৰিস্সতি। ৰেদনা ন তুম্হাকং, তং পজহথ। সা ৰো পহীনা হিতায সুখায ভৰিস্সতি। সঞ্ঞা ন তুম্হাকং… সঙ্খারা ন তুম্হাকং… ৰিঞ্ঞাণং ন তুম্হাকং, তং পজহথ। তং ৰো পহীনং হিতায সুখায ভৰিস্সতী’’তি। পঠমং।
‘‘Seyyathāpi, bhikkhave, yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya. Api nu tumhākaṃ evamassa – ‘amhe jano harati vā ḍahati vā yathāpaccayaṃ vā karotī’’’ti? ‘‘No hetaṃ, bhante’’. ‘‘Taṃ kissa hetu’’? ‘‘Na hi no etaṃ, bhante, attā vā attaniyaṃ vā’’ti. ‘‘Evameva kho, bhikkhave, rūpaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Vedanā na tumhākaṃ, taṃ pajahatha. Sā vo pahīnā hitāya sukhāya bhavissati. Saññā na tumhākaṃ… saṅkhārā na tumhākaṃ… viññāṇaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissatī’’ti. Paṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. নতুম্হাকসুত্তৰণ্ণনা • 1. Natumhākasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. নতুম্হাকংসুত্তৰণ্ণনা • 1. Natumhākaṃsuttavaṇṇanā
