| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. নতুম্হসুত্তৰণ্ণনা
7. Natumhasuttavaṇṇanā
৩৭. ন তুম্হাকন্তি কাযস্স অনত্তনিযভাৰদস্সনমেৰ পনেতন্তি যা তস্স অনত্তনিযতা, তং দস্সেতুং ‘‘অত্তনি হী’’তিআদি ৰুত্তং। যদি ন অত্তনিযং, পরকিযং নাম সিযাতি, তম্পি নত্থীতি দস্সেন্তো ‘‘নাপি অঞ্ঞেস’’ন্তি আহ। নযিদং পুরাণকম্মমেৰাতি ‘‘ইদং কাযো’’তি ৰুত্তসরীরং পুরাণকম্মমেৰ ন হোতি। ন হি কাযো ৰেদনাসভাৰো। পচ্চযৰোহারেনাতি কারণোপচারেন। অভিসঙ্খতন্তিআদি নপুংসকলিঙ্গৰচনং। পুরিমলিঙ্গসভাগতাযাতি ‘‘পুরাণমিদং কম্ম’’ন্তি এৰং ৰুত্তপুরিমনপুংসকলিঙ্গসভাগতায। অঞ্ঞমঞ্ঞাভিমুখেহি সমেচ্চ পচ্চযেহি কতো অভিসঙ্খতোতি আহ ‘‘পচ্চযেহি কতোতি দট্ঠব্বো’’তি। অভিসঞ্চেতযিতন্তি তথা অভিসঙ্খতত্তসঙ্খাতেন অভিমুখভাৰেন চেতযিতং পকপ্পিতং, পৰত্তিতন্তি অত্থো। চেতনাৰত্থুকোতি চেতনাহেতুকো। ৰেদনিযন্তি ৰেদনায হিতং ৰত্থারম্মণভাৰেন ৰেদনায পচ্চযভাৰতো। তেনাহ ‘‘ৰেদনিযৰত্থূ’’তি।
37.Natumhākanti kāyassa anattaniyabhāvadassanameva panetanti yā tassa anattaniyatā, taṃ dassetuṃ ‘‘attani hī’’tiādi vuttaṃ. Yadi na attaniyaṃ, parakiyaṃ nāma siyāti, tampi natthīti dassento ‘‘nāpi aññesa’’nti āha. Nayidaṃ purāṇakammamevāti ‘‘idaṃ kāyo’’ti vuttasarīraṃ purāṇakammameva na hoti. Na hi kāyo vedanāsabhāvo. Paccayavohārenāti kāraṇopacārena. Abhisaṅkhatantiādi napuṃsakaliṅgavacanaṃ. Purimaliṅgasabhāgatāyāti ‘‘purāṇamidaṃ kamma’’nti evaṃ vuttapurimanapuṃsakaliṅgasabhāgatāya. Aññamaññābhimukhehi samecca paccayehi kato abhisaṅkhatoti āha ‘‘paccayehi katoti daṭṭhabbo’’ti. Abhisañcetayitanti tathā abhisaṅkhatattasaṅkhātena abhimukhabhāvena cetayitaṃ pakappitaṃ, pavattitanti attho. Cetanāvatthukoti cetanāhetuko. Vedaniyanti vedanāya hitaṃ vatthārammaṇabhāvena vedanāya paccayabhāvato. Tenāha ‘‘vedaniyavatthū’’ti.
নতুম্হসুত্তৰণ্ণনা নিট্ঠিতা।
Natumhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. নতুম্হসুত্তং • 7. Natumhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. নতুম্হসুত্তৰণ্ণনা • 7. Natumhasuttavaṇṇanā
