| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៧. នតុម្ហសុត្តវណ្ណនា
7. Natumhasuttavaṇṇanā
៣៧. ន តុម្ហាកន្តិ កាយស្ស អនត្តនិយភាវទស្សនមេវ បនេតន្តិ យា តស្ស អនត្តនិយតា, តំ ទស្សេតុំ ‘‘អត្តនិ ហី’’តិអាទិ វុត្តំ។ យទិ ន អត្តនិយំ, បរកិយំ នាម សិយាតិ, តម្បិ នត្ថីតិ ទស្សេន្តោ ‘‘នាបិ អញ្ញេស’’ន្តិ អាហ។ នយិទំ បុរាណកម្មមេវាតិ ‘‘ឥទំ កាយោ’’តិ វុត្តសរីរំ បុរាណកម្មមេវ ន ហោតិ។ ន ហិ កាយោ វេទនាសភាវោ។ បច្ចយវោហារេនាតិ ការណោបចារេន។ អភិសង្ខតន្តិអាទិ នបុំសកលិង្គវចនំ។ បុរិមលិង្គសភាគតាយាតិ ‘‘បុរាណមិទំ កម្ម’’ន្តិ ឯវំ វុត្តបុរិមនបុំសកលិង្គសភាគតាយ។ អញ្ញមញ្ញាភិមុខេហិ សមេច្ច បច្ចយេហិ កតោ អភិសង្ខតោតិ អាហ ‘‘បច្ចយេហិ កតោតិ ទដ្ឋព្ពោ’’តិ។ អភិសញ្ចេតយិតន្តិ តថា អភិសង្ខតត្តសង្ខាតេន អភិមុខភាវេន ចេតយិតំ បកប្បិតំ, បវត្តិតន្តិ អត្ថោ។ ចេតនាវត្ថុកោតិ ចេតនាហេតុកោ។ វេទនិយន្តិ វេទនាយ ហិតំ វត្ថារម្មណភាវេន វេទនាយ បច្ចយភាវតោ។ តេនាហ ‘‘វេទនិយវត្ថូ’’តិ។
37.Natumhākanti kāyassa anattaniyabhāvadassanameva panetanti yā tassa anattaniyatā, taṃ dassetuṃ ‘‘attani hī’’tiādi vuttaṃ. Yadi na attaniyaṃ, parakiyaṃ nāma siyāti, tampi natthīti dassento ‘‘nāpi aññesa’’nti āha. Nayidaṃ purāṇakammamevāti ‘‘idaṃ kāyo’’ti vuttasarīraṃ purāṇakammameva na hoti. Na hi kāyo vedanāsabhāvo. Paccayavohārenāti kāraṇopacārena. Abhisaṅkhatantiādi napuṃsakaliṅgavacanaṃ. Purimaliṅgasabhāgatāyāti ‘‘purāṇamidaṃ kamma’’nti evaṃ vuttapurimanapuṃsakaliṅgasabhāgatāya. Aññamaññābhimukhehi samecca paccayehi kato abhisaṅkhatoti āha ‘‘paccayehi katoti daṭṭhabbo’’ti. Abhisañcetayitanti tathā abhisaṅkhatattasaṅkhātena abhimukhabhāvena cetayitaṃ pakappitaṃ, pavattitanti attho. Cetanāvatthukoti cetanāhetuko. Vedaniyanti vedanāya hitaṃ vatthārammaṇabhāvena vedanāya paccayabhāvato. Tenāha ‘‘vedaniyavatthū’’ti.
នតុម្ហសុត្តវណ្ណនា និដ្ឋិតា។
Natumhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៧. នតុម្ហសុត្តំ • 7. Natumhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧. នតុម្ហសុត្តវណ្ណនា • 7. Natumhasuttavaṇṇanā
