| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. නතුම්‌හසුත්‌තවණ්‌ණනා
7. Natumhasuttavaṇṇanā
37. න තුම්‌හාකන්‌ති කායස්‌ස අනත්‌තනියභාවදස්‌සනමෙව පනෙතන්‌ති යා තස්‌ස අනත්‌තනියතා, තං දස්‌සෙතුං ‘‘අත්‌තනි හී’’තිආදි වුත්‌තං. යදි න අත්‌තනියං, පරකියං නාම සියාති, තම්‌පි නත්‌ථීති දස්‌සෙන්‌තො ‘‘නාපි අඤ්‌ඤෙස’’න්‌ති ආහ. නයිදං පුරාණකම්‌මමෙවාති ‘‘ඉදං කායො’’ති වුත්‌තසරීරං පුරාණකම්‌මමෙව න හොති. න හි කායො වෙදනාසභාවො. පච්‌චයවොහාරෙනාති කාරණොපචාරෙන. අභිසඞ්‌ඛතන්‌තිආදි නපුංසකලිඞ්‌ගවචනං. පුරිමලිඞ්‌ගසභාගතායාති ‘‘පුරාණමිදං කම්‌ම’’න්‌ති එවං වුත්‌තපුරිමනපුංසකලිඞ්‌ගසභාගතාය. අඤ්‌ඤමඤ්‌ඤාභිමුඛෙහි සමෙච්‌ච පච්‌චයෙහි කතො අභිසඞ්‌ඛතොති ආහ ‘‘පච්‌චයෙහි කතොති දට්‌ඨබ්‌බො’’ති. අභිසඤ්‌චෙතයිතන්‌ති තථා අභිසඞ්‌ඛතත්‌තසඞ්‌ඛාතෙන අභිමුඛභාවෙන චෙතයිතං පකප්‌පිතං, පවත්‌තිතන්‌ති අත්‌ථො. චෙතනාවත්‌ථුකොති චෙතනාහෙතුකො. වෙදනියන්‌ති වෙදනාය හිතං වත්‌ථාරම්‌මණභාවෙන වෙදනාය පච්‌චයභාවතො. තෙනාහ ‘‘වෙදනියවත්‌ථූ’’ති.
37.Natumhākanti kāyassa anattaniyabhāvadassanameva panetanti yā tassa anattaniyatā, taṃ dassetuṃ ‘‘attani hī’’tiādi vuttaṃ. Yadi na attaniyaṃ, parakiyaṃ nāma siyāti, tampi natthīti dassento ‘‘nāpi aññesa’’nti āha. Nayidaṃ purāṇakammamevāti ‘‘idaṃ kāyo’’ti vuttasarīraṃ purāṇakammameva na hoti. Na hi kāyo vedanāsabhāvo. Paccayavohārenāti kāraṇopacārena. Abhisaṅkhatantiādi napuṃsakaliṅgavacanaṃ. Purimaliṅgasabhāgatāyāti ‘‘purāṇamidaṃ kamma’’nti evaṃ vuttapurimanapuṃsakaliṅgasabhāgatāya. Aññamaññābhimukhehi samecca paccayehi kato abhisaṅkhatoti āha ‘‘paccayehi katoti daṭṭhabbo’’ti. Abhisañcetayitanti tathā abhisaṅkhatattasaṅkhātena abhimukhabhāvena cetayitaṃ pakappitaṃ, pavattitanti attho. Cetanāvatthukoti cetanāhetuko. Vedaniyanti vedanāya hitaṃ vatthārammaṇabhāvena vedanāya paccayabhāvato. Tenāha ‘‘vedaniyavatthū’’ti.
නතුම්‌හසුත්‌තවණ්‌ණනා නිට්‌ඨිතා.
Natumhasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. නතුම්‌හසුත්‌තං • 7. Natumhasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. නතුම්‌හසුත්‌තවණ්‌ණනා • 7. Natumhasuttavaṇṇanā
