| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৮. নাৰাভিরুহনসিক্খাপদং
8. Nāvābhiruhanasikkhāpadaṃ
১৮৮. অট্ঠমে সহ অঞ্ঞমঞ্ঞং থৰনং অভিত্থৰনং সন্থৰো, সঙ্গমোতি ৰুত্তং হোতি। মিত্তভাৰেন সন্থৰো মিত্তসন্থৰো, লোকেহি অস্সাদেতব্বো চ সো মিত্তসন্থৰো চেতি লোকস্সাদমিত্তসন্থৰো, তস্স ৰসো পভূ, তেন ৰা আযত্তোতি লোকস্সাদমিত্তসন্থৰৰসো, তেন। উদ্ধং গচ্ছতীতি উদ্ধংগামিনীতি দস্সেন্তো আহ ‘‘উদ্ধ’’ন্তিআদি। উদ্ধন্তি চ ইধ পটিসোতো। তেনাহ ‘‘নদিযা পটিসোত’’ন্তি। ‘‘উদ্ধংগামিনি’’ন্তিমাতিকাপদং ‘‘উজ্জৰনিকাযা’’তিপদভাজনিযা সংসন্দেন্তো আহ ‘‘যস্মা পনা’’তিআদি। যোতি ভিক্খু। উদ্ধং জৰনতোতি পটিসোতং গমনতো। তেনাতি তেন হেতুনা। অস্সাতি ‘‘উদ্ধংগামিনি’’ন্তিপদস্স। অনুসোতং ইধ অধো নামাতি আহ ‘‘অনুসোত’’ন্তি। অস্সপীতি পিসদ্দো পুরিমাপেক্খো। তত্থাতি ‘‘উদ্ধংগামিনিং ৰা অধোগামিনিং ৰা’’তিৰচনে। যন্তি নাৰং হরন্তীতি সম্বন্ধো। সম্পটিপাদনত্থন্তি সম্মা পটিমুখং পাদনত্থং, উজুপজ্জাপনত্থন্তি অত্থো। এত্থাতি নাৰাযং। ‘‘ঠপেত্ৰা’’তিপদভাজনিমপেক্খিত্ৰা ‘‘উপযোগত্থে নিস্সক্কৰচন’’ন্তি আহ। ‘‘অঞ্ঞত্রা’’তি মাতিকাপদে অপেক্খিতে নিস্সক্কত্থে নিস্সক্কৰচনম্পি যুজ্জতেৰ।
188. Aṭṭhame saha aññamaññaṃ thavanaṃ abhitthavanaṃ santhavo, saṅgamoti vuttaṃ hoti. Mittabhāvena santhavo mittasanthavo, lokehi assādetabbo ca so mittasanthavo ceti lokassādamittasanthavo, tassa vaso pabhū, tena vā āyattoti lokassādamittasanthavavaso, tena. Uddhaṃ gacchatīti uddhaṃgāminīti dassento āha ‘‘uddha’’ntiādi. Uddhanti ca idha paṭisoto. Tenāha ‘‘nadiyā paṭisota’’nti. ‘‘Uddhaṃgāmini’’ntimātikāpadaṃ ‘‘ujjavanikāyā’’tipadabhājaniyā saṃsandento āha ‘‘yasmā panā’’tiādi. Yoti bhikkhu. Uddhaṃ javanatoti paṭisotaṃ gamanato. Tenāti tena hetunā. Assāti ‘‘uddhaṃgāmini’’ntipadassa. Anusotaṃ idha adho nāmāti āha ‘‘anusota’’nti. Assapīti pisaddo purimāpekkho. Tatthāti ‘‘uddhaṃgāminiṃ vā adhogāminiṃ vā’’tivacane. Yanti nāvaṃ harantīti sambandho. Sampaṭipādanatthanti sammā paṭimukhaṃ pādanatthaṃ, ujupajjāpanatthanti attho. Etthāti nāvāyaṃ. ‘‘Ṭhapetvā’’tipadabhājanimapekkhitvā ‘‘upayogatthe nissakkavacana’’nti āha. ‘‘Aññatrā’’ti mātikāpade apekkhite nissakkatthe nissakkavacanampi yujjateva.
১৮৯. একং তীরং অগামকং অরঞ্ঞং হোতীতি যোজনা। অদ্ধযোজনগণনায পাচিত্তিযানি হোন্তীতি সম্বন্ধো। মজ্ঝেন গমনেপীতি পিসদ্দো অগামকঅরঞ্ঞতীরপস্সেন গমনে কা নাম কথাতি দস্সেতি। ন কেৰলং নদিযাতি কেৰলং নদিযা এৰ অনাপত্তি নাতি যোজনা, অঞ্ঞেসুপি সমুদ্দাদীসু অনাপত্তীতি অধিপ্পাযো। যোপি ভিক্খু গচ্ছতীতি সম্বন্ধো। হীতি সচ্চং, যস্মা ৰা।
189. Ekaṃ tīraṃ agāmakaṃ araññaṃ hotīti yojanā. Addhayojanagaṇanāya pācittiyāni hontīti sambandho. Majjhena gamanepīti pisaddo agāmakaaraññatīrapassena gamane kā nāma kathāti dasseti. Na kevalaṃ nadiyāti kevalaṃ nadiyā eva anāpatti nāti yojanā, aññesupi samuddādīsu anāpattīti adhippāyo. Yopi bhikkhu gacchatīti sambandho. Hīti saccaṃ, yasmā vā.
১৯১. কালৰিসঙ্কেতো, তিত্থৰিসঙ্কেতো, নাৰাৰিসঙ্কেতোতি তিৰিধো ৰিসঙ্কেতো। তত্থ কালৰিসঙ্কেতেন অনাপত্তিং সন্ধায ‘‘ৰিসঙ্কেতেন অভিরুহন্তী’’তি ৰুত্তং। অঞ্ঞেন ৰিসঙ্কেতেন আপত্তিযেৰ, তমত্থং দস্সেন্তো আহ ‘‘ইধাপী’’তিআদীতি। অট্ঠমং।
191. Kālavisaṅketo, titthavisaṅketo, nāvāvisaṅketoti tividho visaṅketo. Tattha kālavisaṅketena anāpattiṃ sandhāya ‘‘visaṅketena abhiruhantī’’ti vuttaṃ. Aññena visaṅketena āpattiyeva, tamatthaṃ dassento āha ‘‘idhāpī’’tiādīti. Aṭṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
