| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೮. ನಾವಾಭಿರುಹನಸಿಕ್ಖಾಪದಂ
8. Nāvābhiruhanasikkhāpadaṃ
೧೮೮. ಅಟ್ಠಮೇ ಸಹ ಅಞ್ಞಮಞ್ಞಂ ಥವನಂ ಅಭಿತ್ಥವನಂ ಸನ್ಥವೋ, ಸಙ್ಗಮೋತಿ ವುತ್ತಂ ಹೋತಿ। ಮಿತ್ತಭಾವೇನ ಸನ್ಥವೋ ಮಿತ್ತಸನ್ಥವೋ, ಲೋಕೇಹಿ ಅಸ್ಸಾದೇತಬ್ಬೋ ಚ ಸೋ ಮಿತ್ತಸನ್ಥವೋ ಚೇತಿ ಲೋಕಸ್ಸಾದಮಿತ್ತಸನ್ಥವೋ, ತಸ್ಸ ವಸೋ ಪಭೂ, ತೇನ ವಾ ಆಯತ್ತೋತಿ ಲೋಕಸ್ಸಾದಮಿತ್ತಸನ್ಥವವಸೋ, ತೇನ। ಉದ್ಧಂ ಗಚ್ಛತೀತಿ ಉದ್ಧಂಗಾಮಿನೀತಿ ದಸ್ಸೇನ್ತೋ ಆಹ ‘‘ಉದ್ಧ’’ನ್ತಿಆದಿ। ಉದ್ಧನ್ತಿ ಚ ಇಧ ಪಟಿಸೋತೋ। ತೇನಾಹ ‘‘ನದಿಯಾ ಪಟಿಸೋತ’’ನ್ತಿ। ‘‘ಉದ್ಧಂಗಾಮಿನಿ’’ನ್ತಿಮಾತಿಕಾಪದಂ ‘‘ಉಜ್ಜವನಿಕಾಯಾ’’ತಿಪದಭಾಜನಿಯಾ ಸಂಸನ್ದೇನ್ತೋ ಆಹ ‘‘ಯಸ್ಮಾ ಪನಾ’’ತಿಆದಿ। ಯೋತಿ ಭಿಕ್ಖು। ಉದ್ಧಂ ಜವನತೋತಿ ಪಟಿಸೋತಂ ಗಮನತೋ। ತೇನಾತಿ ತೇನ ಹೇತುನಾ। ಅಸ್ಸಾತಿ ‘‘ಉದ್ಧಂಗಾಮಿನಿ’’ನ್ತಿಪದಸ್ಸ। ಅನುಸೋತಂ ಇಧ ಅಧೋ ನಾಮಾತಿ ಆಹ ‘‘ಅನುಸೋತ’’ನ್ತಿ। ಅಸ್ಸಪೀತಿ ಪಿಸದ್ದೋ ಪುರಿಮಾಪೇಕ್ಖೋ। ತತ್ಥಾತಿ ‘‘ಉದ್ಧಂಗಾಮಿನಿಂ ವಾ ಅಧೋಗಾಮಿನಿಂ ವಾ’’ತಿವಚನೇ। ಯನ್ತಿ ನಾವಂ ಹರನ್ತೀತಿ ಸಮ್ಬನ್ಧೋ। ಸಮ್ಪಟಿಪಾದನತ್ಥನ್ತಿ ಸಮ್ಮಾ ಪಟಿಮುಖಂ ಪಾದನತ್ಥಂ, ಉಜುಪಜ್ಜಾಪನತ್ಥನ್ತಿ ಅತ್ಥೋ। ಏತ್ಥಾತಿ ನಾವಾಯಂ। ‘‘ಠಪೇತ್ವಾ’’ತಿಪದಭಾಜನಿಮಪೇಕ್ಖಿತ್ವಾ ‘‘ಉಪಯೋಗತ್ಥೇ ನಿಸ್ಸಕ್ಕವಚನ’’ನ್ತಿ ಆಹ। ‘‘ಅಞ್ಞತ್ರಾ’’ತಿ ಮಾತಿಕಾಪದೇ ಅಪೇಕ್ಖಿತೇ ನಿಸ್ಸಕ್ಕತ್ಥೇ ನಿಸ್ಸಕ್ಕವಚನಮ್ಪಿ ಯುಜ್ಜತೇವ।
188. Aṭṭhame saha aññamaññaṃ thavanaṃ abhitthavanaṃ santhavo, saṅgamoti vuttaṃ hoti. Mittabhāvena santhavo mittasanthavo, lokehi assādetabbo ca so mittasanthavo ceti lokassādamittasanthavo, tassa vaso pabhū, tena vā āyattoti lokassādamittasanthavavaso, tena. Uddhaṃ gacchatīti uddhaṃgāminīti dassento āha ‘‘uddha’’ntiādi. Uddhanti ca idha paṭisoto. Tenāha ‘‘nadiyā paṭisota’’nti. ‘‘Uddhaṃgāmini’’ntimātikāpadaṃ ‘‘ujjavanikāyā’’tipadabhājaniyā saṃsandento āha ‘‘yasmā panā’’tiādi. Yoti bhikkhu. Uddhaṃ javanatoti paṭisotaṃ gamanato. Tenāti tena hetunā. Assāti ‘‘uddhaṃgāmini’’ntipadassa. Anusotaṃ idha adho nāmāti āha ‘‘anusota’’nti. Assapīti pisaddo purimāpekkho. Tatthāti ‘‘uddhaṃgāminiṃ vā adhogāminiṃ vā’’tivacane. Yanti nāvaṃ harantīti sambandho. Sampaṭipādanatthanti sammā paṭimukhaṃ pādanatthaṃ, ujupajjāpanatthanti attho. Etthāti nāvāyaṃ. ‘‘Ṭhapetvā’’tipadabhājanimapekkhitvā ‘‘upayogatthe nissakkavacana’’nti āha. ‘‘Aññatrā’’ti mātikāpade apekkhite nissakkatthe nissakkavacanampi yujjateva.
೧೮೯. ಏಕಂ ತೀರಂ ಅಗಾಮಕಂ ಅರಞ್ಞಂ ಹೋತೀತಿ ಯೋಜನಾ। ಅದ್ಧಯೋಜನಗಣನಾಯ ಪಾಚಿತ್ತಿಯಾನಿ ಹೋನ್ತೀತಿ ಸಮ್ಬನ್ಧೋ। ಮಜ್ಝೇನ ಗಮನೇಪೀತಿ ಪಿಸದ್ದೋ ಅಗಾಮಕಅರಞ್ಞತೀರಪಸ್ಸೇನ ಗಮನೇ ಕಾ ನಾಮ ಕಥಾತಿ ದಸ್ಸೇತಿ। ನ ಕೇವಲಂ ನದಿಯಾತಿ ಕೇವಲಂ ನದಿಯಾ ಏವ ಅನಾಪತ್ತಿ ನಾತಿ ಯೋಜನಾ, ಅಞ್ಞೇಸುಪಿ ಸಮುದ್ದಾದೀಸು ಅನಾಪತ್ತೀತಿ ಅಧಿಪ್ಪಾಯೋ। ಯೋಪಿ ಭಿಕ್ಖು ಗಚ್ಛತೀತಿ ಸಮ್ಬನ್ಧೋ। ಹೀತಿ ಸಚ್ಚಂ, ಯಸ್ಮಾ ವಾ।
189. Ekaṃ tīraṃ agāmakaṃ araññaṃ hotīti yojanā. Addhayojanagaṇanāya pācittiyāni hontīti sambandho. Majjhena gamanepīti pisaddo agāmakaaraññatīrapassena gamane kā nāma kathāti dasseti. Na kevalaṃ nadiyāti kevalaṃ nadiyā eva anāpatti nāti yojanā, aññesupi samuddādīsu anāpattīti adhippāyo. Yopi bhikkhu gacchatīti sambandho. Hīti saccaṃ, yasmā vā.
೧೯೧. ಕಾಲವಿಸಙ್ಕೇತೋ, ತಿತ್ಥವಿಸಙ್ಕೇತೋ, ನಾವಾವಿಸಙ್ಕೇತೋತಿ ತಿವಿಧೋ ವಿಸಙ್ಕೇತೋ। ತತ್ಥ ಕಾಲವಿಸಙ್ಕೇತೇನ ಅನಾಪತ್ತಿಂ ಸನ್ಧಾಯ ‘‘ವಿಸಙ್ಕೇತೇನ ಅಭಿರುಹನ್ತೀ’’ತಿ ವುತ್ತಂ। ಅಞ್ಞೇನ ವಿಸಙ್ಕೇತೇನ ಆಪತ್ತಿಯೇವ, ತಮತ್ಥಂ ದಸ್ಸೇನ್ತೋ ಆಹ ‘‘ಇಧಾಪೀ’’ತಿಆದೀತಿ। ಅಟ್ಠಮಂ।
191. Kālavisaṅketo, titthavisaṅketo, nāvāvisaṅketoti tividho visaṅketo. Tattha kālavisaṅketena anāpattiṃ sandhāya ‘‘visaṅketena abhiruhantī’’ti vuttaṃ. Aññena visaṅketena āpattiyeva, tamatthaṃ dassento āha ‘‘idhāpī’’tiādīti. Aṭṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ಓವಾದವಗ್ಗೋ • 3. Ovādavaggo
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
