| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
8. நாவாபி⁴ருஹனஸிக்கா²பத³வண்ணனா
8. Nāvābhiruhanasikkhāpadavaṇṇanā
188. அட்ட²மஸிக்கா²பதே³ – ஸங்விதா⁴யாதி லோகஸ்ஸாத³மித்தஸந்த²வவஸேன கீளாபுரெக்கா²ரா ஸங்வித³ஹித்வா. உத்³த⁴ங்கா³மினிந்தி உத்³த⁴ங் நதி³யா படிஸோதங் க³ச்ச²ந்திங். யஸ்மா பன யோ உத்³த⁴ங் ஜவனதோ உஜ்ஜவனிகாய நாவாய கீளதி, ஸோ ‘‘உத்³த⁴ங்கா³மினிங் அபி⁴ருஹதீ’’தி வுச்சதி. தேனஸ்ஸ பத³பா⁴ஜனே அத்த²மேவ த³ஸ்ஸேதுங் ‘‘உஜ்ஜவனிகாயா’’தி வுத்தங். அதோ⁴கா³மினிந்தி அதோ⁴ அனுஸோதங் க³ச்ச²ந்திங். யஸ்மா பன யோ அதோ⁴ ஜவனதோ ஓஜவனிகாய நாவாய கீளதி, ஸோ ‘‘அதோ⁴கா³மினிங் அபி⁴ருஹதீ’’தி வுச்சதி. தேனஸ்ஸாபி பத³பா⁴ஜனே அத்த²மேவ த³ஸ்ஸேதுங் ‘‘ஓஜவனிகாயா’’தி வுத்தங். தத்த² யங் தித்த²ஸம்படிபாத³னத்த²ங் உத்³த⁴ங் வா அதோ⁴ வா ஹரந்தி, எத்த² அனாபத்தி. திரியங் தரணாயாதி உபயோக³த்தே² நிஸ்ஸக்கவசனங்.
188. Aṭṭhamasikkhāpade – saṃvidhāyāti lokassādamittasanthavavasena kīḷāpurekkhārā saṃvidahitvā. Uddhaṃgāmininti uddhaṃ nadiyā paṭisotaṃ gacchantiṃ. Yasmā pana yo uddhaṃ javanato ujjavanikāya nāvāya kīḷati, so ‘‘uddhaṃgāminiṃ abhiruhatī’’ti vuccati. Tenassa padabhājane atthameva dassetuṃ ‘‘ujjavanikāyā’’ti vuttaṃ. Adhogāmininti adho anusotaṃ gacchantiṃ. Yasmā pana yo adho javanato ojavanikāya nāvāya kīḷati, so ‘‘adhogāminiṃ abhiruhatī’’ti vuccati. Tenassāpi padabhājane atthameva dassetuṃ ‘‘ojavanikāyā’’ti vuttaṃ. Tattha yaṃ titthasampaṭipādanatthaṃ uddhaṃ vā adho vā haranti, ettha anāpatti. Tiriyaṃ taraṇāyāti upayogatthe nissakkavacanaṃ.
189. கா³மந்தரே கா³மந்தரேதி எத்த² யஸ்ஸா நதி³யா ஏகங் தீரங் குக்குடஸம்பாத³கா³மேஹி நிரந்தரங், ஏகங் அகா³மகங் அரஞ்ஞங், தஸ்ஸா ஸகா³மகதீரபஸ்ஸேன க³மனகாலே கா³மந்தரக³ணனாய பாசித்தியானி, அகா³மகதீரபஸ்ஸேன க³மனகாலே அத்³த⁴யோஜனக³ணனாய. யா பன யோஜனவித்த²தா ஹோதி, தஸ்ஸா மஜ்ஜே²ன க³மனேபி அத்³த⁴யோஜனக³ணனாய பாசித்தியானி வேதி³தப்³பா³னி. அனாபத்தி திரியங் தரணாயாதி எத்த² ந கேவலங் நதி³யா, யோபி மஹாதித்த²பட்டனதோ தாமலித்திங் வா ஸுவண்ணபூ⁴மிங் வா க³ச்ச²தி, தஸ்ஸாபி அனாபத்தி. ஸப்³ப³அட்ட²கதா²ஸு ஹி நதி³யங்யேவ ஆபத்தி விசாரிதா, ந ஸமுத்³தே³.
189.Gāmantare gāmantareti ettha yassā nadiyā ekaṃ tīraṃ kukkuṭasampādagāmehi nirantaraṃ, ekaṃ agāmakaṃ araññaṃ, tassā sagāmakatīrapassena gamanakāle gāmantaragaṇanāya pācittiyāni, agāmakatīrapassena gamanakāle addhayojanagaṇanāya. Yā pana yojanavitthatā hoti, tassā majjhena gamanepi addhayojanagaṇanāya pācittiyāni veditabbāni. Anāpatti tiriyaṃ taraṇāyāti ettha na kevalaṃ nadiyā, yopi mahātitthapaṭṭanato tāmalittiṃ vā suvaṇṇabhūmiṃ vā gacchati, tassāpi anāpatti. Sabbaaṭṭhakathāsu hi nadiyaṃyeva āpatti vicāritā, na samudde.
191. விஸங்கேதேனாதி இதா⁴பி காலவிஸங்கேதேனேவ அனாபத்தி, தித்த²விஸங்கேதேன பன நாவாவிஸங்கேதேன வா க³ச்ச²ந்தஸ்ஸ ஆபத்தியேவ. ஸேஸங் பட²மஸிக்கா²பத³ஸதி³ஸமேவ ஸத்³தி⁴ங் ஸமுட்டா²னாதீ³ஹீதி.
191.Visaṅketenāti idhāpi kālavisaṅketeneva anāpatti, titthavisaṅketena pana nāvāvisaṅketena vā gacchantassa āpattiyeva. Sesaṃ paṭhamasikkhāpadasadisameva saddhiṃ samuṭṭhānādīhīti.
நாவாபி⁴ருஹனஸிக்கா²பத³ங் அட்ட²மங்.
Nāvābhiruhanasikkhāpadaṃ aṭṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ஓவாத³வக்³கோ³ • 3. Ovādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. நாவாபி⁴ருஹனஸிக்கா²பத³ங் • 8. Nāvābhiruhanasikkhāpadaṃ
