| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. நாவாபி⁴ருஹனஸிக்கா²பத³வண்ணனா
8. Nāvābhiruhanasikkhāpadavaṇṇanā
கீளாபுரெக்கா²ரோதி லோகஸ்ஸாத³மித்தஸந்த²வவஸேன கீளாபுரெக்கா²ரோ. ததே²வாதி கீளாவஸேனேவ. அகா³மகதீரபஸ்ஸேனாதி அத்³த⁴யோஜனப்³ப⁴ந்தரே கா³மானங் அபா⁴வதோ அகா³மகதீரபஸ்ஸேன. பாளியங் ‘‘உத்³த⁴ங்கா³மினிங் வா அதோ⁴கா³மினிங் வா’’தி (பாசி॰ 186) வசனதோ பன வாபிஸமுத்³தா³தீ³ஸு கீளாபுரெக்கா²ரதாயபி க³ச்ச²ந்தஸ்ஸ அனாபத்தி. தேனாஹ ‘‘ஸமுத்³தே³ பன யதா²ஸுக²ங் க³ந்துங் வட்டதீ’’தி. விஸங்கேதேனாதி இதா⁴பி காலவிஸங்கேதேனேவ அனாபத்தி, தித்த²விஸங்கேதேன, பன நாவாவிஸங்கேதேன வா க³ச்ச²ந்தஸ்ஸ ஆபத்தியேவ.
Kīḷāpurekkhāroti lokassādamittasanthavavasena kīḷāpurekkhāro. Tathevāti kīḷāvaseneva. Agāmakatīrapassenāti addhayojanabbhantare gāmānaṃ abhāvato agāmakatīrapassena. Pāḷiyaṃ ‘‘uddhaṃgāminiṃ vā adhogāminiṃ vā’’ti (pāci. 186) vacanato pana vāpisamuddādīsu kīḷāpurekkhāratāyapi gacchantassa anāpatti. Tenāha ‘‘samudde pana yathāsukhaṃ gantuṃ vaṭṭatī’’ti. Visaṅketenāti idhāpi kālavisaṅketeneva anāpatti, titthavisaṅketena, pana nāvāvisaṅketena vā gacchantassa āpattiyeva.
ஸேஸந்தி ஸத்³தி⁴ங் ஸமுட்டா²னாதீ³ஹி அவஸேஸங், கேசி பன ‘‘கீளாபுரெக்கா²ரோ ‘ஸங்வித³ஹித்வா’தி (ஸாரத்த²॰ டீ॰ பாசித்திய 3.188) வசனதோ இமங் ஸிக்கா²பத³ங் அகுஸலசித்தங் லோகவஜ்ஜங், தஸ்மா ஸேஸங் நாம ட²பெத்வா ‘பண்ணத்திவஜ்ஜங் திசித்த’ந்தி இத³ங் த்³வயங் அவஸேஸ’’ந்தி வத³ந்தி, தங் ந க³ஹேதப்³ப³ங். கீளாபுரெக்கா²ரதாய ஹி அபி⁴ருஹித்வாபி கா³மந்தரோக்கமனே, அத்³த⁴யோஜனாதிக்கமே வா ஸங்வேக³ங் படிலபி⁴த்வா அரஹத்தங் வா ஸச்சி²கரெய்ய, நித்³த³ங் வா ஓக்கமெய்ய, கம்மட்டா²னங் வா மனஸி கரொந்தோ க³ச்செ²ய்ய, குதோ சஸ்ஸ அகுஸலசித்தஸமங்கி³தா, யேனித³ங் ஸிக்கா²பத³ங் அகுஸலசித்தங், லோகவஜ்ஜஞ்ச ஸியாதி.
Sesanti saddhiṃ samuṭṭhānādīhi avasesaṃ, keci pana ‘‘kīḷāpurekkhāro ‘saṃvidahitvā’ti (sārattha. ṭī. pācittiya 3.188) vacanato imaṃ sikkhāpadaṃ akusalacittaṃ lokavajjaṃ, tasmā sesaṃ nāma ṭhapetvā ‘paṇṇattivajjaṃ ticitta’nti idaṃ dvayaṃ avasesa’’nti vadanti, taṃ na gahetabbaṃ. Kīḷāpurekkhāratāya hi abhiruhitvāpi gāmantarokkamane, addhayojanātikkame vā saṃvegaṃ paṭilabhitvā arahattaṃ vā sacchikareyya, niddaṃ vā okkameyya, kammaṭṭhānaṃ vā manasi karonto gaccheyya, kuto cassa akusalacittasamaṅgitā, yenidaṃ sikkhāpadaṃ akusalacittaṃ, lokavajjañca siyāti.
நாவாபி⁴ருஹனஸிக்கா²பத³வண்ணனா நிட்டி²தா.
Nāvābhiruhanasikkhāpadavaṇṇanā niṭṭhitā.
