| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
8. நாவாபி⁴ருஹனஸிக்கா²பத³வண்ணனா
8. Nāvābhiruhanasikkhāpadavaṇṇanā
188. அட்ட²மே லோகஸ்ஸாத³மித்தஸந்த²வவஸேன கீளாபுரெக்கா²ரா ஸங்வித³ஹித்வாதி அயங் விஸேஸோ ‘‘ஏவமிமே…பே॰… பி⁴க்கு²னீஹி ஸத்³தி⁴ங் நாவாய கீளந்தீ’’தி இமினா ‘‘உத்³த⁴ங்கா³மினிங் வா அதோ⁴கா³மினிங் வா’’தி இமினா ச ஸித்³தோ⁴.
188. Aṭṭhame lokassādamittasanthavavasena kīḷāpurekkhārā saṃvidahitvāti ayaṃ viseso ‘‘evamime…pe… bhikkhunīhi saddhiṃ nāvāya kīḷantī’’ti iminā ‘‘uddhaṃgāminiṃ vā adhogāminiṃ vā’’ti iminā ca siddho.
189. நதி³யா குதோ கா³மந்தரந்தி ஆஹ ‘‘யஸ்ஸா நதி³யா’’திஆதி³. ‘‘தஸ்ஸா ஸகா³மகதீரபஸ்ஸேன…பே॰… அத்³த⁴யோஜனக³ணனாயாதி ஏகேகபஸ்ஸேனேவ க³மனங் ஸந்தா⁴ய வுத்தத்தா தாதி³ஸிகாய நதி³யா மஜ்ஜே²ன க³ச்ச²ந்தஸ்ஸ கா³மந்தரக³ணனாய அத்³த⁴யோஜனக³ணனாய ச ஆபத்தீ’’தி வத³ந்தி. ஸப்³ப³அட்ட²கதா²ஸூதிஆதி³னா அத்தனா வுத்தமேவத்த²ங் ஸமத்தே²தி. ‘‘கீளாபுரெக்கா²ரதாய பி⁴க்கு²னியா ஸத்³தி⁴ங் ஸங்விதா⁴ய நாவங் அபி⁴ருஹந்தஸ்ஸ நதி³யங்யேவ பாசித்தியஸ்ஸ வுத்தத்தா வாபிஸமுத்³தா³தீ³ஸு கீளாபுரெக்கா²ரதாய து³க்கடமேவ, ந பாசித்திய’’ந்தி வத³ந்தி. ‘‘லோகஸ்ஸாத³மித்தஸந்த²வவஸேன கீளாபுரெக்கா²ரா ஸங்வித³ஹித்வா’’தி வசனதோ கேசி ‘‘இமங் ஸிக்கா²பத³ங் அகுஸலசித்தங் லோகவஜ்ஜ’’ந்தி வத³ந்தி, தங் ந க³ஹேதப்³ப³ங். கீளாபுரெக்கா²ரதாய ஹி அபி⁴ருஹித்வாபி கா³மந்தரோக்கமனே அத்³த⁴யோஜனாதிக்கமே வா குஸலாப்³யாகதசித்தஸமங்கீ³பி ஹுத்வா ஆபத்திங் ஆபஜ்ஜதி . யதி³ ஹி ஸோ ஸங்வேக³ங் படிலபி⁴த்வா அரஹத்தங் வா ஸச்சி²கரெய்ய, நித்³த³ங் வா ஓக்கமெய்ய, கம்மட்டா²னங் வா மனஸி கரொந்தோ க³ச்செ²ய்ய, குதோ தஸ்ஸ அகுஸலசித்தஸமங்கி³தா, யேனித³ங் ஸிக்கா²பத³ங் அகுஸலசித்தங் லோகவஜ்ஜந்தி வுச்சதி, தஸ்மா பண்ணத்திவஜ்ஜங் திசித்தந்தி ஸித்³த⁴ங். ஸேஸமெத்த² உத்தானமேவ.
189. Nadiyā kuto gāmantaranti āha ‘‘yassā nadiyā’’tiādi. ‘‘Tassā sagāmakatīrapassena…pe… addhayojanagaṇanāyāti ekekapasseneva gamanaṃ sandhāya vuttattā tādisikāya nadiyā majjhena gacchantassa gāmantaragaṇanāya addhayojanagaṇanāya ca āpattī’’ti vadanti. Sabbaaṭṭhakathāsūtiādinā attanā vuttamevatthaṃ samattheti. ‘‘Kīḷāpurekkhāratāya bhikkhuniyā saddhiṃ saṃvidhāya nāvaṃ abhiruhantassa nadiyaṃyeva pācittiyassa vuttattā vāpisamuddādīsu kīḷāpurekkhāratāya dukkaṭameva, na pācittiya’’nti vadanti. ‘‘Lokassādamittasanthavavasena kīḷāpurekkhārā saṃvidahitvā’’ti vacanato keci ‘‘imaṃ sikkhāpadaṃ akusalacittaṃ lokavajja’’nti vadanti, taṃ na gahetabbaṃ. Kīḷāpurekkhāratāya hi abhiruhitvāpi gāmantarokkamane addhayojanātikkame vā kusalābyākatacittasamaṅgīpi hutvā āpattiṃ āpajjati . Yadi hi so saṃvegaṃ paṭilabhitvā arahattaṃ vā sacchikareyya, niddaṃ vā okkameyya, kammaṭṭhānaṃ vā manasi karonto gaccheyya, kuto tassa akusalacittasamaṅgitā, yenidaṃ sikkhāpadaṃ akusalacittaṃ lokavajjanti vuccati, tasmā paṇṇattivajjaṃ ticittanti siddhaṃ. Sesamettha uttānameva.
நாவாபி⁴ருஹனஸிக்கா²பத³வண்ணனா நிட்டி²தா.
Nāvābhiruhanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ஓவாத³வக்³கோ³ • 3. Ovādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. நாவாபி⁴ருஹனஸிக்கா²பத³வண்ணனா • 8. Nāvābhiruhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. நாவாபி⁴ருஹனஸிக்கா²பத³ங் • 8. Nāvābhiruhanasikkhāpadaṃ
