| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৮. নাৰাভিরুহনসিক্খাপদৰণ্ণনা
8. Nāvābhiruhanasikkhāpadavaṇṇanā
১৮৮. অট্ঠমসিক্খাপদে – সংৰিধাযাতি লোকস্সাদমিত্তসন্থৰৰসেন কীল়াপুরেক্খারা সংৰিদহিত্ৰা। উদ্ধংগামিনিন্তি উদ্ধং নদিযা পটিসোতং গচ্ছন্তিং। যস্মা পন যো উদ্ধং জৰনতো উজ্জৰনিকায নাৰায কীল়তি, সো ‘‘উদ্ধংগামিনিং অভিরুহতী’’তি ৰুচ্চতি। তেনস্স পদভাজনে অত্থমেৰ দস্সেতুং ‘‘উজ্জৰনিকাযা’’তি ৰুত্তং। অধোগামিনিন্তি অধো অনুসোতং গচ্ছন্তিং। যস্মা পন যো অধো জৰনতো ওজৰনিকায নাৰায কীল়তি, সো ‘‘অধোগামিনিং অভিরুহতী’’তি ৰুচ্চতি। তেনস্সাপি পদভাজনে অত্থমেৰ দস্সেতুং ‘‘ওজৰনিকাযা’’তি ৰুত্তং। তত্থ যং তিত্থসম্পটিপাদনত্থং উদ্ধং ৰা অধো ৰা হরন্তি, এত্থ অনাপত্তি। তিরিযং তরণাযাতি উপযোগত্থে নিস্সক্কৰচনং।
188. Aṭṭhamasikkhāpade – saṃvidhāyāti lokassādamittasanthavavasena kīḷāpurekkhārā saṃvidahitvā. Uddhaṃgāmininti uddhaṃ nadiyā paṭisotaṃ gacchantiṃ. Yasmā pana yo uddhaṃ javanato ujjavanikāya nāvāya kīḷati, so ‘‘uddhaṃgāminiṃ abhiruhatī’’ti vuccati. Tenassa padabhājane atthameva dassetuṃ ‘‘ujjavanikāyā’’ti vuttaṃ. Adhogāmininti adho anusotaṃ gacchantiṃ. Yasmā pana yo adho javanato ojavanikāya nāvāya kīḷati, so ‘‘adhogāminiṃ abhiruhatī’’ti vuccati. Tenassāpi padabhājane atthameva dassetuṃ ‘‘ojavanikāyā’’ti vuttaṃ. Tattha yaṃ titthasampaṭipādanatthaṃ uddhaṃ vā adho vā haranti, ettha anāpatti. Tiriyaṃ taraṇāyāti upayogatthe nissakkavacanaṃ.
১৮৯. গামন্তরে গামন্তরেতি এত্থ যস্সা নদিযা একং তীরং কুক্কুটসম্পাদগামেহি নিরন্তরং, একং অগামকং অরঞ্ঞং, তস্সা সগামকতীরপস্সেন গমনকালে গামন্তরগণনায পাচিত্তিযানি, অগামকতীরপস্সেন গমনকালে অদ্ধযোজনগণনায। যা পন যোজনৰিত্থতা হোতি, তস্সা মজ্ঝেন গমনেপি অদ্ধযোজনগণনায পাচিত্তিযানি ৰেদিতব্বানি। অনাপত্তি তিরিযং তরণাযাতি এত্থ ন কেৰলং নদিযা, যোপি মহাতিত্থপট্টনতো তামলিত্তিং ৰা সুৰণ্ণভূমিং ৰা গচ্ছতি, তস্সাপি অনাপত্তি। সব্বঅট্ঠকথাসু হি নদিযংযেৰ আপত্তি ৰিচারিতা, ন সমুদ্দে।
189.Gāmantare gāmantareti ettha yassā nadiyā ekaṃ tīraṃ kukkuṭasampādagāmehi nirantaraṃ, ekaṃ agāmakaṃ araññaṃ, tassā sagāmakatīrapassena gamanakāle gāmantaragaṇanāya pācittiyāni, agāmakatīrapassena gamanakāle addhayojanagaṇanāya. Yā pana yojanavitthatā hoti, tassā majjhena gamanepi addhayojanagaṇanāya pācittiyāni veditabbāni. Anāpatti tiriyaṃ taraṇāyāti ettha na kevalaṃ nadiyā, yopi mahātitthapaṭṭanato tāmalittiṃ vā suvaṇṇabhūmiṃ vā gacchati, tassāpi anāpatti. Sabbaaṭṭhakathāsu hi nadiyaṃyeva āpatti vicāritā, na samudde.
১৯১. ৰিসঙ্কেতেনাতি ইধাপি কালৰিসঙ্কেতেনেৰ অনাপত্তি, তিত্থৰিসঙ্কেতেন পন নাৰাৰিসঙ্কেতেন ৰা গচ্ছন্তস্স আপত্তিযেৰ। সেসং পঠমসিক্খাপদসদিসমেৰ সদ্ধিং সমুট্ঠানাদীহীতি।
191.Visaṅketenāti idhāpi kālavisaṅketeneva anāpatti, titthavisaṅketena pana nāvāvisaṅketena vā gacchantassa āpattiyeva. Sesaṃ paṭhamasikkhāpadasadisameva saddhiṃ samuṭṭhānādīhīti.
নাৰাভিরুহনসিক্খাপদং অট্ঠমং।
Nāvābhiruhanasikkhāpadaṃ aṭṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. নাৰাভিরুহনসিক্খাপদৰণ্ণনা • 8. Nāvābhiruhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮. নাৰাভিরুহনসিক্খাপদং • 8. Nāvābhiruhanasikkhāpadaṃ
