| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā |
೮. ನಾವಾಭಿರುಹನಸಿಕ್ಖಾಪದವಣ್ಣನಾ
8. Nāvābhiruhanasikkhāpadavaṇṇanā
೧೮೮. ಅಟ್ಠಮಸಿಕ್ಖಾಪದೇ – ಸಂವಿಧಾಯಾತಿ ಲೋಕಸ್ಸಾದಮಿತ್ತಸನ್ಥವವಸೇನ ಕೀಳಾಪುರೇಕ್ಖಾರಾ ಸಂವಿದಹಿತ್ವಾ। ಉದ್ಧಂಗಾಮಿನಿನ್ತಿ ಉದ್ಧಂ ನದಿಯಾ ಪಟಿಸೋತಂ ಗಚ್ಛನ್ತಿಂ। ಯಸ್ಮಾ ಪನ ಯೋ ಉದ್ಧಂ ಜವನತೋ ಉಜ್ಜವನಿಕಾಯ ನಾವಾಯ ಕೀಳತಿ, ಸೋ ‘‘ಉದ್ಧಂಗಾಮಿನಿಂ ಅಭಿರುಹತೀ’’ತಿ ವುಚ್ಚತಿ। ತೇನಸ್ಸ ಪದಭಾಜನೇ ಅತ್ಥಮೇವ ದಸ್ಸೇತುಂ ‘‘ಉಜ್ಜವನಿಕಾಯಾ’’ತಿ ವುತ್ತಂ। ಅಧೋಗಾಮಿನಿನ್ತಿ ಅಧೋ ಅನುಸೋತಂ ಗಚ್ಛನ್ತಿಂ। ಯಸ್ಮಾ ಪನ ಯೋ ಅಧೋ ಜವನತೋ ಓಜವನಿಕಾಯ ನಾವಾಯ ಕೀಳತಿ, ಸೋ ‘‘ಅಧೋಗಾಮಿನಿಂ ಅಭಿರುಹತೀ’’ತಿ ವುಚ್ಚತಿ। ತೇನಸ್ಸಾಪಿ ಪದಭಾಜನೇ ಅತ್ಥಮೇವ ದಸ್ಸೇತುಂ ‘‘ಓಜವನಿಕಾಯಾ’’ತಿ ವುತ್ತಂ। ತತ್ಥ ಯಂ ತಿತ್ಥಸಮ್ಪಟಿಪಾದನತ್ಥಂ ಉದ್ಧಂ ವಾ ಅಧೋ ವಾ ಹರನ್ತಿ, ಏತ್ಥ ಅನಾಪತ್ತಿ। ತಿರಿಯಂ ತರಣಾಯಾತಿ ಉಪಯೋಗತ್ಥೇ ನಿಸ್ಸಕ್ಕವಚನಂ।
188. Aṭṭhamasikkhāpade – saṃvidhāyāti lokassādamittasanthavavasena kīḷāpurekkhārā saṃvidahitvā. Uddhaṃgāmininti uddhaṃ nadiyā paṭisotaṃ gacchantiṃ. Yasmā pana yo uddhaṃ javanato ujjavanikāya nāvāya kīḷati, so ‘‘uddhaṃgāminiṃ abhiruhatī’’ti vuccati. Tenassa padabhājane atthameva dassetuṃ ‘‘ujjavanikāyā’’ti vuttaṃ. Adhogāmininti adho anusotaṃ gacchantiṃ. Yasmā pana yo adho javanato ojavanikāya nāvāya kīḷati, so ‘‘adhogāminiṃ abhiruhatī’’ti vuccati. Tenassāpi padabhājane atthameva dassetuṃ ‘‘ojavanikāyā’’ti vuttaṃ. Tattha yaṃ titthasampaṭipādanatthaṃ uddhaṃ vā adho vā haranti, ettha anāpatti. Tiriyaṃ taraṇāyāti upayogatthe nissakkavacanaṃ.
೧೮೯. ಗಾಮನ್ತರೇ ಗಾಮನ್ತರೇತಿ ಏತ್ಥ ಯಸ್ಸಾ ನದಿಯಾ ಏಕಂ ತೀರಂ ಕುಕ್ಕುಟಸಮ್ಪಾದಗಾಮೇಹಿ ನಿರನ್ತರಂ, ಏಕಂ ಅಗಾಮಕಂ ಅರಞ್ಞಂ, ತಸ್ಸಾ ಸಗಾಮಕತೀರಪಸ್ಸೇನ ಗಮನಕಾಲೇ ಗಾಮನ್ತರಗಣನಾಯ ಪಾಚಿತ್ತಿಯಾನಿ, ಅಗಾಮಕತೀರಪಸ್ಸೇನ ಗಮನಕಾಲೇ ಅದ್ಧಯೋಜನಗಣನಾಯ। ಯಾ ಪನ ಯೋಜನವಿತ್ಥತಾ ಹೋತಿ, ತಸ್ಸಾ ಮಜ್ಝೇನ ಗಮನೇಪಿ ಅದ್ಧಯೋಜನಗಣನಾಯ ಪಾಚಿತ್ತಿಯಾನಿ ವೇದಿತಬ್ಬಾನಿ। ಅನಾಪತ್ತಿ ತಿರಿಯಂ ತರಣಾಯಾತಿ ಏತ್ಥ ನ ಕೇವಲಂ ನದಿಯಾ, ಯೋಪಿ ಮಹಾತಿತ್ಥಪಟ್ಟನತೋ ತಾಮಲಿತ್ತಿಂ ವಾ ಸುವಣ್ಣಭೂಮಿಂ ವಾ ಗಚ್ಛತಿ, ತಸ್ಸಾಪಿ ಅನಾಪತ್ತಿ। ಸಬ್ಬಅಟ್ಠಕಥಾಸು ಹಿ ನದಿಯಂಯೇವ ಆಪತ್ತಿ ವಿಚಾರಿತಾ, ನ ಸಮುದ್ದೇ।
189.Gāmantare gāmantareti ettha yassā nadiyā ekaṃ tīraṃ kukkuṭasampādagāmehi nirantaraṃ, ekaṃ agāmakaṃ araññaṃ, tassā sagāmakatīrapassena gamanakāle gāmantaragaṇanāya pācittiyāni, agāmakatīrapassena gamanakāle addhayojanagaṇanāya. Yā pana yojanavitthatā hoti, tassā majjhena gamanepi addhayojanagaṇanāya pācittiyāni veditabbāni. Anāpatti tiriyaṃ taraṇāyāti ettha na kevalaṃ nadiyā, yopi mahātitthapaṭṭanato tāmalittiṃ vā suvaṇṇabhūmiṃ vā gacchati, tassāpi anāpatti. Sabbaaṭṭhakathāsu hi nadiyaṃyeva āpatti vicāritā, na samudde.
೧೯೧. ವಿಸಙ್ಕೇತೇನಾತಿ ಇಧಾಪಿ ಕಾಲವಿಸಙ್ಕೇತೇನೇವ ಅನಾಪತ್ತಿ, ತಿತ್ಥವಿಸಙ್ಕೇತೇನ ಪನ ನಾವಾವಿಸಙ್ಕೇತೇನ ವಾ ಗಚ್ಛನ್ತಸ್ಸ ಆಪತ್ತಿಯೇವ। ಸೇಸಂ ಪಠಮಸಿಕ್ಖಾಪದಸದಿಸಮೇವ ಸದ್ಧಿಂ ಸಮುಟ್ಠಾನಾದೀಹೀತಿ।
191.Visaṅketenāti idhāpi kālavisaṅketeneva anāpatti, titthavisaṅketena pana nāvāvisaṅketena vā gacchantassa āpattiyeva. Sesaṃ paṭhamasikkhāpadasadisameva saddhiṃ samuṭṭhānādīhīti.
ನಾವಾಭಿರುಹನಸಿಕ್ಖಾಪದಂ ಅಟ್ಠಮಂ।
Nāvābhiruhanasikkhāpadaṃ aṭṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ಓವಾದವಗ್ಗೋ • 3. Ovādavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೮. ನಾವಾಭಿರುಹನಸಿಕ್ಖಾಪದವಣ್ಣನಾ • 8. Nāvābhiruhanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೮. ನಾವಾಭಿರುಹನಸಿಕ್ಖಾಪದಂ • 8. Nāvābhiruhanasikkhāpadaṃ
