| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
नवगुय्हमन्तविधंसकं
Navaguyhamantavidhaṃsakaṃ
‘‘भन्ते नागसेन, नविमे पुग्गला मन्तितं गुय्हं विवरन्ति न धारेन्ति। कतमे नव? रागचरितो दोसचरितो मोहचरितो भीरुको आमिसगरुको इत्थी सोण्डो पण्डको दारको’’ति।
‘‘Bhante nāgasena, navime puggalā mantitaṃ guyhaṃ vivaranti na dhārenti. Katame nava? Rāgacarito dosacarito mohacarito bhīruko āmisagaruko itthī soṇḍo paṇḍako dārako’’ti.
थेरो आह ‘‘तेसं को दोसो’’ति? ‘‘रागचरितो, भन्ते नागसेन, रागवसेन मन्तितं गुय्हं विवरति न धारेति, दोसचरितो, भन्ते , दोसवसेन मन्तितं गुय्हं विवरति न धारेति, मूळ्हो मोहवसेन मन्तितं गुय्हं विवरति न धारेति, भीरुको भयवसेन मन्तितं गुय्हं विवरति न धारेति, आमिसगरुको आमिसहेतु मन्तितं गुय्हं विवरति न धारेति, इत्थी पञ्ञाय इत्तरताय मन्तितं गुय्हं विवरति न धारेति, सोण्डिको सुरालोलताय मन्तितं गुय्हं विवरति न धारेति, पण्डको अनेकंसिकताय मन्तितं गुय्हं विवरति न धारेति, दारको चपलताय मन्तितं गुय्हं विवरति न धारेति। भवतीह –
Thero āha ‘‘tesaṃ ko doso’’ti? ‘‘Rāgacarito, bhante nāgasena, rāgavasena mantitaṃ guyhaṃ vivarati na dhāreti, dosacarito, bhante , dosavasena mantitaṃ guyhaṃ vivarati na dhāreti, mūḷho mohavasena mantitaṃ guyhaṃ vivarati na dhāreti, bhīruko bhayavasena mantitaṃ guyhaṃ vivarati na dhāreti, āmisagaruko āmisahetu mantitaṃ guyhaṃ vivarati na dhāreti, itthī paññāya ittaratāya mantitaṃ guyhaṃ vivarati na dhāreti, soṇḍiko surālolatāya mantitaṃ guyhaṃ vivarati na dhāreti, paṇḍako anekaṃsikatāya mantitaṃ guyhaṃ vivarati na dhāreti, dārako capalatāya mantitaṃ guyhaṃ vivarati na dhāreti. Bhavatīha –
इत्थी सोण्डो पण्डको च, नवमो भवति दारको॥
Itthī soṇḍo paṇḍako ca, navamo bhavati dārako.
‘‘नवेते पुग्गला लोके, इत्तरा चलिता चला।
‘‘Navete puggalā loke, ittarā calitā calā;
एतेहि मन्तितं गुय्हं, खिप्पं भवति पाकट’’’न्ति॥
Etehi mantitaṃ guyhaṃ, khippaṃ bhavati pākaṭa’’’nti.
नव गुय्हमन्तविधंसका पुग्गला।
Nava guyhamantavidhaṃsakā puggalā.
Footnotes:
