| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
நவகம்மதா³னகதா²
Navakammadānakathā
323. அத² கோ² ப⁴க³வா கீடாகி³ரிஸ்மிங் யதா²பி⁴ரந்தங் விஹரித்வா யேன ஆளவீ தேன சாரிகங் பக்காமி. அனுபுப்³பே³ன சாரிகங் சரமானோ யேன ஆளவீ தத³வஸரி. தத்ர ஸுத³ங் ப⁴க³வா ஆளவியங் விஹரதி அக்³கா³ளவே சேதியே. தேன கோ² பன ஸமயேன ஆளவகா 1 பி⁴க்கூ² ஏவரூபானி நவகம்மானி தெ³ந்தி – பிண்ட³னிக்கே²பனமத்தேனபி நவகம்மங் தெ³ந்தி; குட்டலேபனமத்தேனபி நவகம்மங் தெ³ந்தி; த்³வாரட்ட²பனமத்தேனபி நவகம்மங் தெ³ந்தி; அக்³க³ளவட்டிகரணமத்தேனபி நவகம்மங் தெ³ந்தி; ஆலோகஸந்தி⁴கரணமத்தேனபி நவகம்மங் தெ³ந்தி; ஸேதவண்ணகரணமத்தேனபி நவகம்மங் தெ³ந்தி; காளவண்ணகரணமத்தேனபி நவகம்மங் தெ³ந்தி; கே³ருகபரிகம்மகரணமத்தேனபி நவகம்மங் தெ³ந்தி; சா²த³னமத்தேனபி நவகம்மங் தெ³ந்தி; ப³ந்த⁴னமத்தேனபி நவகம்மங் தெ³ந்தி; ப⁴ண்டி³காட்ட²பனமத்தேனபி நவகம்மங் தெ³ந்தி; க²ண்ட³பு²ல்லபடிஸங்க²ரணமத்தேனபி நவகம்மங் தெ³ந்தி; பரிப⁴ண்ட³கரணமத்தேனபி நவகம்மங் தெ³ந்தி; வீஸதிவஸ்ஸிகம்பி நவகம்மங் தெ³ந்தி; திங்ஸவஸ்ஸிகம்பி நவகம்மங் தெ³ந்தி; யாவஜீவிகம்பி நவகம்மங் தெ³ந்தி; தூ⁴மகாலிகம்பி பரியோஸிதங் விஹாரங் நவகம்மங் தெ³ந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆளவகா பி⁴க்கூ² ஏவரூபானி நவகம்மானி த³ஸ்ஸந்தி – பிண்ட³னிக்கே²பனமத்தேனபி நவகம்மங் த³ஸ்ஸந்தி; குட்டலேபனமத்தேனபி… த்³வாரட்ட²பனமத்தேனபி … அக்³க³ளவட்டிகரணமத்தேனபி… ஆலோகஸந்தி⁴கரணமத்தேனபி… ஸேதவண்ணகரணமத்தேனபி… காளவண்ணகரணமத்தேனபி… கே³ருகபரிகம்மகரணமத்தேனபி… சா²தே³னமத்தேனபி… ப³ந்த⁴னமத்தேனபி… ப⁴ண்டி³காளபனமத்தேனபி… க²ண்ட³பு²ல்லபடிஸங்க²ரணமத்தேனபி… பரிப⁴ண்ட³கரணமத்தேனபி… விஸதிவஸ்ஸிகம்பி… திங்ஸவஸ்ஸிகம்பி… யாவஜீவிகம்பி… தூ⁴மகாலிகம்பி பரியோஸிதங் விஹாரங் நவகம்மங் த³ஸ்ஸந்தீ’’தி! ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே…பே॰… ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பிண்ட³னிக்கே²பனமத்தேன நவகம்மங் தா³தப்³ப³ங்; ந குட்டலேபனமத்தேன நவகம்மங் தா³தப்³ப³ங். ந த்³வாரட்ட²பனமத்தேன நவகம்மங் தா³தப்³ப³ங். ந அக்³க³ளவட்டிகரணமத்தேன நவகம்மங் தா³தப்³ப³ங். ந ஆலோகஸந்தி⁴கரணமத்தேன நவகம்மங் தா³தப்³ப³ங். ந ஸேதவண்ணகரணமத்தேன நவகம்மங் தா³தப்³ப³ங். ந காளவண்ணகரணமத்தேன நவகம்மங் தா³தப்³ப³ங். ந கே³ருகபரிகம்மகரணமத்தேன நவகம்மங் தா³தப்³ப³ங். ந சா²தே³னமத்தேன நவகம்மங் தா³தப்³ப³ங். ந ப³ந்த⁴னமத்தேன நவகம்மங் தா³தப்³ப³ங். ந ப⁴ண்டி³காளபனமத்தேன நவகம்மங் தா³தப்³ப³ங். ந க²ண்ட³பு²ல்லபடிஸங்க²ரணமத்தேன நவகம்மங் தா³தப்³ப³ங். ந பரிப⁴ண்ட³கரணமத்தேன நவகம்மங் தா³தப்³ப³ங். ந விஸதிவஸ்ஸிகங் நவகம்மங் தா³தப்³ப³ங். ந திங்ஸவஸ்ஸிகங் நவகம்மங் தா³தப்³ப³ங். ந யாவஜீவிகங் நவகம்மங் தா³தப்³ப³ங். ந தூ⁴மகாலிகம்பி பரியோஸிதங் விஹாரங் நவகம்மங் தா³தப்³ப³ங். யோ த³தெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அகதங் வா விப்பகதங் வா நவகம்மங் தா³துங், கு²த்³த³கே விஹாரே கம்மங் ஓலோகெத்வா ச²ப்பஞ்சவஸ்ஸிகங் நவகம்மங் தா³துங், அட்³ட⁴யோகே³ கம்மங் ஓலோகெத்வா ஸத்தட்ட²வஸ்ஸிகங் நவகம்மங் தா³துங், மஹல்லகே விஹாரே பாஸாதே³ வா கம்மங் ஓலோகெத்வா த³ஸத்³வாத³ஸவஸ்ஸிகங் நவகம்மங் தா³து’’ந்தி.
323. Atha kho bhagavā kīṭāgirismiṃ yathābhirantaṃ viharitvā yena āḷavī tena cārikaṃ pakkāmi. Anupubbena cārikaṃ caramāno yena āḷavī tadavasari. Tatra sudaṃ bhagavā āḷaviyaṃ viharati aggāḷave cetiye. Tena kho pana samayena āḷavakā 2 bhikkhū evarūpāni navakammāni denti – piṇḍanikkhepanamattenapi navakammaṃ denti; kuṭṭalepanamattenapi navakammaṃ denti; dvāraṭṭhapanamattenapi navakammaṃ denti; aggaḷavaṭṭikaraṇamattenapi navakammaṃ denti; ālokasandhikaraṇamattenapi navakammaṃ denti; setavaṇṇakaraṇamattenapi navakammaṃ denti; kāḷavaṇṇakaraṇamattenapi navakammaṃ denti; gerukaparikammakaraṇamattenapi navakammaṃ denti; chādanamattenapi navakammaṃ denti; bandhanamattenapi navakammaṃ denti; bhaṇḍikāṭṭhapanamattenapi navakammaṃ denti; khaṇḍaphullapaṭisaṅkharaṇamattenapi navakammaṃ denti; paribhaṇḍakaraṇamattenapi navakammaṃ denti; vīsativassikampi navakammaṃ denti; tiṃsavassikampi navakammaṃ denti; yāvajīvikampi navakammaṃ denti; dhūmakālikampi pariyositaṃ vihāraṃ navakammaṃ denti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āḷavakā bhikkhū evarūpāni navakammāni dassanti – piṇḍanikkhepanamattenapi navakammaṃ dassanti; kuṭṭalepanamattenapi… dvāraṭṭhapanamattenapi … aggaḷavaṭṭikaraṇamattenapi… ālokasandhikaraṇamattenapi… setavaṇṇakaraṇamattenapi… kāḷavaṇṇakaraṇamattenapi… gerukaparikammakaraṇamattenapi… chādenamattenapi… bandhanamattenapi… bhaṇḍikāḷapanamattenapi… khaṇḍaphullapaṭisaṅkharaṇamattenapi… paribhaṇḍakaraṇamattenapi… visativassikampi… tiṃsavassikampi… yāvajīvikampi… dhūmakālikampi pariyositaṃ vihāraṃ navakammaṃ dassantī’’ti! Bhagavato etamatthaṃ ārocesuṃ…pe… saccaṃ kira, bhikkhave…pe… ‘‘saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, piṇḍanikkhepanamattena navakammaṃ dātabbaṃ; na kuṭṭalepanamattena navakammaṃ dātabbaṃ. Na dvāraṭṭhapanamattena navakammaṃ dātabbaṃ. Na aggaḷavaṭṭikaraṇamattena navakammaṃ dātabbaṃ. Na ālokasandhikaraṇamattena navakammaṃ dātabbaṃ. Na setavaṇṇakaraṇamattena navakammaṃ dātabbaṃ. Na kāḷavaṇṇakaraṇamattena navakammaṃ dātabbaṃ. Na gerukaparikammakaraṇamattena navakammaṃ dātabbaṃ. Na chādenamattena navakammaṃ dātabbaṃ. Na bandhanamattena navakammaṃ dātabbaṃ. Na bhaṇḍikāḷapanamattena navakammaṃ dātabbaṃ. Na khaṇḍaphullapaṭisaṅkharaṇamattena navakammaṃ dātabbaṃ. Na paribhaṇḍakaraṇamattena navakammaṃ dātabbaṃ. Na visativassikaṃ navakammaṃ dātabbaṃ. Na tiṃsavassikaṃ navakammaṃ dātabbaṃ. Na yāvajīvikaṃ navakammaṃ dātabbaṃ. Na dhūmakālikampi pariyositaṃ vihāraṃ navakammaṃ dātabbaṃ. Yo dadeyya, āpatti dukkaṭassa. Anujānāmi, bhikkhave, akataṃ vā vippakataṃ vā navakammaṃ dātuṃ, khuddake vihāre kammaṃ oloketvā chappañcavassikaṃ navakammaṃ dātuṃ, aḍḍhayoge kammaṃ oloketvā sattaṭṭhavassikaṃ navakammaṃ dātuṃ, mahallake vihāre pāsāde vā kammaṃ oloketvā dasadvādasavassikaṃ navakammaṃ dātu’’nti.
தேன கோ² பன ஸமயேன பி⁴க்கூ² ஸப்³பே³ விஹாரே நவகம்மங் தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸப்³பே³ விஹாரே நவகம்மங் தா³தப்³ப³ங். யோ த³தெ³ய்ய, ஆபத்தி து³க்கடஸ்ஸா’’தி.
Tena kho pana samayena bhikkhū sabbe vihāre navakammaṃ denti. Bhagavato etamatthaṃ ārocesuṃ. ‘‘Na, bhikkhave, sabbe vihāre navakammaṃ dātabbaṃ. Yo dadeyya, āpatti dukkaṭassā’’ti.
தேன கோ² பன ஸமயேன பி⁴க்கூ² ஏகஸ்ஸ த்³வே தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஏகஸ்ஸ த்³வே தா³தப்³பா³. யோ த³தெ³ய்ய, ஆபத்தி து³க்கடஸ்ஸா’’தி.
Tena kho pana samayena bhikkhū ekassa dve denti. Bhagavato etamatthaṃ ārocesuṃ. ‘‘Na, bhikkhave, ekassa dve dātabbā. Yo dadeyya, āpatti dukkaṭassā’’ti.
தேன கோ² பன ஸமயேன பி⁴க்கூ² நவகம்மங் க³ஹெத்வா அஞ்ஞங் வாஸெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நவகம்மங் க³ஹெத்வா அஞ்ஞோ வாஸேதப்³போ³. யோ வாஸெய்ய, ஆபத்தி து³க்கடஸ்ஸா’’தி.
Tena kho pana samayena bhikkhū navakammaṃ gahetvā aññaṃ vāsenti. Bhagavato etamatthaṃ ārocesuṃ. ‘‘Na, bhikkhave, navakammaṃ gahetvā añño vāsetabbo. Yo vāseyya, āpatti dukkaṭassā’’ti.
தேன கோ² பன ஸமயேன பி⁴க்கூ² நவகம்மங் க³ஹெத்வா ஸங்கி⁴கங் படிபா³ஹெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நவகம்மங் க³ஹெத்வா ஸங்கி⁴கங் படிபா³ஹிதப்³ப³ங். யோ படிபா³ஹெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஏகங் வரஸெய்யங் க³ஹேது’’ந்தி.
Tena kho pana samayena bhikkhū navakammaṃ gahetvā saṅghikaṃ paṭibāhenti. Bhagavato etamatthaṃ ārocesuṃ. ‘‘Na, bhikkhave, navakammaṃ gahetvā saṅghikaṃ paṭibāhitabbaṃ. Yo paṭibāheyya, āpatti dukkaṭassa. Anujānāmi, bhikkhave, ekaṃ varaseyyaṃ gahetu’’nti.
தேன கோ² பன ஸமயேன பி⁴க்கூ² நிஸ்ஸீமே டி²தஸ்ஸ நவகம்மங் தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நிஸ்ஸீமே டி²தஸ்ஸ நவகம்மங் தா³தப்³ப³ங். யோ த³தெ³ய்ய, ஆபத்தி து³க்கடஸ்ஸா’’தி.
Tena kho pana samayena bhikkhū nissīme ṭhitassa navakammaṃ denti. Bhagavato etamatthaṃ ārocesuṃ. ‘‘Na, bhikkhave, nissīme ṭhitassa navakammaṃ dātabbaṃ. Yo dadeyya, āpatti dukkaṭassā’’ti.
தேன கோ² பன ஸமயேன பி⁴க்கூ² நவகம்மங் க³ஹெத்வா ஸப்³ப³காலங் படிபா³ஹந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நவகம்மங் க³ஹெத்வா ஸப்³ப³காலங் படிபா³ஹிதப்³ப³ங். யோ படிபா³ஹெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வஸ்ஸானங் தேமாஸங் படிபா³ஹிதுங், உதுகாலங் பன ந படிபா³ஹிது’’ந்தி.
Tena kho pana samayena bhikkhū navakammaṃ gahetvā sabbakālaṃ paṭibāhanti. Bhagavato etamatthaṃ ārocesuṃ. ‘‘Na, bhikkhave, navakammaṃ gahetvā sabbakālaṃ paṭibāhitabbaṃ. Yo paṭibāheyya, āpatti dukkaṭassa. Anujānāmi, bhikkhave, vassānaṃ temāsaṃ paṭibāhituṃ, utukālaṃ pana na paṭibāhitu’’nti.
தேன கோ² பன ஸமயேன பி⁴க்கூ² நவகம்மங் க³ஹெத்வா பக்கமந்திபி, விப்³ப⁴மந்திபி, காலம்பி கரொந்தி; ஸாமணேராபி படிஜானந்தி; ஸிக்க²ங் பச்சக்கா²தகாபி படிஜானந்தி; அந்திமவத்து²ங் அஜ்ஜா²பன்னகாபி படிஜானந்தி; உம்மத்தகாபி படிஜானந்தி; கி²த்தசித்தாபி படிஜானந்தி; வேத³னாட்டாபி படிஜானந்தி; ஆபத்தியா அத³ஸ்ஸனே உக்கி²த்தகாபி படிஜானந்தி; ஆபத்தியா அப்படிகம்மே உக்கி²த்தகாபி படிஜானந்தி; பாபிகாய தி³ட்டி²யா அப்படினிஸ்ஸக்³கே³ உக்கி²த்தகாபி படிஜானந்தி; பண்ட³காபி படிஜானந்தி; தெ²ய்யஸங்வாஸகாபி படிஜானந்தி; தித்தி²யபக்கந்தகாபி
Tena kho pana samayena bhikkhū navakammaṃ gahetvā pakkamantipi, vibbhamantipi, kālampi karonti; sāmaṇerāpi paṭijānanti; sikkhaṃ paccakkhātakāpi paṭijānanti; antimavatthuṃ ajjhāpannakāpi paṭijānanti; ummattakāpi paṭijānanti; khittacittāpi paṭijānanti; vedanāṭṭāpi paṭijānanti; āpattiyā adassane ukkhittakāpi paṭijānanti; āpattiyā appaṭikamme ukkhittakāpi paṭijānanti; pāpikāya diṭṭhiyā appaṭinissagge ukkhittakāpi paṭijānanti; paṇḍakāpi paṭijānanti; theyyasaṃvāsakāpi paṭijānanti; titthiyapakkantakāpi
படிஜானந்தி; திரச்சா²னக³தாபி படிஜானந்தி; மாதுகா⁴தகாபி படிஜானந்தி; பிதுகா⁴தகாபி படிஜானந்தி ; அரஹந்தகா⁴தகாபி படிஜானந்தி; பி⁴க்கு²னிதூ³ஸகாபி படிஜானந்தி; ஸங்க⁴பே⁴த³காபி படிஜானந்தி; லோஹிதுப்பாத³காபி படிஜானந்தி; உப⁴தொப்³யஞ்ஜனகாபி படிஜானந்தி. ப⁴க³வதோ ஏதமத்த²ங் ஆரோசேஸுங்.
Paṭijānanti; tiracchānagatāpi paṭijānanti; mātughātakāpi paṭijānanti; pitughātakāpi paṭijānanti ; arahantaghātakāpi paṭijānanti; bhikkhunidūsakāpi paṭijānanti; saṅghabhedakāpi paṭijānanti; lohituppādakāpi paṭijānanti; ubhatobyañjanakāpi paṭijānanti. Bhagavato etamatthaṃ ārocesuṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா பக்கமதி – மா ஸங்க⁴ஸ்ஸ ஹாயீதி அஞ்ஞஸ்ஸ தா³தப்³ப³ங்.
‘‘Idha pana, bhikkhave, bhikkhu navakammaṃ gahetvā pakkamati – mā saṅghassa hāyīti aññassa dātabbaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா விப்³ப⁴மதி…பே॰… காலங்கரோதி, ஸாமணேரோ படிஜானாதி, ஸிக்க²ங் பச்சக்கா²தகோ படிஜானாதி, அந்திமவத்து²ங் அஜ்ஜா²பன்னகோ படிஜானாதி, உம்மத்தகோ படிஜானாதி, கி²த்தசித்தோ படிஜானாதி, வேத³னாட்டோ படிஜானாதி, ஆபத்தியா அத³ஸ்ஸனே உக்கி²த்தகோ படிஜானாதி, ஆபத்தியா அப்படிகம்மே உக்கி²த்தகோ படிஜானாதி, பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி, பண்ட³கோ படிஜானாதி, தெ²ய்யஸங்வாஸகோ படிஜானாதி, தித்தி²யபக்கந்தகோ படிஜானாதி, திரச்சா²னக³தோ படிஜானாதி, மாதுகா⁴தகோ படிஜானாதி, பிதுகா⁴தகோ படிஜானாதி, அரஹந்தகா⁴தகோ படிஜானாதி, பி⁴க்கு²னீதூ³ஸகோ படிஜானாதி, ஸங்க⁴பே⁴த³கோ படிஜானாதி, லோஹிதுப்பாத³கோ படிஜானாதி, உப⁴தொப்³யஞ்ஜனகோ படிஜானாதி – மா ஸங்க⁴ஸ்ஸ ஹாயீதி அஞ்ஞஸ்ஸ தா³தப்³ப³ங்.
‘‘Idha pana, bhikkhave, bhikkhu navakammaṃ gahetvā vibbhamati…pe… kālaṅkaroti, sāmaṇero paṭijānāti, sikkhaṃ paccakkhātako paṭijānāti, antimavatthuṃ ajjhāpannako paṭijānāti, ummattako paṭijānāti, khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunīdūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti – mā saṅghassa hāyīti aññassa dātabbaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா விப்பகதே பக்கமதி – மா ஸங்க⁴ஸ்ஸ ஹாயீதி அஞ்ஞஸ்ஸ தா³தப்³ப³ங்.
‘‘Idha pana, bhikkhave, bhikkhu navakammaṃ gahetvā vippakate pakkamati – mā saṅghassa hāyīti aññassa dātabbaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா விப்பகதே விப்³ப⁴மதி…பே॰… உப⁴தொப்³யஞ்ஜனகோ படிஜானாதி – மா ஸங்க⁴ஸ்ஸ ஹாயீதி அஞ்ஞஸ்ஸ தா³தப்³ப³ங்.
‘‘Idha pana, bhikkhave, bhikkhu navakammaṃ gahetvā vippakate vibbhamati…pe… ubhatobyañjanako paṭijānāti – mā saṅghassa hāyīti aññassa dātabbaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா பரியோஸிதே பக்கமதி – தஸ்ஸேவேதங்.
‘‘Idha pana, bhikkhave, bhikkhu navakammaṃ gahetvā pariyosite pakkamati – tassevetaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா பரியோஸிதே விப்³ப⁴மதி…பே॰… காலங்கரோதி, ஸாமணேரோ படிஜானாதி, ஸிக்க²ங் பச்சக்கா²தகோ படிஜானாதி, அந்திமவத்து²ங் அஜ்ஜா²பன்னகோ படிஜானாதி – ஸங்கோ⁴ ஸாமீ.
‘‘Idha pana, bhikkhave, bhikkhu navakammaṃ gahetvā pariyosite vibbhamati…pe… kālaṅkaroti, sāmaṇero paṭijānāti, sikkhaṃ paccakkhātako paṭijānāti, antimavatthuṃ ajjhāpannako paṭijānāti – saṅgho sāmī.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா பரியோஸிதே உம்மத்தகோ படிஜானாதி, கி²த்தசித்தோ படிஜானாதி, வேத³னாட்டோ படிஜானாதி, ஆபத்தியா அத³ஸ்ஸனே உக்கி²த்தகோ படிஜானாதி, ஆபத்தியா அப்படிகம்மே உக்கி²த்தகோ படிஜானாதி, பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி – தஸ்ஸேவேதங்.
‘‘Idha pana, bhikkhave, bhikkhu navakammaṃ gahetvā pariyosite ummattako paṭijānāti, khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti – tassevetaṃ.
‘‘இத⁴ பன, பி⁴க்க²வே, பி⁴க்கு² நவகம்மங் க³ஹெத்வா பரியோஸிதே பண்ட³கோ படிஜானாதி, தெ²ய்யஸங்வாஸகோ படிஜானாதி, தித்தி²யபக்கந்தகோ படிஜானாதி, திரச்சா²னக³தோ படிஜானாதி, மாதுகா⁴தகோ படிஜானாதி, பிதுகா⁴தகோ படிஜானாதி, அரஹந்தகா⁴தகோ படிஜானாதி, பி⁴க்கு²னீதூ³ஸகோ படிஜானாதி, ஸங்க⁴பே⁴த³கோ படிஜானாதி, லோஹிதுப்பாத³கோ படிஜானாதி, உப⁴தொப்³யஞ்ஜனகோ படிஜானாதி – ஸங்கோ⁴ ஸாமீ’’தி.
‘‘Idha pana, bhikkhave, bhikkhu navakammaṃ gahetvā pariyosite paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunīdūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti – saṅgho sāmī’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / நவகம்மதா³னகதா² • Navakammadānakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நவகம்மதா³னகதா²வண்ணனா • Navakammadānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நவகம்மதா³னகதா²வண்ணனா • Navakammadānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நவகம்மதா³னகதா²வண்ணனா • Navakammadānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / நவகம்மதா³னகதா² • Navakammadānakathā
