| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
নৰকম্মদানকথাৰণ্ণনা
Navakammadānakathāvaṇṇanā
৩২৩. পাল়িযং পিণ্ডনিক্খেপনমত্তেনাতিআদীসু খণ্ডফুল্লট্ঠানে মত্তিকাপিণ্ডট্ঠপনং পিণ্ডনিক্খেপনং নাম। নৰকম্মন্তি নৰকম্মসম্মুতি। অগ্গল়ৰট্টি নাম কৰাটবন্ধো। ছাদনং নাম তিণাদীহি গেহচ্ছাদনং। বন্ধনং নাম দণ্ডৰল্লিআদীহি ছদনবন্ধনমেৰ। চতুহত্থৰিহারেতি ৰিত্থারপ্পমাণতো ৰুত্তং। উব্বেধতো পন অনেকভূমকত্তা ৰড্ঢকীহত্থেন ৰীসতিহত্থোপি নানাসণ্ঠানৰিচিত্তোপি হোতি। তেনস্স চতুৰস্সিকং নৰকম্মং ৰুত্তং। এৰং সেসেসুপি।
323. Pāḷiyaṃ piṇḍanikkhepanamattenātiādīsu khaṇḍaphullaṭṭhāne mattikāpiṇḍaṭṭhapanaṃ piṇḍanikkhepanaṃ nāma. Navakammanti navakammasammuti. Aggaḷavaṭṭi nāma kavāṭabandho. Chādanaṃ nāma tiṇādīhi gehacchādanaṃ. Bandhanaṃ nāma daṇḍavalliādīhi chadanabandhanameva. Catuhatthavihāreti vitthārappamāṇato vuttaṃ. Ubbedhato pana anekabhūmakattā vaḍḍhakīhatthena vīsatihatthopi nānāsaṇṭhānavicittopi hoti. Tenassa catuvassikaṃ navakammaṃ vuttaṃ. Evaṃ sesesupi.
পাল়িযং সব্বে ৰিহারেতি ভুম্মত্থে উপযোগবহুৰচনং। একস্স সব্বেসু ৰিহারেসু নৰকম্মং দেতীতি অত্থো। সব্বকালং পটিবাহন্তীতি নৰকম্মিকা অত্তনো গাহিতং ৰরসেয্যং সম্পত্তানং যথাৰুড্ঢং অকত্ৰা উতুকালেপি পটিবাহন্তি।
Pāḷiyaṃ sabbe vihāreti bhummatthe upayogabahuvacanaṃ. Ekassa sabbesu vihāresu navakammaṃ detīti attho. Sabbakālaṃ paṭibāhantīti navakammikā attano gāhitaṃ varaseyyaṃ sampattānaṃ yathāvuḍḍhaṃ akatvā utukālepi paṭibāhanti.
‘‘সচে সো আৰাসো জীরতী’’তিআদি পাল়িমুত্তকৰিনিচ্ছযো। মঞ্চট্ঠানং দত্ৰাতি মঞ্চট্ঠানং পুগ্গলিকং দত্ৰা। তিভাগন্তি ততিযভাগং। এৰং ৰিস্সজ্জনম্পি থাৰরেন থাৰরপরিৰত্তনট্ঠানে এৰ পৰিসতি, ন ইতরথা সব্বসেনাসনানং ৰিনস্সনতো। সচে সদ্ধিৰিহারিকানং দাতুকামো হোতীতি সচে সো সঙ্ঘস্স ভণ্ডকট্ঠপনট্ঠানং ৰা অঞ্ঞেসং ভিক্খূনং ৰসনট্ঠানং ৰা দাতুং ন ইচ্ছতি, অত্তনো সদ্ধিৰিহারিকানঞ্ঞেৰ দাতুকামো হোতি, তাদিসস্স তুয্হং পুগ্গলিকমেৰ কত্ৰা জগ্গাতি ন সব্বং তস্স দাতব্বন্তি অধিপ্পাযো। তত্থ পন কত্তব্বৰিধিং দস্সেন্তো আহ ‘‘কম্ম’’ন্তিআদি। এৰঞ্হীতিআদিম্হি ৰযানুরূপং ততিযভাগে ৰা উপড্ঢভাগে ৰা গহিতে তং ভাগং দাতুং লভতীতি অত্থো।
‘‘Sace so āvāso jīratī’’tiādi pāḷimuttakavinicchayo. Mañcaṭṭhānaṃ datvāti mañcaṭṭhānaṃ puggalikaṃ datvā. Tibhāganti tatiyabhāgaṃ. Evaṃ vissajjanampi thāvarena thāvaraparivattanaṭṭhāne eva pavisati, na itarathā sabbasenāsanānaṃ vinassanato. Sace saddhivihārikānaṃ dātukāmo hotīti sace so saṅghassa bhaṇḍakaṭṭhapanaṭṭhānaṃ vā aññesaṃ bhikkhūnaṃ vasanaṭṭhānaṃ vā dātuṃ na icchati, attano saddhivihārikānaññeva dātukāmo hoti, tādisassa tuyhaṃ puggalikameva katvā jaggāti na sabbaṃ tassa dātabbanti adhippāyo. Tattha pana kattabbavidhiṃ dassento āha ‘‘kamma’’ntiādi. Evañhītiādimhi vayānurūpaṃ tatiyabhāge vā upaḍḍhabhāge vā gahite taṃ bhāgaṃ dātuṃ labhatīti attho.
যেনাতি তেসু দ্ৰীসু ভিক্খূসু যেন। সো সামীতি তস্সা ভূমিযা ৰিহারকরণে সোৰ সামী, তং পটিবাহিত্ৰা ইতরেন ন কাতব্বন্তি অধিপ্পাযো। সো হি পঠমং গহিতো। অকতট্ঠানেতি চযাদীনং অকতপুব্বট্ঠানে। চযং ৰা পমুখং ৰাতি সঙ্ঘিকসেনাসনং নিস্সায ততো বহি চযং বন্ধিত্ৰা, একং সেনাসনং ৰা। বহিকুট্টেতি কুট্টতো বহি, অত্তনো কতট্ঠানেতি অত্থো।
Yenāti tesu dvīsu bhikkhūsu yena. So sāmīti tassā bhūmiyā vihārakaraṇe sova sāmī, taṃ paṭibāhitvā itarena na kātabbanti adhippāyo. So hi paṭhamaṃ gahito. Akataṭṭhāneti cayādīnaṃ akatapubbaṭṭhāne. Cayaṃ vā pamukhaṃ vāti saṅghikasenāsanaṃ nissāya tato bahi cayaṃ bandhitvā, ekaṃ senāsanaṃ vā. Bahikuṭṭeti kuṭṭato bahi, attano kataṭṭhāneti attho.
নৰকম্মদানকথাৰণ্ণনা নিট্ঠিতা।
Navakammadānakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / নৰকম্মদানকথা • Navakammadānakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / নৰকম্মদানকথা • Navakammadānakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / নৰকম্মদানকথাৰণ্ণনা • Navakammadānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / নৰকম্মদানকথাৰণ্ণনা • Navakammadānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / নৰকম্মদানকথা • Navakammadānakathā
