| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
නවකම්‌මදානකථාවණ්‌ණනා
Navakammadānakathāvaṇṇanā
323. පාළියං පිණ්‌ඩනික්‌ඛෙපනමත්‌තෙනාතිආදීසු ඛණ්‌ඩඵුල්‌ලට්‌ඨානෙ මත්‌තිකාපිණ්‌ඩට්‌ඨපනං පිණ්‌ඩනික්‌ඛෙපනං නාම. නවකම්‌මන්‌ති නවකම්‌මසම්‌මුති. අග්‌ගළවට්‌ටි නාම කවාටබන්‌ධො. ඡාදනං නාම තිණාදීහි ගෙහච්‌ඡාදනං. බන්‌ධනං නාම දණ්‌ඩවල්‌ලිආදීහි ඡදනබන්‌ධනමෙව. චතුහත්‌ථවිහාරෙති විත්‌ථාරප්‌පමාණතො වුත්‌තං. උබ්‌බෙධතො පන අනෙකභූමකත්‌තා වඩ්‌ඪකීහත්‌ථෙන වීසතිහත්‌ථොපි නානාසණ්‌ඨානවිචිත්‌තොපි හොති. තෙනස්‌ස චතුවස්‌සිකං නවකම්‌මං වුත්‌තං. එවං සෙසෙසුපි.
323. Pāḷiyaṃ piṇḍanikkhepanamattenātiādīsu khaṇḍaphullaṭṭhāne mattikāpiṇḍaṭṭhapanaṃ piṇḍanikkhepanaṃ nāma. Navakammanti navakammasammuti. Aggaḷavaṭṭi nāma kavāṭabandho. Chādanaṃ nāma tiṇādīhi gehacchādanaṃ. Bandhanaṃ nāma daṇḍavalliādīhi chadanabandhanameva. Catuhatthavihāreti vitthārappamāṇato vuttaṃ. Ubbedhato pana anekabhūmakattā vaḍḍhakīhatthena vīsatihatthopi nānāsaṇṭhānavicittopi hoti. Tenassa catuvassikaṃ navakammaṃ vuttaṃ. Evaṃ sesesupi.
පාළියං සබ්‌බෙ විහාරෙති භුම්‌මත්‌ථෙ උපයොගබහුවචනං. එකස්‌ස සබ්‌බෙසු විහාරෙසු නවකම්‌මං දෙතීති අත්‌ථො. සබ්‌බකාලං පටිබාහන්‌තීති නවකම්‌මිකා අත්‌තනො ගාහිතං වරසෙය්‍යං සම්‌පත්‌තානං යථාවුඩ්‌ඪං අකත්‌වා උතුකාලෙපි පටිබාහන්‌ති.
Pāḷiyaṃ sabbe vihāreti bhummatthe upayogabahuvacanaṃ. Ekassa sabbesu vihāresu navakammaṃ detīti attho. Sabbakālaṃ paṭibāhantīti navakammikā attano gāhitaṃ varaseyyaṃ sampattānaṃ yathāvuḍḍhaṃ akatvā utukālepi paṭibāhanti.
‘‘සචෙ සො ආවාසො ජීරතී’’තිආදි පාළිමුත්‌තකවිනිච්‌ඡයො. මඤ්‌චට්‌ඨානං දත්‌වාති මඤ්‌චට්‌ඨානං පුග්‌ගලිකං දත්‌වා. තිභාගන්‌ති තතියභාගං. එවං විස්‌සජ්‌ජනම්‌පි ථාවරෙන ථාවරපරිවත්‌තනට්‌ඨානෙ එව පවිසති, න ඉතරථා සබ්‌බසෙනාසනානං විනස්‌සනතො. සචෙ සද්‌ධිවිහාරිකානං දාතුකාමො හොතීති සචෙ සො සඞ්‌ඝස්‌ස භණ්‌ඩකට්‌ඨපනට්‌ඨානං වා අඤ්‌ඤෙසං භික්‌ඛූනං වසනට්‌ඨානං වා දාතුං න ඉච්‌ඡති, අත්‌තනො සද්‌ධිවිහාරිකානඤ්‌ඤෙව දාතුකාමො හොති, තාදිසස්‌ස තුය්‌හං පුග්‌ගලිකමෙව කත්‌වා ජග්‌ගාති න සබ්‌බං තස්‌ස දාතබ්‌බන්‌ති අධිප්‌පායො. තත්‌ථ පන කත්‌තබ්‌බවිධිං දස්‌සෙන්‌තො ආහ ‘‘කම්‌ම’’න්‌තිආදි. එවඤ්‌හීතිආදිම්‌හි වයානුරූපං තතියභාගෙ වා උපඩ්‌ඪභාගෙ වා ගහිතෙ තං භාගං දාතුං ලභතීති අත්‌ථො.
‘‘Sace so āvāso jīratī’’tiādi pāḷimuttakavinicchayo. Mañcaṭṭhānaṃ datvāti mañcaṭṭhānaṃ puggalikaṃ datvā. Tibhāganti tatiyabhāgaṃ. Evaṃ vissajjanampi thāvarena thāvaraparivattanaṭṭhāne eva pavisati, na itarathā sabbasenāsanānaṃ vinassanato. Sace saddhivihārikānaṃ dātukāmo hotīti sace so saṅghassa bhaṇḍakaṭṭhapanaṭṭhānaṃ vā aññesaṃ bhikkhūnaṃ vasanaṭṭhānaṃ vā dātuṃ na icchati, attano saddhivihārikānaññeva dātukāmo hoti, tādisassa tuyhaṃ puggalikameva katvā jaggāti na sabbaṃ tassa dātabbanti adhippāyo. Tattha pana kattabbavidhiṃ dassento āha ‘‘kamma’’ntiādi. Evañhītiādimhi vayānurūpaṃ tatiyabhāge vā upaḍḍhabhāge vā gahite taṃ bhāgaṃ dātuṃ labhatīti attho.
යෙනාති තෙසු ද්‌වීසු භික්‌ඛූසු යෙන. සො සාමීති තස්‌සා භූමියා විහාරකරණෙ සොව සාමී, තං පටිබාහිත්‌වා ඉතරෙන න කාතබ්‌බන්‌ති අධිප්‌පායො. සො හි පඨමං ගහිතො. අකතට්‌ඨානෙති චයාදීනං අකතපුබ්‌බට්‌ඨානෙ. චයං වා පමුඛං වාති සඞ්‌ඝිකසෙනාසනං නිස්‌සාය තතො බහි චයං බන්‌ධිත්‌වා, එකං සෙනාසනං වා. බහිකුට්‌ටෙති කුට්‌ටතො බහි, අත්‌තනො කතට්‌ඨානෙති අත්‌ථො.
Yenāti tesu dvīsu bhikkhūsu yena. So sāmīti tassā bhūmiyā vihārakaraṇe sova sāmī, taṃ paṭibāhitvā itarena na kātabbanti adhippāyo. So hi paṭhamaṃ gahito. Akataṭṭhāneti cayādīnaṃ akatapubbaṭṭhāne. Cayaṃ vā pamukhaṃ vāti saṅghikasenāsanaṃ nissāya tato bahi cayaṃ bandhitvā, ekaṃ senāsanaṃ vā. Bahikuṭṭeti kuṭṭato bahi, attano kataṭṭhāneti attho.
නවකම්‌මදානකථාවණ්‌ණනා නිට්‌ඨිතා.
Navakammadānakathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / නවකම්‌මදානකථා • Navakammadānakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / නවකම්‌මදානකථා • Navakammadānakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නවකම්‌මදානකථාවණ්‌ණනා • Navakammadānakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නවකම්‌මදානකථාවණ්‌ණනා • Navakammadānakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / නවකම්‌මදානකථා • Navakammadānakathā
