| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
நவகம்மதா³னங்
Navakammadānaṃ
308. அத² கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன வேஸாலீ தேன சாரிகங் பக்காமி. அனுபுப்³பே³ன சாரிகங் சரமானோ யேன வேஸாலீ தத³வஸரி. தத்ர ஸுத³ங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். தேன கோ² பன ஸமயேன மனுஸ்ஸா ஸக்கச்சங் நவகம்மங் கரொந்தி. யேபி பி⁴க்கூ² நவகம்மங் அதி⁴ட்டெ²ந்தி தேபி ஸக்கச்சங் உபட்டெ²ந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன . அத² கோ² அஞ்ஞதரஸ்ஸ த³லித்³த³ஸ்ஸ துன்னவாயஸ்ஸ ஏதத³ஹோஸி – ‘‘ந கோ² இத³ங் ஓரகங் ப⁴விஸ்ஸதி, யத²யிமே மனுஸ்ஸா ஸக்கச்சங் நவகம்மங் கரொந்தி; யங்னூனாஹம்பி நவகம்மங் கரெய்ய’’ந்தி. அத² கோ² ஸோ த³லித்³தோ³ துன்னவாயோ ஸாமங் சிக்க²ல்லங் மத்³தி³த்வா இட்ட²காயோ சினித்வா குட்டங் உட்டா²பேஸி. தேன அகுஸலகேன சிதா வங்கா பி⁴த்தி பரிபதி. து³தியம்பி கோ²…பே॰… ததியம்பி கோ² ஸோ த³லித்³தோ³ துன்னவாயோ ஸாமங் சிக்க²ல்லங் மத்³தி³த்வா இட்ட²காயோ சினித்வா குட்டங் உட்டா²பேஸி. தேன அகுஸலகேன சிதா வங்கா பி⁴த்தி பரிபதி. அத² கோ² ஸோ த³லித்³தோ³ துன்னவாயோ உஜ்ஜா²யதி கி²ய்யதி விபாசேதி – ‘‘யே இமேஸங் ஸமணானங் ஸக்யபுத்தியானங் தெ³ந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங், தே இமே ஓவத³ந்தி அனுஸாஸந்தி, தேஸஞ்ச நவகம்மங் அதி⁴ட்டெ²ந்தி. அஹங் பனம்ஹி த³லித்³தோ³. ந மங் கோசி ஓவத³தி வா அனுஸாஸதி வா நவகம்மங் வா அதி⁴ட்டே²தீ’’தி. அஸ்ஸோஸுங் கோ² பி⁴க்கூ² தஸ்ஸ த³லித்³த³ஸ்ஸ துன்னவாயஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, நவகம்மங் தா³துங். நவகம்மிகோ, பி⁴க்க²வே, பி⁴க்கு² உஸ்ஸுக்கங் ஆபஜ்ஜிஸ்ஸதி – ‘கிந்தி நு கோ² விஹாரோ கி²ப்பங் பரியோஸானங் க³ச்செ²ய்யா’தி; க²ண்ட³ங் பு²ல்லங் படிஸங்க²ரிஸ்ஸதி. ஏவஞ்ச பன, பி⁴க்க²வே, தா³தப்³ப³ங். பட²மங் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
308. Atha kho bhagavā rājagahe yathābhirantaṃ viharitvā yena vesālī tena cārikaṃ pakkāmi. Anupubbena cārikaṃ caramāno yena vesālī tadavasari. Tatra sudaṃ bhagavā vesāliyaṃ viharati mahāvane kūṭāgārasālāyaṃ. Tena kho pana samayena manussā sakkaccaṃ navakammaṃ karonti. Yepi bhikkhū navakammaṃ adhiṭṭhenti tepi sakkaccaṃ upaṭṭhenti cīvarapiṇḍapātasenāsanagilānappaccayabhesajjaparikkhārena . Atha kho aññatarassa daliddassa tunnavāyassa etadahosi – ‘‘na kho idaṃ orakaṃ bhavissati, yathayime manussā sakkaccaṃ navakammaṃ karonti; yaṃnūnāhampi navakammaṃ kareyya’’nti. Atha kho so daliddo tunnavāyo sāmaṃ cikkhallaṃ madditvā iṭṭhakāyo cinitvā kuṭṭaṃ uṭṭhāpesi. Tena akusalakena citā vaṅkā bhitti paripati. Dutiyampi kho…pe… tatiyampi kho so daliddo tunnavāyo sāmaṃ cikkhallaṃ madditvā iṭṭhakāyo cinitvā kuṭṭaṃ uṭṭhāpesi. Tena akusalakena citā vaṅkā bhitti paripati. Atha kho so daliddo tunnavāyo ujjhāyati khiyyati vipāceti – ‘‘ye imesaṃ samaṇānaṃ sakyaputtiyānaṃ denti cīvarapiṇḍapātasenāsanagilānappaccayabhesajjaparikkhāraṃ, te ime ovadanti anusāsanti, tesañca navakammaṃ adhiṭṭhenti. Ahaṃ panamhi daliddo. Na maṃ koci ovadati vā anusāsati vā navakammaṃ vā adhiṭṭhetī’’ti. Assosuṃ kho bhikkhū tassa daliddassa tunnavāyassa ujjhāyantassa khiyyantassa vipācentassa. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, navakammaṃ dātuṃ. Navakammiko, bhikkhave, bhikkhu ussukkaṃ āpajjissati – ‘kinti nu kho vihāro khippaṃ pariyosānaṃ gaccheyyā’ti; khaṇḍaṃ phullaṃ paṭisaṅkharissati. Evañca pana, bhikkhave, dātabbaṃ. Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
309. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ க³ஹபதினோ விஹாரங் இத்த²ன்னாமஸ்ஸ பி⁴க்கு²னோ நவகம்மங் த³தெ³ய்ய. ஏஸா ஞத்தி.
309. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmassa gahapatino vihāraṃ itthannāmassa bhikkhuno navakammaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமஸ்ஸ க³ஹபதினோ விஹாரங் இத்த²ன்னாமஸ்ஸ பி⁴க்கு²னோ நவகம்மங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ க³ஹபதினோ விஹாரங் இத்த²ன்னாமஸ்ஸ பி⁴க்கு²னோ நவகம்மஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmassa gahapatino vihāraṃ itthannāmassa bhikkhuno navakammaṃ deti. Yassāyasmato khamati itthannāmassa gahapatino vihāraṃ itthannāmassa bhikkhuno navakammassa dānaṃ, so tuṇhassa; yassa nakkhamati, so bhāseyya.
‘‘தி³ன்னோ ஸங்கே⁴ன இத்த²ன்னாமஸ்ஸ க³ஹபதினோ விஹாரோ இத்த²ன்னாமஸ்ஸ பி⁴க்கு²னோ நவகம்மங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinno saṅghena itthannāmassa gahapatino vihāro itthannāmassa bhikkhuno navakammaṃ. Khamati saṅghassa, tasmā tuṇhī, evametaṃ dhārayāmī’’ti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / விஹாரானுஜானநகதா² • Vihārānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / விஹாரானுஜானநகதா² • Vihārānujānanakathā
