| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. නවකම්‌මිකසුත්‌තං
7. Navakammikasuttaṃ
203. එකං සමයං භගවා කොසලෙසු විහරති අඤ්‌ඤතරස්‌මිං වනසණ්‌ඩෙ . තෙන ඛො පන සමයෙන නවකම්‌මිකභාරද්‌වාජො බ්‍රාහ්‌මණො තස්‌මිං වනසණ්‌ඩෙ කම්‌මන්‌තං කාරාපෙති. අද්‌දසා ඛො නවකම්‌මිකභාරද්‌වාජො බ්‍රාහ්‌මණො භගවන්‌තං අඤ්‌ඤතරස්‌මිං සාලරුක්‌ඛමූලෙ නිසින්‌නං පල්‌ලඞ්‌කං ආභුජිත්‌වා උජුං කායං පණිධාය පරිමුඛං සතිං උපට්‌ඨපෙත්‌වා. දිස්‌වානස්‌ස එතදහොසි – ‘‘අහං ඛො ඉමස්‌මිං වනසණ්‌ඩෙ කම්‌මන්‌තං කාරාපෙන්‌තො රමාමි. අයං සමණො ගොතමො කිං කාරාපෙන්‌තො රමතී’’ති? අථ ඛො නවකම්‌මිකභාරද්‌වාජො බ්‍රාහ්‌මණො යෙන භගවා තෙනුපසඞ්‌කමි. උපසඞ්‌කමිත්‌වා භගවන්‌තං ගාථාය අජ්‌ඣභාසි –
203. Ekaṃ samayaṃ bhagavā kosalesu viharati aññatarasmiṃ vanasaṇḍe . Tena kho pana samayena navakammikabhāradvājo brāhmaṇo tasmiṃ vanasaṇḍe kammantaṃ kārāpeti. Addasā kho navakammikabhāradvājo brāhmaṇo bhagavantaṃ aññatarasmiṃ sālarukkhamūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvānassa etadahosi – ‘‘ahaṃ kho imasmiṃ vanasaṇḍe kammantaṃ kārāpento ramāmi. Ayaṃ samaṇo gotamo kiṃ kārāpento ramatī’’ti? Atha kho navakammikabhāradvājo brāhmaṇo yena bhagavā tenupasaṅkami. Upasaṅkamitvā bhagavantaṃ gāthāya ajjhabhāsi –
‘‘කෙ නු කම්‌මන්‌තා කරීයන්‌ති, භික්‌ඛු සාලවනෙ තව;
‘‘Ke nu kammantā karīyanti, bhikkhu sālavane tava;
යදෙකකො අරඤ්‌ඤස්‌මිං, රතිං වින්‌දති ගොතමො’’ති.
Yadekako araññasmiṃ, ratiṃ vindati gotamo’’ti.
‘‘න මෙ වනස්‌මිං කරණීයමත්‌ථි,
‘‘Na me vanasmiṃ karaṇīyamatthi,
උච්‌ඡින්‌නමූලං මෙ වනං විසූකං;
Ucchinnamūlaṃ me vanaṃ visūkaṃ;
ස්‌වාහං වනෙ නිබ්‌බනථො විසල්‌ලො,
Svāhaṃ vane nibbanatho visallo,
එකො රමෙ අරතිං විප්‌පහායා’’ති.
Eko rame aratiṃ vippahāyā’’ti.
එවං වුත්‌තෙ, නවකම්‌මිකභාරද්‌වාජො බ්‍රාහ්‌මණො භගවන්‌තං එතදවොච – ‘‘අභික්‌කන්‌තං, භො ගොතම…පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති.
Evaṃ vutte, navakammikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. නවකම්‌මිකසුත්‌තවණ්‌ණනා • 7. Navakammikasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. වනකම්‌මිකසුත්‌තවණ්‌ණනා • 7. Vanakammikasuttavaṇṇanā
