| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(9.) நவகனித்³தே³ஸவண்ணனா
(9.) Navakaniddesavaṇṇanā
960. நவகனித்³தே³ஸே நவ ஆகா⁴தவத்தூ²னீதி ஸத்தேஸு உப்பத்திவஸேனேவ கதி²தானி. புரிஸானங் மலானீதி புரிஸமலானி. நவவிதா⁴தி நவகொட்டா²ஸா நவப்பபே⁴தா³ வா.
960. Navakaniddese nava āghātavatthūnīti sattesu uppattivaseneva kathitāni. Purisānaṃ malānīti purisamalāni. Navavidhāti navakoṭṭhāsā navappabhedā vā.
963. தண்ஹங் படிச்சாதி தண்ஹங் நிஸ்ஸாய. பரியேஸனாதி ரூபாதி³ஆரம்மணபரியேஸனா. ஸா ஹி தண்ஹாய ஸதி ஹோதி. லாபோ⁴தி ரூபாதி³ஆரம்மணபடிலாபோ⁴. ஸோ ஹி பரியேஸனாய ஸதி ஹோதி. வினிச்ச²யோ பன ஞாணதண்ஹாதி³ட்டி²விதக்கவஸேன சதுப்³பி³தோ⁴. தத்த² ‘‘ஸுக²வினிச்ச²யங் ஜஞ்ஞா, ஸுக²வினிச்ச²யங் ஞத்வா அஜ்ஜ²த்தங் ஸுக²மனுயுஞ்ஜெய்யா’’தி (ம॰ நி॰ 3.323) அயங் ஞாணவினிச்ச²யோ. ‘‘வினிச்ச²யோதி த்³வே வினிச்ச²யா – தண்ஹாவினிச்ச²யோ ச தி³ட்டி²வினிச்ச²யோ சா’’தி (மஹானி॰ 102) ஏவங் ஆக³தானி அட்ட²ஸததண்ஹாவிசரிதானி தண்ஹாவினிச்ச²யோ. த்³வாஸட்டி² தி³ட்டி²யோ தி³ட்டி²வினிச்ச²யோ. ‘‘ச²ந்தோ³ கோ², தே³வானமிந்த³, விதக்கனிதா³னோ’’தி (தீ³॰ நி॰ 2.358) இமஸ்மிங் பன ஸுத்தே இத⁴ வினிச்ச²யோதி வுத்தோ விதக்கோயேவ ஆக³தோ. லாப⁴ங் லபி⁴த்வா ஹி இட்டா²னிட்ட²ங் ஸுந்த³ராஸுந்த³ரஞ்ச விதக்கேனேவ வினிச்சி²னாதி – ‘எத்தகங் மே ரூபாரம்மணத்தா²ய ப⁴விஸ்ஸதி , எத்தகங் ஸத்³தா³தி³ஆரம்மணத்தா²ய , எத்தகங் மய்ஹங் ப⁴விஸ்ஸதி, எத்தகங் பரஸ்ஸ, எத்தகங் பரிபு⁴ஞ்ஜிஸ்ஸாமி, எத்தகங் நித³ஹிஸ்ஸாமீ’தி. தேன வுத்தங் ‘‘லாப⁴ங் படிச்ச வினிச்ச²யோ’’தி.
963. Taṇhaṃ paṭiccāti taṇhaṃ nissāya. Pariyesanāti rūpādiārammaṇapariyesanā. Sā hi taṇhāya sati hoti. Lābhoti rūpādiārammaṇapaṭilābho. So hi pariyesanāya sati hoti. Vinicchayo pana ñāṇataṇhādiṭṭhivitakkavasena catubbidho. Tattha ‘‘sukhavinicchayaṃ jaññā, sukhavinicchayaṃ ñatvā ajjhattaṃ sukhamanuyuñjeyyā’’ti (ma. ni. 3.323) ayaṃ ñāṇavinicchayo. ‘‘Vinicchayoti dve vinicchayā – taṇhāvinicchayo ca diṭṭhivinicchayo cā’’ti (mahāni. 102) evaṃ āgatāni aṭṭhasatataṇhāvicaritāni taṇhāvinicchayo. Dvāsaṭṭhi diṭṭhiyo diṭṭhivinicchayo. ‘‘Chando kho, devānaminda, vitakkanidāno’’ti (dī. ni. 2.358) imasmiṃ pana sutte idha vinicchayoti vutto vitakkoyeva āgato. Lābhaṃ labhitvā hi iṭṭhāniṭṭhaṃ sundarāsundarañca vitakkeneva vinicchināti – ‘ettakaṃ me rūpārammaṇatthāya bhavissati , ettakaṃ saddādiārammaṇatthāya , ettakaṃ mayhaṃ bhavissati, ettakaṃ parassa, ettakaṃ paribhuñjissāmi, ettakaṃ nidahissāmī’ti. Tena vuttaṃ ‘‘lābhaṃ paṭicca vinicchayo’’ti.
ச²ந்த³ராகோ³தி ஏவங் அகுஸலவிதக்கேன விதக்கிதே வத்து²ஸ்மிங் து³ப்³ப³லராகோ³ ச ப³லவராகோ³ ச உப்பஜ்ஜதி. இத³ஞ்ஹி இத⁴ ச²ந்தோ³தி து³ப்³ப³லராக³ஸ்ஸாதி⁴வசனங் . அஜ்ஜோ²ஸானந்தி அஹங் மமந்தி ப³லவஸன்னிட்டா²னங். பரிக்³க³ஹோதி தண்ஹாதி³ட்டி²வஸேன பரிக்³க³ஹகரணங். மச்ச²ரியந்தி பரேஹி ஸாதா⁴ரணபா⁴வஸ்ஸ அஸஹனதா. தேனேவஸ்ஸ போராணா ஏவங் வசனத்த²ங் வத³ந்தி – ‘‘இத³ங் அச்ச²ரியங் மய்ஹமேவ ஹோது, மா அஞ்ஞஸ்ஸ அச்ச²ரியங் ஹோதூதி பவத்தத்தா மச்ச²ரியந்தி வுச்சதீ’’தி. ஆரக்கோ²தி த்³வாரபித³ஹனமஞ்ஜுஸகோ³பனாதி³வஸேன ஸுட்டு² ரக்க²ணங். அதி⁴கரோதீதி அதி⁴கரணங்; காரணஸ்ஸேதங் நாமங். ஆரக்கா²தி⁴கரணந்தி பா⁴வனபுங்ஸகங்; ஆரக்க²ஹேதூதி அத்தோ². த³ண்டா³தா³னாதீ³ஸு பரனிஸேத⁴னத்த²ங் த³ண்ட³ஸ்ஸ ஆதா³னங் த³ண்டா³தா³னங். ஏகதோதா⁴ராதி³னோ ஸத்த²ஸ்ஸ ஆதா³னங் ஸத்தா²தா³னங். கலஹோதி காயகலஹோபி வாசாகலஹோபி. புரிமோ புரிமோ விரோதோ⁴ விக்³க³ஹோ, பச்சி²மோ பச்சி²மோ விவாதோ³. துவங் துவந்தி அகா³ரவவசனங், த்வங் த்வந்தி அத்தோ².
Chandarāgoti evaṃ akusalavitakkena vitakkite vatthusmiṃ dubbalarāgo ca balavarāgo ca uppajjati. Idañhi idha chandoti dubbalarāgassādhivacanaṃ . Ajjhosānanti ahaṃ mamanti balavasanniṭṭhānaṃ. Pariggahoti taṇhādiṭṭhivasena pariggahakaraṇaṃ. Macchariyanti parehi sādhāraṇabhāvassa asahanatā. Tenevassa porāṇā evaṃ vacanatthaṃ vadanti – ‘‘idaṃ acchariyaṃ mayhameva hotu, mā aññassa acchariyaṃ hotūti pavattattā macchariyanti vuccatī’’ti. Ārakkhoti dvārapidahanamañjusagopanādivasena suṭṭhu rakkhaṇaṃ. Adhikarotīti adhikaraṇaṃ; kāraṇassetaṃ nāmaṃ. Ārakkhādhikaraṇanti bhāvanapuṃsakaṃ; ārakkhahetūti attho. Daṇḍādānādīsu paranisedhanatthaṃ daṇḍassa ādānaṃ daṇḍādānaṃ. Ekatodhārādino satthassa ādānaṃ satthādānaṃ. Kalahoti kāyakalahopi vācākalahopi. Purimo purimo virodho viggaho, pacchimo pacchimo vivādo. Tuvaṃ tuvanti agāravavacanaṃ, tvaṃ tvanti attho.
964. இஞ்ஜிதானீதி இஞ்ஜனானி சலனானி. அஸ்மீதி இஞ்ஜிதமேதந்திஆதீ³ஹி ஸப்³ப³பதே³ஹி மானோவ கதி²தோ. அஹந்தி பவத்தோபி ஹி மானோ இஞ்ஜிதமேவ, அயமஹந்தி பவத்தோபி, நேவஸஞ்ஞீனாஸஞ்ஞீ ப⁴விஸ்ஸந்தி பவத்தோபி. ஸேஸனவகேஹிபி மானோவ கதி²தோ. மானோ ஹி இஞ்ஜனதோ இஞ்ஜிதங், மஞ்ஞனதோ மஞ்ஞிதங், ப²ந்த³னதோ ப²ந்தி³தங், பபஞ்சனதோ பபஞ்சிதங். தேஹி தேஹி காரணேஹி ஸங்க²தத்தா ஸங்க²தந்தி ச வுச்சதி. ஸேஸங் ஸப்³ப³த்த² உத்தானத்த²மேவாதி.
964. Iñjitānīti iñjanāni calanāni. Asmīti iñjitametantiādīhi sabbapadehi mānova kathito. Ahanti pavattopi hi māno iñjitameva, ayamahanti pavattopi, nevasaññīnāsaññī bhavissanti pavattopi. Sesanavakehipi mānova kathito. Māno hi iñjanato iñjitaṃ, maññanato maññitaṃ, phandanato phanditaṃ, papañcanato papañcitaṃ. Tehi tehi kāraṇehi saṅkhatattā saṅkhatanti ca vuccati. Sesaṃ sabbattha uttānatthamevāti.
நவகனித்³தே³ஸவண்ணனா.
Navakaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
