| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
නවකවාරවණ්‌ණනා
Navakavāravaṇṇanā
329. නවකෙසු – නව ආඝාතවත්‌ථූනීති ‘‘අනත්‌ථං මෙ අචරී’’තිආදීනි නව. නව ආඝාතපටිවිනයාති ‘‘අනත්‌ථං මෙ අචරි, තං කුතෙත්‌ථ ලබ්‌භාති ආඝාතං පටිවිනෙතී’’තිආදීනි නව. නව විනීතවත්‌ථූනීති නවහි ආඝාතවත්‌ථූහි ආරති විරති පටිවිරති සෙතුඝාතො. නවහි සඞ්‌ඝො භිජ්‌ජතීති ‘‘නවන්‌නං වා, උපාලි, අතිරෙකනවන්‌නං වා සඞ්‌ඝරාජි චෙව හොති සඞ්‌ඝභෙදො චා’’ති. නව පරමානීති පුබ්‌බෙ වුත්‌තපරමානෙව නවකවසෙන යොජෙත්‌වා වෙදිතබ්‌බානි. නව තණ්‌හාමූලකා නාම තණ්‌හං පටිච්‌ච පරියෙසනා, පරියෙසනං පටිච්‌ච ලාභො, ලාභං පටිච්‌ච විනිච්‌ඡයො, විනිච්‌ඡයං පටිච්‌ච ඡන්‌දරාගො, ඡන්‌දරාගං පටිච්‌ච අජ්‌ඣොසානං, අජ්‌ඣොසානං පටිච්‌ච පරිග්‌ගහො, පරිග්‌ගහං පටිච්‌ච මච්‌ඡරියං, මච්‌ඡරියං පටිච්‌ච ආරක්‌ඛා, ආරක්‌ඛාධිකරණං දණ්‌ඩාදානසත්‌ථාදානකලහවිග්‌ගහවිවාදතුවංතුවංපෙසුඤ්‌ඤමුසාවාදා. නව විධමානාති ‘‘සෙය්‍යස්‌ස සෙය්‍යොහමස්‌මී’’තිමානාදයො. නව චීවරානීති තිචීවරන්‌ති වා වස්‌සිකසාටිකාති වාතිආදිනා නයෙන වුත්‌තානි. න විකප්‌පෙතබ්‌බානීති අධිට්‌ඨිතකාලතො පට්‌ඨාය න විකප්‌පෙතබ්‌බානි . නව අධම්‌මිකානි දානානීති සඞ්‌ඝස්‌ස පරිණතං අඤ්‌ඤසඞ්‌ඝස්‌ස වා චෙතියස්‌ස වා පුග්‌ගලස්‌ස වා පරිණාමෙති, චෙතියස්‌ස පරිණතං අඤ්‌ඤචෙතියස්‌ස වා සඞ්‌ඝස්‌ස වා පුග්‌ගලස්‌ස වා පරිණාමෙති , පුග්‌ගලස්‌ස පරිණතං අඤ්‌ඤපුග්‌ගලස්‌ස වා සඞ්‌ඝස්‌ස වා චෙතියස්‌ස වා පරිණාමෙතීති එවං වුත්‌තානි.
329. Navakesu – nava āghātavatthūnīti ‘‘anatthaṃ me acarī’’tiādīni nava. Nava āghātapaṭivinayāti ‘‘anatthaṃ me acari, taṃ kutettha labbhāti āghātaṃ paṭivinetī’’tiādīni nava. Nava vinītavatthūnīti navahi āghātavatthūhi ārati virati paṭivirati setughāto. Navahi saṅgho bhijjatīti ‘‘navannaṃ vā, upāli, atirekanavannaṃ vā saṅgharāji ceva hoti saṅghabhedo cā’’ti. Nava paramānīti pubbe vuttaparamāneva navakavasena yojetvā veditabbāni. Nava taṇhāmūlakā nāma taṇhaṃ paṭicca pariyesanā, pariyesanaṃ paṭicca lābho, lābhaṃ paṭicca vinicchayo, vinicchayaṃ paṭicca chandarāgo, chandarāgaṃ paṭicca ajjhosānaṃ, ajjhosānaṃ paṭicca pariggaho, pariggahaṃ paṭicca macchariyaṃ, macchariyaṃ paṭicca ārakkhā, ārakkhādhikaraṇaṃ daṇḍādānasatthādānakalahaviggahavivādatuvaṃtuvaṃpesuññamusāvādā. Nava vidhamānāti ‘‘seyyassa seyyohamasmī’’timānādayo. Nava cīvarānīti ticīvaranti vā vassikasāṭikāti vātiādinā nayena vuttāni. Na vikappetabbānīti adhiṭṭhitakālato paṭṭhāya na vikappetabbāni . Nava adhammikāni dānānīti saṅghassa pariṇataṃ aññasaṅghassa vā cetiyassa vā puggalassa vā pariṇāmeti, cetiyassa pariṇataṃ aññacetiyassa vā saṅghassa vā puggalassa vā pariṇāmeti , puggalassa pariṇataṃ aññapuggalassa vā saṅghassa vā cetiyassa vā pariṇāmetīti evaṃ vuttāni.
නව පටිග්‌ගහපරිභොගාති එතෙසංයෙව දානානං පටිග්‌ගහා ච පරිභොගා ච. තීණි ධම්‌මිකානි දානානීති සඞ්‌ඝස්‌ස නින්‌නං සඞ්‌ඝස්‌සෙව දෙති, චෙතියස්‌ස නින්‌නං චෙතියස්‌සෙව, පුග්‌ගලස්‌ස නින්‌නං පුග්‌ගලස්‌සෙව දෙතීති ඉමානි තීණි. පටිග්‌ගහපටිභොගාපි තෙසංයෙව පටිග්‌ගහා ච පරිභොගා ච. නව අධම්‌මිකා සඤ්‌ඤත්‌තියොති අධම්‌මවාදිපුග්‌ගලො, අධම්‌මවාදිසම්‌බහුලා, අධම්‌මවාදිසඞ්‌ඝොති එවං තීණි තිකානි සමථක්‌ඛන්‌ධකෙ නිද්‌දිට්‌ඨානි. ධම්‌මිකා සඤ්‌ඤත්‌තියොපි ධම්‌මවාදී පුග්‌ගලොතිආදිනා නයෙන තත්‌ථෙව නිද්‌දිට්‌ඨා. අධම්‌මකම්‌මෙ ද්‌වෙ නවකානි ඔවාදවග්‌ගස්‌ස පඨමසික්‌ඛාපදනිද්‌දෙසෙ පාචිත්‌තියවසෙන වුත්‌තානි. ධම්‌මකම්‌මෙ ද්‌වෙ නවකානි තත්‌ථෙව දුක්‌කටවසෙන වුත්‌තානි. සෙසං සබ්‌බත්‌ථ උත්‌තානමෙවාති.
Nava paṭiggahaparibhogāti etesaṃyeva dānānaṃ paṭiggahā ca paribhogā ca. Tīṇi dhammikāni dānānīti saṅghassa ninnaṃ saṅghasseva deti, cetiyassa ninnaṃ cetiyasseva, puggalassa ninnaṃ puggalasseva detīti imāni tīṇi. Paṭiggahapaṭibhogāpi tesaṃyeva paṭiggahā ca paribhogā ca. Nava adhammikā saññattiyoti adhammavādipuggalo, adhammavādisambahulā, adhammavādisaṅghoti evaṃ tīṇi tikāni samathakkhandhake niddiṭṭhāni. Dhammikā saññattiyopi dhammavādī puggalotiādinā nayena tattheva niddiṭṭhā. Adhammakamme dve navakāni ovādavaggassa paṭhamasikkhāpadaniddese pācittiyavasena vuttāni. Dhammakamme dve navakāni tattheva dukkaṭavasena vuttāni. Sesaṃ sabbattha uttānamevāti.
නවකවාරවණ්‌ණනා නිට්‌ඨිතා.
Navakavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 9. නවකවාරො • 9. Navakavāro
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නවකවාරවණ්‌ණනා • Navakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නවකවාරවණ්‌ණනා • Navakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡක්‌කවාරාදිවණ්‌ණනා • Chakkavārādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො නවකවාරවණ්‌ණනා • Ekuttarikanayo navakavāravaṇṇanā
