| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. နာဝာလဂ္ဂနကင္ဂပဉ္ဟော
6. Nāvālagganakaṅgapañho
၆. ‘‘ဘန္တေ နာဂသေန, ‘နာဝာလဂ္ဂနကသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, နာဝာလဂ္ဂနကံ ဗဟုဦမိဇာလာကုလဝိက္ခောဘိတသလိလတလေ မဟတိမဟာသမုဒ္ဒေ နာဝံ လဂ္ဂေတိ ဌပေတိ, န ဒေတိ ဒိသာဝိဒိသံ ဟရိတုံ, ဧဝမေဝ ခော, မဟာရာဇ, ယောဂိနာ ယောဂာဝစရေန ရာဂဒောသမောဟူမိဇာလေ မဟတိမဟာဝိတက္ကသမ္ပဟာရေ စိတ္တံ လဂ္ဂေတဗ္ဗံ, န ဒာတဗ္ဗံ ဒိသာဝိဒိသံ ဟရိတုံ။ ဣဒံ, မဟာရာဇ, နာဝာလဂ္ဂနကသ္သ ပဌမံ အင္ဂံ ဂဟေတဗ္ဗံ။
6. ‘‘Bhante nāgasena, ‘nāvālagganakassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, nāvālagganakaṃ bahuūmijālākulavikkhobhitasalilatale mahatimahāsamudde nāvaṃ laggeti ṭhapeti, na deti disāvidisaṃ harituṃ, evameva kho, mahārāja, yoginā yogāvacarena rāgadosamohūmijāle mahatimahāvitakkasampahāre cittaṃ laggetabbaṃ, na dātabbaṃ disāvidisaṃ harituṃ. Idaṃ, mahārāja, nāvālagganakassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, နာဝာလဂ္ဂနကံ န ပ္လဝတိ 1 ဝိသီဒတိ, ဟတ္ထသတေပိ ဥဒကေ နာဝံ လဂ္ဂေတိ ဌာနမုပနေတိ, ဧဝမေဝ ခော, မဟာရာဇ, ယောဂိနာ ယောဂာဝစရေန လာဘယသသက္ကာရမာနနဝန္ဒနပူဇနအပစိတီသု လာဘဂ္ဂယသဂ္ဂေပိ န ပ္လဝိတဗ္ဗံ, သရီရယာပနမတ္တကေ ယေဝ စိတ္တံ ဌပေတဗ္ဗံ။ ဣဒံ, မဟာရာဇ, နာဝာလဂ္ဂနကသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –
‘‘Puna caparaṃ, mahārāja, nāvālagganakaṃ na plavati 2 visīdati, hatthasatepi udake nāvaṃ laggeti ṭhānamupaneti, evameva kho, mahārāja, yoginā yogāvacarena lābhayasasakkāramānanavandanapūjanaapacitīsu lābhaggayasaggepi na plavitabbaṃ, sarīrayāpanamattake yeva cittaṃ ṭhapetabbaṃ. Idaṃ, mahārāja, nāvālagganakassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ယထာ သမုဒ္ဒေ လဂ္ဂနကံ၊ န ပ္လဝတိ ဝိသီဒတိ။
‘‘‘Yathā samudde lagganakaṃ, na plavati visīdati;
တထေဝ လာဘသက္ကာရေ၊ မာ ပ္လဝထ ဝိသီဒထာ’’’တိ။
Tatheva lābhasakkāre, mā plavatha visīdathā’’’ti.
နာဝာလဂ္ဂနကင္ဂပဉ္ဟော ဆဋ္ဌော။
Nāvālagganakaṅgapañho chaṭṭho.
Footnotes:
